ખોખરામાં આંબેડકર પ્રતિમાને ખંડિત કરવામાં આવી: સ્થાનિકોમાં રોષ

અમદાવાદ: શહેરના ખોખરા વિસ્તારમાં આજે વહેલી સવારે એક ગંભીર ઘટના સામે આવી છે, જેમાં ભારતના સંવિધાનના સર્જક ડો. બાબાસાહેબ આંબેડકરની પ્રતિમાનું નાક તોડી તેની અવહેલના કરવામાં આવી છે. આ ઘટના ખોખરા વિસ્તારમાં સ્થિત કે.કા. શાસ્ત્રી કોલેજની સામે આવેલી જયંતિ વકીલની ચાલીની બહાર બની છે, જ્યાં આ પ્રતિમા સ્થાપિત છે.

પ્રતિમાનું નાક ખંડિત હાલતમાં જોવા મળતાં સ્થાનિકોમાં ગુસ્સાનો માહોલ છવાયો હતો. સ્થાનિક લોકોનું ટોળું ઘટના સ્થળે એકઠું થઈ ગયું હતું અને વિરોધનો અવાજ ઉઠાવવાનું શરૂ કર્યું હતું. આ ઘટના માત્ર પ્રતિમા ખંડિત કરવાના કાવતરાની જ નહીં, પણ એક સમુદાયની લાગણીઓને નુકસાન પહોંચાડવાના પ્રયાસ તરીકે જોવામાં આવી રહી છે.

સ્થાનિક લોકોના જણાવ્યા અનુસાર, આ કૃત્ય કોઈ અજાણ્યા શખ્સો દ્વારા રાત્રિના સમયે કરવામાં આવ્યું હોવાનો શંકા છે. ઘટનાની ગંભીરતાને ધ્યાને રાખીને તરત જ પોલીસને જાણ કરવામાં આવી હતી. પોલીસ ટીમ સ્થળ પર પહોંચી તપાસ શરૂ કરી છે અને દોષિતોને ઝડપવા માટે જંગી પ્રયાસો કરવામાં આવી રહ્યા છે.

આ ઘટના બાદ શાંતિ જાળવવા માટે સામાજિક નેતાઓએ સ્થાનિક લોકોને અપીલ કરી છે. આ પ્રકારની ઘટનાઓ સામાજિક અને સાંસ્કૃતિક શાંતિ માટે ખતરાનું ચિહ્ન છે અને તેને કારણે એકતા અને સાંપ્રદાયિક સદભાવને નુકસાન થઈ શકે છે.

લોકોએ આ ઘટના સામે ભારે નારાજગી વ્યક્ત કરી છે અને જવાબદાર શખ્સોને ઝડપીને કડકથી કાયદેસર કાર્યવાહી કરવાની માગ કરી છે. પ્રતિમાને મરામત કરીને ફરી સ્થાપિત કરવા સાથે આવા કૃત્યોને રોકવા માટે કડક સુરક્ષા વ્યવસ્થા કરવાની જરૂરિયાત પણ વ્યકત કરવામાં આવી રહી છે.

આંબેડકરની પ્રતિમાને નુકસાન પહોંચાડવાની આ ઘટના માત્ર એક પ્રતિમાને નુકસાન નથી, પરંતુ તેમના દ્વારા પ્રેરિત દેશભક્તિ, સમાનતા અને ન્યાયના મૌલિક મનોભાવો પર હુમલો છે. હવે જોવાનું રહ્યું કે પોલીસ દોષિતોને ઝડપવામાં કેટલું સફળ રહે છે અને સમુદાયની લાગણીઓને કેટલું ન્યાય મળે છે.

સૌરાંગ ઠકકર
અમદાવાદ જીલ્લા બ્યુરો ચીફ

આ પ્રકારના તમામ સમાચાર માટેે App ડાઉનલોડ કરો.