હાથીજણ ગામમાં મેડિકલ કેમ્પ: આરોગ્ય સેવાઓ અને પ્રાચીન ઉપચારથી ભરપૂર પ્રોગ્રામ

અમદાવાદ શહેરના પૂર્વવિસ્તારમાં આવેલા હાથીજણ ગામે શ્રી સંકટમોચન હનુમાન ભક્ત મંડળ અને શક્તિપીઠ સેવા આશ્રમ ટ્રસ્ટ વટવાના સંયુક્ત ઉપક્રમે એક વિશાળ મેડિકલ કેમ્પનું આયોજન કરવામાં આવ્યું હતું. આ કેમ્પ હાથીજણ ગામના મૌલિક અતુલભાઇ પટેલ (મ્યુનિસિપલ કાઉન્સિલર, ભાજપ)ની ઓફિસ ખાતે યોજાયો હતો, જેમાં આરોગ્ય અને પ્રાચીન ઉપચાર પદ્ધતિઓના અનોખા સંયોજનથી દર્દીઓને સેવા મળી હતી.

કેમ્પમાં મોટી સંખ્યામાં સ્થાનિક લોકો ઉપસ્થિત રહ્યા અને તેમના માટે બોડી ચેકઅપ, બ્લડ ટેસ્ટ, અને વિવિધ આરોગ્ય સેવાઓ ઉપલબ્ધ કરાવવામાં આવી હતી. સાથે સાથે, આ અનોખા કેમ્પમાં વર્ષોથી વપરાતી કાંસાના ધાતુથી થનારી માલિશ થેરાપીની શરુઆત કરવામાં આવી હતી. આ થેરાપી શુદ્ધ ગાયના ઘીનો ઉપયોગ કરીને કાંસાની થાળી દ્વારા કરવામાં આવી હતી, જે તેનાથી દર્દીઓના શરીરના તણાવમાં રાહત અને આરોગ્યવર્ધક લાભ મળે છે.

સંસ્થાના પ્રમુખ અને સિનિયર પૂર્વ મ્યુનિસિપલ કાઉન્સિલર શ્રી અતુલભાઈ રાવજીભાઈ પટેલે જણાવ્યું કે, "આ પ્રકારના કેમ્પ દ્વારા આપણે લોકોના શરીર તથા મનના આરોગ્યમાં સુધારો લાવી શકીએ છીએ અને પ્રાચીન વિજ્ઞાનને પુનર્જીવિત કરી શકીએ છીએ."

આ મેડિકલ કેમ્પ હનુમાન ભક્ત મંડળ અને શક્તિપીઠ સેવા આશ્રમ ટ્રસ્ટના સૌજન્યથી સફળ બનાવવામાં આવ્યો હતો. આ કાર્યક્રમ એક ઉત્તમ ઉદાહરણ છે કે કેવી રીતે આધુનિક મેડિકલ સેવાઓ સાથે સાથે પ્રાચીન ઉપચાર પદ્ધતિઓને સમાજના હિતમાં ઉપયોગ કરી શકાય છે.

સ્થાનિક જનતાએ આ કેમ્પને વિશેષ પ્રતિસાદ આપ્યો હતો અને તબીબી સેવાઓ માટે આભાર વ્યક્ત કર્યો હતો. હનુમાન ભક્ત મંડળ દ્વારા આવી સેવા પ્રવૃત્તિઓ ભવિષ્યમાં વધુ યોજવામાં આવશે એવી આશા વ્યક્ત કરવામાં આવી છે.

સૌરાંગ ઠકકર
અમદાવાદ જીલ્લા બ્યુરો ચીફ

આ પ્રકારના તમામ સમાચાર માટેે App ડાઉનલોડ કરો.