મિલ્કતમાં ઉંચા વળતરની સાથે દારૂ-જુગારની બાતમી પણ આપીશ કહીં PSI સાથે રૂા.5.50 લાખની ઠગાઈ

ફોજદારને તેના મિત્રએ જ મિલ્કતમાં ઉંચા વળતરની સાથે દારૂ-જુગારની બાતમી પણ આપીશ કહીં રૂ.5.50 લાખની છેતરપીંડી આચર્યાની ફરીયાદ નોંધાઈ હતી.
બનાવ અંગે રેસકોર્સ બિલ્ડીંગની બાજુમાં, રાજેશ-ઇ-5 માં રહેતાં અને જૂનાગઢ પીટીસી ખાતે ફરજ બજાવતાં પીએસઆઈ મહેન્દ્રભાઈ ભીખુભાઈ જેબલિયા (ઉ.વ. 48) એ નોંધાવેલ ફરીયાદમાં આરોપી તરીકે તેના જ મિત્ર નયન જતીન સેજપાલ (રહે. સિનર્જી હોસ્પિટલ પાસે) નું નામ આપતાં ગાંધીગ્રામ પોલીસે છેતરપીંડી સહિતની કલમ હેઠળ ગુનો નોંધી તપાસ આદરી હતી. વધુમાં ફરિયાદમાં પીએસઆઈ જેબલીયાએ જણાવ્યું છે કે, વર્ષ 2019 માં રાજકોટના ગાંધીગ્રામ પોલીસ મથક ખાતે ફરજ બજાવતા હતા. ત્યારે આરોપી સાથે સંપર્ક થતાં મિત્રતા થઇ હતી.
તે વખતે આરોપીએ કહ્યું કે, હું જમીન-મકાનની દલાલી કરું છું, તમારે પ્રોપર્ટીમાં રોકાણ કરવું હોય તો કહેજો. ત્યારબાદ આરોપીએ પ્રોપર્ટીનું લિસ્ટ બતાવ્યું હતું. જે બાદ અવારનવાર કોલ અને વોટ્સએપ કોલ કરી, દારૂ અને જુગારની બાતમી આપીશ તેમ પણ કહેતો હતો. 2019ની સાલમાં આરોપીએ તેને કોલ કરી સિનર્જી હોસ્પિટલ પાસે પ્રોપર્ટી બતાવવા બોલાવ્યા હતાં.
જ્યાં જતાં આરોપીએ કહ્યું કે, રૂ. 5 લાખની વ્યવસ્થા કરો, રૂ. 25 લાખના ફલેટનું ટોકન આપવાનું છે, એક ફલેટ લેનાર ગ્રાહક છે જેને રૂ. 29 લાખમાં વેચી દેવાથી રૂ.4 લાખનો નફો થશે, જેમાંથી હું તમને રૂ.2 લાખ આપીશ. જેથી આરોપીને રૂ.5 લાખની વ્યવસ્થા કરી આપી દીધા હતાં.
તે વખતે આરોપીએ કહ્યું કે, સામેની પાર્ટી ફલેટ લેવા તૈયાર જ છે, લોન પણ તૈયાર જ છે, તેમના મકાનનો કબ્જો આપણી પાસે જ છે તેમ કહી વિશ્વાસમાં લીધા હતાં. એટલું જ નહીં તેણે પણ બાતમી મેળવવા અલગ-અલગ વાતો કરી હતી. થોડીવાર બાદ આરોપીની ઓફિસમાં એક યુવતી આવી હતી. જેને આરોપી બેટા કહીને બોલાવતો હતો. આરોપીએ રકમ એ યુવતીને ગણવા માટે આપી દીધી હતી.
બીજા દિવસે આરોપીએ ઘંટેશ્વર પાસે ફોરચ્યુનર સેરેમનીમાં ફલેટ દેખાડયો હતો અને કહ્યું કે આ ફલેટનો સોદો આપણે કરવાના છીએ. દિવસો પસાર થતા આરોપીને સોદા બાબતે પૂછતાં ગલ્લા-તલ્લાં અને રાહ જોવાનું કહેવાનું શરૂ કર્યું હતું.
મહિનાઓ પસાર થયા બાદ આરોપી પાસે પૈસા પરત માંગતા કહ્યું કે તમારા હિસાબમાં આવતા વધારાના 2 લાખમાંથી દોઢ લાખ આપું છું, બાકીના 50,000 પછી આપીશ, પાંચ લાખની મૂડીની હાલ મારે જરૂર છે અને તેનું રોકાણ પણ થઇ ગયું છે, તમે થોડી રાહ જુઓ. આ રીતે આરોપીએ રૂ. 5 લાખ તેની પાસેથી લઇ નફા પેટેના રૂ. 2 લાખમાંથી રૂ. દોઢ લાખ આપી નફાના રૂ. 50,000 ઉપરાંત મૂડીના રૂ. 5 લાખ એમ કુલ રૂ. 5.50 લાખ નહીં આપતાં આખરે ફરિયાદ નોંધાવી હતી. બનાવ અંગેની ફરીયાદ પરથી ગાંધીગ્રામ પોલીસે ગુનો નોંધી તપાસ આદરી હતી.

આ પ્રકારના તમામ સમાચાર માટેે App ડાઉનલોડ કરો.