ઉના સરકારી સબડિસ્ટ્રીકટ હોસ્પિટલમાં વિવિધ સાધનો નું લોકાર્પણ કરાયું.(જીતેન્દ્ર ઠાકર)

રૂ. ૬૬.૭૫ લાખથી વધુના ખર્ચે મૂકાયેલા વિવિધ અત્યાધુનિક મશીનથી દર્દીઓનું નિદાન અને સારવાર થશે

'જન આરોગ્ય અને લોકસુખાકારી માટે વહીવટી તંત્ર સતત પ્રયત્નશીલ'

કલેકટર શ્રી દિગ્વિજયસિંહ જાડેજા...

ઉના ખાતે જિલ્લા આયોજન કચેરી તથા ડિસ્ટ્રિક્ટ મિનરલ ફાઉન્ડેશન ગીર સોમનાથની ગ્રાન્ટમાંથી જિલ્લા પંચાયત પ્રમુખ શ્રી મંજૂલાબહેન મૂછાર, ધારાસભ્ય શ્રી કાળુભાઈ રાઠોડ અને કલેક્ટરશ્રી સહિત મહાનુભાવોની ઉપસ્થિતિમાં સરકારી સબ ડિસ્ટ્રિક્ટ હોસ્પિટલમાં વિવિધ આરોગ્યલક્ષી સાધનોનું લોકાર્પણ કરાયું હતું.

આ તકે, કલેક્ટર શ્રી દિગ્વિજયસિંહ જાડેજાએ જણાવ્યું હતું કે, જન આરોગ્ય અને લોકસુખાકારી માટે વહીવટી તંત્ર સતત પ્રયત્નશીલ છે. જિલ્લા આયોજન કચેરી તથા ડિસ્ટ્રિક્ટ મિનરલ ફાઉન્ડેશન અંતર્ગત હોસ્પિટલમાં જ વિવિધ સાધનોની સગવડ ઉપલબ્ધ થવાના કારણે સમગ્ર તાલુકાના દર્દીઓને પૂરતી સુવિધાઓ મળી રહેશે.

વધુમાં કલેક્ટરશ્રીએ જણાવ્યું હતું કે, હોસ્પિટલમાં અત્યાધુનિક સાધનોની મદદથી હવે ૧૧૧ પ્રકારના તમામ લોહીના રિપોર્ટ અને સોનોગ્રાફી હોસ્પિટલમાં જ ઉપલબ્ધ થવાથી દર્દીઓને વધુ આરોગ્યલક્ષી સુવિધાઓ મળી રહેશે. જેનો લાભ ઉના સહિત આસપાસના ગ્રામ્ય વિસ્તારોને પણ મળશે.

ઉલ્લેખનીય છે કે, જિલ્લા આયોજન કચેરીની ગ્રાંટમાંથી સરકારી સબ હોસ્પિટલ ઉનામાં કલર ડોપ્લર સોનોગ્રાફી મશીન, એનેસ્થેસ્યિા ટ્રોલી, બાયોકેમિસ્ટ્રી અને મેગ્લુમી ઓટો એનાલાઈઝર, પોર્ટેબલ ઓ.ટી. લાઈટ, ઓ.ટી. ટેબલ વીથ ઓર્થો એટેચમેન્ટ, પોર્ટેબલ ડેન્ટલ એક્સ-રે વીથ આર.વી.જી. પીસી, હોસ્પિટલ આર.ઓ.પ્લાન્ટ કૂલર એમ કુલ રૂ. ૬૬.૭૫ લાખના ખર્ચે કુલ ૧૦ સુવિધાઓ વિકસાવવામાં આવી છે.

જ્યારે ડિસ્ટ્રિક્ટ મિનરલ ફાઉન્ડેશનની ગ્રાંટમાંથી
એ.બી.જી મશીન, એક્સ-રે લીડ એપ્રોન, ડિલિવરી બેડ, કોટ્રી મશિન, ઓ.ટી.ટેબલ, ઓલ ઈન વન આર.વી.જી. યુનિટ જેવી સુવિધાઓ પ્રદાન કરવામાં આવી છે.

છેવાડાનો વિસ્તાર હોવાના કારણે હોસ્પિટલમાં આવતા દર્દીઓને અને સગર્ભા મહિલાઓને પણ સોનોગ્રાફીની તપાસ અર્થે ખાનગી હોસ્પિટલની મદદ લેવી પડતી હતી. તેમજ વિવિધ લોહીના રિપોર્ટ માટે પણ ખાનગી લેબોરેટરીની મદદ લેવી પડતી હતી. પરંતુ હવે તમામ પ્રકારના આધુનિક સાધનોની મદદથી વધુ ઝડપી સારવાર અને નિદાન શક્ય બનશે.

વધુમાં, હોસ્પિટલમાં આવતા દર્દીઓને પીવાના ફિલ્ટરયુક્ત પાણીની સગવડ મળી રહે તે માટે ફિલ્ટર પ્લાન્ટની સગવડતા અને ઓપરેશન થિએટરમાં જરૂરી તમામ સાધનો ઉપલબ્ધ કરાવવામાં આવ્યાં છે.

આ તકે, ઉના નગરપાલિકા પ્રમુખ શ્રી પરેશભાઈ બાંભણિયા, તાલુકા પંચાયત પ્રમુખ શ્રી એભાભાઈ મકવાણા, નિવાસી અધિક કલેકટર શ્રી રાજેશ આલ, જિલ્લા પુરવઠા અધિકારી શ્રી પારસ વાંદા, પ્રાંત અધિકારી શ્રી કે.એચ.પરમાર, ડિસ્ટ્રિક્ટ મિનરલ કો-ઓર્ડિનેટર શ્રી ભૂપતભાઈ સાંખટ, આયોજન અધિકારી શ્રી પી.જી. ગહેલોત , ઉના સિવિલ સુપ્રીટેન્ડન્ટ શ્રી એન.એમ.મિશ્રા સહિત હોસ્પિટલના કર્મચારીઓ ઉપસ્થિત રહ્યાં હતાં.

આ પ્રકારના તમામ સમાચાર માટેે App ડાઉનલોડ કરો.