મેરિટલ રેપ મામલે આજે સુપ્રીમ કોર્ટમાં સુનાવણી:કર્ણાટક અને દિલ્હી હાઈકોર્ટે તેને ગુનો ગણાવ્યો, પરંતુ કાયદામાં તેના માટે કોઈ સજા નથી

સુપ્રીમ કોર્ટમાં મંગળવારે (24 સપ્ટેમ્બર) એ મુદ્દે સુનાવણી હાથ ધરવામાં આવશે કે શું પતિ વિરુદ્ધ તેની પત્ની સાથે બળજબરીથી શારીરિક સંબંધ બાંધવા બદલ કેસ દાખલ કરવો જોઈએ કે નહીં. ચીફ જસ્ટિસ ઑફ ઈન્ડિયા (CJI) DY ચંદ્રચુડ અને જસ્ટિસ જેબી પારડીવાલાની બેન્ચ આ અંગે સુનાવણી કરશે. કર્ણાટક હાઈકોર્ટ અને દિલ્હી હાઈકોર્ટના બે ચૂકાદા વિરુદ્ધ મામલો સુપ્રીમ કોર્ટમાં પહોંચ્યો છે. આ સિવાય ઘણી વધુ જાહેર હિતની અરજીઓ દાખલ કરવામાં આવી હતી. આ બધાને એકસાથે મર્જ કરીને સુપ્રીમ કોર્ટમાં સુનાવણી કરવામાં આવશે. ભારતીય ન્યાય સંહિતા (BNS)ની કલમ 63 (બળાત્કાર)ના અપવાદ 2 મુજબ, મેરિચલ રેપને ગુનો ગણવામાં આવતો નથી. જો કે કેન્દ્ર સરકારે પણ આ મામલે જવાબ દાખલ કરવો પડશે. કેન્દ્રનું કહેવું છે કે, કાયદામાં ફેરફાર કરવા માટે ચર્ચાની જરૂર છે. મેરિટલ રેપનો મામલો સુપ્રીમ કોર્ટમાં કેવી રીતે પહોંચ્યો? લાંબા સમયથી વૈવાહિક બળાત્કાર અંગે નવો કાયદો બનાવવાની માગ કરવામાં આવી રહી હતી. છેલ્લા બે વર્ષમાં દિલ્હી હાઈકોર્ટ અને કર્ણાટક હાઈકોર્ટના નિર્ણયો બાદ તેની માગ વધુ તીવ્ર બની છે. સુપ્રીમ કોર્ટમાં બે મુખ્ય અરજીઓ છે, જેની સુનાવણી થશે. એક અરજી પતિ તરફથી દાખલ થઈ હતી, જ્યારે અન્ય કેસમાં મહિલાએ અરજી કરી હતી. દિલ્હી હાઈકોર્ટનો કેસઃ વર્ષ 2022માં એક મહિલાએ તેના પતિ દ્વારા બળજબરીપૂર્વક શારીરિક સંબંધ બાંધવા પર દિલ્હી હાઈકોર્ટમાં અરજી દાખલ કરી હતી. 11 મે, 2022ના રોજ દિલ્હી હાઈકોર્ટના બે ન્યાયાધીશોએ અલગ-અલગ નિર્ણયો આપ્યા હતા. જસ્ટિસ રાજીવ શકધરે મેરિટલ રેપના અપવાદને રદ કરવાનું સમર્થન કર્યું હતું. તે જ સમયે, જસ્ટિસ સી હરિ શંકરે કહ્યું કે પતિને આપવામાં આવેલી છૂટ ગેરબંધારણીય નથી અને તે સમજદાર ભેદ પર આધારિત છે. કર્ણાટક હાઈકોર્ટ કેસઃ કર્ણાટક હાઈકોર્ટમાં એક પતિએ તેની પત્નીએ લગાવેલા બળાત્કારના આરોપો પર હાઈકોર્ટનો દરવાજો ખખડાવ્યો હતો. 23 માર્ચ, 2023ના રોજ, કર્ણાટક હાઈકોર્ટે પતિ સામેના બળાત્કારના આરોપોને રદ કરવાનો ઇનકાર કર્યો હતો. હાઈકોર્ટે આ કેસમાં અપવાદ સ્વીકારવાનો ઈન્કાર કર્યો હતો. આ કેસમાં કર્ણાટક હાઈકોર્ટના જસ્ટિસ એમ નાગપ્રસન્નાની સિંગલ બેન્ચે કહ્યું હતું કે તથ્યોના આધારે પતિને આવા જાતીય હુમલો/બળાત્કાર માટે સંપૂર્ણ પ્રતિરક્ષા આપી શકાય નહીં. મેરિટલ રેપ શું છે, ભારતમાં શું કાયદો છે પત્નીની પરવાનગી વિના પતિ દ્વારા બળજબરીથી શારીરિક સંબંધ બાંધવાને મેરિટલ રેપ કહેવાય છે. મેરિટલ રેપને ઘરેલું હિંસા અને પત્ની સામે જાતીય સતામણીનો એક પ્રકાર ગણવામાં આવે છે. ભારતમાં મેરિટલ રેપને ગુનો ગણવામાં આવતો નથી. અરજીકર્તાઓએ BNSની કલમ 63માંથી અપવાદ દૂર કરવા માટે 3 દલીલો આપી છે ભારત સરકારે મેરિટલ રેપને ગુનો ગણવાની ના પાડી દીધી
2016માં મોદી સરકારે મેરિટલ રેપના વિચારને ફગાવી દીધો હતો. સરકારે કહ્યું હતું કે દેશમાં નિરક્ષરતા, વિવિધ સામાજિક રિવાજો, મૂલ્યો, ધાર્મિક માન્યતાઓ અને લગ્નને સંસ્કાર ગણવાની સમાજની માનસિકતા જેવા વિવિધ કારણોને કારણે ભારતીય સંદર્ભમાં તેનો અમલ કરી શકાતો નથી. 2017માં, સરકારે મેરિટલ રેપને અપરાધ જાહેર કરવા માટેના કાયદાકીય અપવાદને દૂર કરવાનો વિરોધ કર્યો હતો. સરકારે દલીલ કરી હતી કે મેરિટલ રેપને ગુનાહિત બનાવવું લગ્નની સંસ્થાને અસ્થિર કરશે અને તેનો ઉપયોગ પત્નીઓ તેમના પતિઓને સજા કરવા માટે કરશે. ગયા વર્ષે દિલ્હી હાઈકોર્ટમાં મેરિટલ રેપ પર ચાલી રહેલી સુનાવણી દરમિયાન કેન્દ્રએ કહ્યું હતું કે અન્ય દેશોએ મેરિટલ રેપને ગુનો જાહેર કર્યો હોવાથી ભારતે પણ આવું કરવાની જરૂર નથી. 19મી સદીમાં, અંગ્રેજી કાયદાએ મેરિટલ રેપને માન્યતા આપી હતી
જોનાથન હેરિંગના પુસ્તક ફેમિલી લો (2014) અનુસાર, ઐતિહાસિક રીતે વિશ્વના મોટાભાગના ભાગોમાં એવી માન્યતા હતી કે પતિ તેની પત્ની પર બળાત્કાર કરી શકતો નથી, કારણ કે પત્નીને પતિની મિલકત માનવામાં આવતી હતી. 20મી સદી સુધી અમેરિકા અને ઇંગ્લેન્ડના કાયદા માનતા હતા કે લગ્ન પછી પત્નીના અધિકારો પતિના અધિકારો સાથે ભળી જાય છે. 19મી સદીની શરૂઆતમાં નારીવાદી ચળવળોના ઉદય સાથે, એવો વિચાર પણ ઊભો થયો કે લગ્ન પછી પતિ અને પત્ની વચ્ચેના જાતીય સંબંધો માટે સંમતિ મેળવવાનો મહિલાઓનો અધિકાર તેમનો મૂળભૂત અધિકાર છે.

આ પ્રકારના તમામ સમાચાર માટેે App ડાઉનલોડ કરો.