વાયનાડ ભૂસ્ખલન: 318નાં મોત, 206 ગુમ:અમેરિકી રાષ્ટ્રપતિએ દુઃખ વ્યક્ત કર્યું, બચાવ ટીમની પ્રશંસા કરી; રાહુલ-પ્રિયંકા આજે પણ પીડિતોને મળશે

કેરળના વાયનાડમાં ભારે વરસાદને પગલે ભૂસ્ખલનમાં મૃત્યુઆંક 318 પર પહોંચી ગયો છે. 130 લોકો હોસ્પિટલમાં છે, જ્યારે દુર્ઘટનાના ચોથા દિવસ પછી પણ 206 લોકો હજુ પણ લાપતા છે. હવામાન વિભાગે આજે (2 ઓગસ્ટ) અહીં વરસાદનું ઓરેન્જ એલર્ટ જાહેર કર્યું છે. ગુરુવારે મોડી રાત્રે (ભારતીય સમય મુજબ) આ દુર્ઘટના અંગે અમેરિકી રાષ્ટ્રપતિ જો બાઇડને પણ શોક વ્યક્ત કર્યો હતો. તેમણે કહ્યું- આ મુશ્કેલ સમયમાં અમે ભારતની સાથે છીએ. અમે બચાવમાં સામેલ લોકોની પ્રશંસા કરીએ છીએ. બીજી તરફ ગુરુવારે વાયનાડ પહોંચેલા રાહુલ ગાંધી અને પ્રિયંકા ગાંધી પણ આજે અહીં પીડિતોને મળશે. 29-30 જુલાઈની વચ્ચેની રાત્રે મુંડક્કાઈ, ચુરામાલા, અટ્ટમાલા અને નૂલપુઝા ગામમાં ભૂસ્ખલન થયું હતું. મકાનો, પુલ, રસ્તા અને વાહનો ધોવાઈ ગયાં હતાં. સેનાના જનરલ કમાન્ડિંગ ઓફિસર મેજર જનરલ વીટી મેથ્યુએ જણાવ્યું હતું કે, બચાવકાર્ય પૂર્ણ થઈ ગયું છે. હવે માત્ર મૃતદેહો શોધવાનું કામ કરવામાં આવી રહ્યું છે. છેલ્લા 24 કલાકના અપડેટ્સ... રાહુલ-પ્રિયંકા પીડિતોને મળ્યાં
લોકસભામાં વિપક્ષના નેતા રાહુલ ગાંધી અને તેમની બહેન પ્રિયંકા ગાંધી ગુરુવારે સવારે વાયનાડ પહોંચ્યાં હતાં. મુલાકાત દરમિયાન બંનેએ લેન્ડ સ્લાઈડ અસરગ્રસ્ત લોકો સાથે વાત કરી હતી. ચુરામાલા અને મેપ્પડી ખાતેની હોસ્પિટલ અને સામુદાયિક આરોગ્ય કેન્દ્રનાં શબઘરો પણ પહોંચી ગયાં હતાં. રાહુલ ગાંધીએ વાયનાડમાં કહ્યું કે, કેટલાક લોકોએ પોતાના પરિવાર અને ઘર ગુમાવ્યાં છે તે જોઈને દુઃખ થાય છે. અમે મદદ કરવાનો પ્રયાસ કરીશું અને એ સુનિશ્ચિત કરીશું કે બચી ગયેલા લોકોને તેમના અધિકારો મળે. આજે હું મારા પિતાના મૃત્યુ સમયે જે રીતે અનુભવતો હતો તે જ રીતે અનુભવું છું. રાહુલે વાયનાડ અને રાયબરેલીથી લોકસભા ચૂંટણી જીતી હતી. તેમણે વાયનાડ બેઠક છોડી દીધી હતી. હવે પ્રિયંકા વાયનાડથી ચૂંટણી લડવા જઈ રહી છે. કેરળના મંત્રીએ કહ્યું- 9328 લોકોને સુરક્ષિત સ્થળે ખસેડવામાં આવ્યા છે
કેરળના મહેસૂલ મંત્રી કે રાજને ગુરુવારે કહ્યું કે, અત્યાર સુધીમાં 9328 લોકોને 91 રાહત શિબિરોમાં સુરક્ષિત રીતે ખસેડવામાં આવ્યા છે. તેમાંથી 578 પરિવારોના 2328 લોકો ચૂરામાલા અને મેપ્પડીના છે. સૌથી વધુ વિનાશ અહીં થયો હતો. ચુરલમાલાથી મુંડક્કાઈને જોડતો પુલ તૈયાર
આર્મીના મદ્રાસ એન્જિનિયરિંગ ગ્રૂપે વાયનાડમાં ચુરલમાલાને મુંડક્કાઈથી જોડવા માટે 190 ફૂટ લાંબો બેઈલી બ્રિજ બનાવ્યો હતો. આનાથી રાહત કાર્યમાં ઝડપ આવી શકે છે. કાટમાળ હટાવવાનું કામ વધુ ઝડપથી કરવામાં આવશે, કારણ કે હવે મોટાં જેસીબી મશીનો એવાં સ્થળોએ પહોંચાડવામાં આવશે જ્યાં સૌથી વધુ વિનાશ થયો છે. સીએમ વિજયને કહ્યું- રેસ્ક્યૂ ઓપરેશન પૂરું, મૃતદેહો કાઢવાનું કામ ચાલુ
કેરળના મુખ્યમંત્રી વિજયને કહ્યું કે, બચાવ કામગીરી પૂરી થઈ ગઈ છે. એટલે કે ફસાયેલા પીડિતોને બચાવીને સલામત સ્થળે લઈ જવામાં આવ્યા છે. ઘાયલોની સારવાર ચાલુ છે. હવે કાટમાળ હટાવવા અને મૃતદેહોને બહાર કાઢવાની કામગીરી કરવામાં આવી રહી છે. બચાવમાં સેનાએ પ્રશંસનીય કામગીરી કરી છે. AIADMK એ 1 કરોડ રૂપિયાના રાહત પેકેજની જાહેરાત કરી
તમિલનાડુની વિપક્ષી પાર્ટી AIADMKએ વાયનાડ પીડિતો માટે 1 કરોડ રૂપિયાના રાહત પેકેજની જાહેરાત કરી છે. પાર્ટીના મહાસચિવ અને પૂર્વ મુખ્યમંત્રી પલાનીસ્વામીએ કહ્યું કે 1 કરોડ રૂપિયા ઉપરાંત અમે પડોશી રાજ્યોમાં પણ રાહત સામગ્રી મોકલીશું. બચાવ કામગીરીની તસવીરો... 5 વર્ષ પહેલાં પણ અહીં ભૂસ્ખલનને કારણે 17 લોકોના મોત થયા હતા
વાયનાડનાં 4 ગામોમાં ભૂસ્ખલન થયું છે. મુંડક્કાઈ, ચુરલમાલા, અટ્ટમાલા અને નૂલપુઝા. પાંચ વર્ષ પહેલાં 2019માં આ જ ગામોમાં ભારે વરસાદને કારણે ભૂસ્ખલન થયું હતું, જેમાં 17 લોકોના મોત થયા હતા. 5 લોકો આજદિન સુધી મળ્યા નથી. 52 મકાનો ધરાશાયી થયાં હતાં. વાયનાડમાં ભૂસ્ખલનનું કારણ શું છે?
વાયનાડ કેરળના ઉત્તર-પૂર્વમાં છે. કેરળનો આ એકમાત્ર ઉચ્ચ પ્રદેશનો વિસ્તાર છે. એટલે કે માટી, પથ્થરો અને વૃક્ષો અને તેના પર ઊગેલા છોડના ઊંચા અને નીચા ટેકરાવાળો વિસ્તાર. જિયોલોજિકલ સર્વે ઓફ ઈન્ડિયાના 2021ના અહેવાલ મુજબ કેરળનો 43% વિસ્તાર ભૂસ્ખલનથી પ્રભાવિત છે. વાયનાડની 51% જમીન પહાડી ઢોળાવવાળી છે. એટલે કે ભૂસ્ખલનની શક્યતા ઘણી વધારે રહે છે. વાયનાડ ઉચ્ચ પ્રદેશ પશ્ચિમ ઘાટમાં 700થી 2100 મીટરની ઊંચાઈ પર આવેલું છે. ચોમાસાની અરબી સમુદ્રની શાખા દેશના પશ્ચિમ ઘાટને અથડાય છે અને વધે છે, તેથી આ વિસ્તારમાં ચોમાસાની ઋતુમાં ઘણો વરસાદ પડે છે. કબિની નદી વાયનાડમાં છે. તેની ઉપનદી માનંતવડી 'થોંડારામુડી' શિખરમાંથી નીકળે છે. ભૂસ્ખલનને કારણે આ નદીમાં પૂરના કારણે મોટું નુકસાન થયું છે.

આ પ્રકારના તમામ સમાચાર માટેે App ડાઉનલોડ કરો.