પતિ જેલમાં ગયો’ને પત્નીએ દારૂ વેચવાનું શરૂ કર્યું: 600 બોટલ સાથે પકડાઈ

રાજકોટમાં દારૂ વેચાણના દૂષણને ડામી દેવા માટે પોલીસે ધડાધડ દરોડા પાડવાનું શરૂ કર્યું છે જેના કારણે બૂટલેગરોમાં રીતસરનો ફફડાટ ફેલાઈ જવા પામ્યો છે. સામાન્ય રીતે દારૂનું વેચાણ કરતાં લગભગ દરેક વખતે પુરુષ બૂટલેગરો જ પકડાતા હોય છે પરંતુ ક્રાઈમ બ્રાન્ચે નવલનગરમાં દરોડો પાડીને મહિલાને દારૂના જથ્થા સાથે પકડી પાડતાં ચકચાર મચી જવા પામી છે. દારૂ સાથે પકડાયેલી મહિલાનો પતિ મારામારીના ગુનામાં જેલમાં ગયા બાદ પત્નીએ દારૂ વેચાણ સંભાળી લીધું હોવાનું તપાસમાં ખુલ્યું છે.
આ અંગે વધુમાં જાણવા મળતી વિગતો પ્રમાણે ક્રાઈમ બ્રાન્ચ પીઆઈ બી.ટી.ગોહિલના માર્ગદર્શન હેઠળ એએસઆઈ રાજદીપસિંહ ગોહિલ, હેડ કોન્સ્ટેબલ ડી.ડી.જાડેજા, કોન્સ્ટેબલ રણજીતસિંહ જાડેજા, ક્રિપાલસિંહ ગોહિલ સહિતના સ્ટાફે બાતમીના આધારે નવલનગર વિસ્તારમાં આવેલી શ્રીનાથજી સોસાયટી શેરી નં.6માં આવેલી ઓરડીમાં દરોડો પાડતાં ત્યાંથી વિદેશી દારૂની અલગ-અલગ બ્રાન્ડની 600 બોટલ મળી આવી હતી. તપાસ કરતા આ દારૂ સપનાબેન ધવલભાઈ ડાંગરનો હોવાનું ખુલતાં તેની ધરપકડ કરવામાં આવી હતી.
ધરપકડ બાદ સપના ડાંગરની પૂછપરછ કરવામાં આવતાં તેનો પતિ ધવલ થોડા સમય પહેલાં જ મારામારીના ગુનામાં જેલમાં ગયો હોય દારૂ વેચાણનું કામ તેણે સંભાળી લીધું હતું. જો કે જેલમાં જતા પહેલાં તે અને તેનો પતિ ધવલ બન્ને દારૂનું વેચાણ કરી રહ્યા હતા. પોલીસ તપાસમાં એવું પણ ખુલ્યું છે કે સપના સામે આ અગાઉ ક્રાઈમ બ્રાન્ચમાં જ દારૂની હેરાફેરીનો ગુનો નોંધાયો હોવાનું ખુલ્યું છે. ક્રાઈમ બ્રાન્ચે સપનાની ધરપકડ કરી તે દારૂનો આ જથ્થો ક્યાંથી લાવી હતી અને કેટલા સમયથી તેનું વેચાણ કરી રહી હતી તે સહિતની દિશામાં તપાસ શરૂ કરી છે.
9879405838

આ પ્રકારના તમામ સમાચાર માટેે App ડાઉનલોડ કરો.