બંગાળમાં 10 વર્ષની બાળકીની લાશ મળી:પરિવારે કહ્યું- દુષ્કર્મ બાદ હત્યા થઈ; ટોળાએ પોલીસ સ્ટેશનમાં આગ ચાંપી, અધિકારીઓને બંધક બનાવવાનો પ્રયાસ કર્યો

પશ્ચિમ બંગાળના સાઉથ 24 પરગણાંમાં આજે સવારે 10 વર્ષની બાળકીનો મૃતદેહ મળ્યો છે. પરિવારે દાવો કર્યો છે કે બાળકીની બળાત્કાર બાદ હત્યા કરવામાં આવી છે. આ ઘટના કૃપાખાલી વિસ્તારના કુલટાલી પોલીસ સ્ટેશન વિસ્તારમાં બની છે. સ્થાનિક લોકોનું કહેવું છે કે બાળકી 4 ઓક્ટોબરની સાંજથી ગુમ હતી, પરંતુ પોલીસે કાર્યવાહી કરવામાં વિલંબ કર્યો. ઘટનાના વિરોધમાં લોકોએ મહિસ્મારી પોલીસ સ્ટેશનમાં આગ ચાંપી દીધી. ટોળાએ પોલીસ પર પથ્થરમારો કર્યો હતો. એક પોલીસ અધિકારીએ જણાવ્યું હતું કે લોકોએ સ્ટેશનની બહાર પાર્ક કરાયેલાં અનેક વાહનોમાં તોડફોડ પણ કરી છે. લોકોનો રોષ જોઈને પોલીસકર્મીઓ પોલીસ સ્ટેશન છોડીને ભાગી ગયા. આ પછી વિસ્તારમાં ભારે પોલીસ ફોર્સ તહેનાત કરવામાં આવી. પોલીસે ભીડને કાબૂમાં લેવા માટે ટિયરગેસના શેલ છોડ્યા. લોકોએ ઘટનાસ્થળે SDPO અને અન્ય પોલીસકર્મીઓને બંધક બનાવવાનો પણ પ્રયાસ કર્યો. કુલટાલી ગણેશમંડળના TMC ધારાસભ્ય ગામલોકોને શાંત કરવા સ્થળ પર ગયા, પરંતુ લોકોએ તેમને પણ પીછો કર્યો. તેમણે બાદમાં મીડિયાને કહ્યું હતું કે તે લોકોના ગુસ્સાને સમજે છે, પરંતુ તેમણે કાયદો હાથમાં ન લેવો જોઈએ. પોલીસચોકીમાં આગચંપી અને તોડફોડની તસવીરો... લોકોએ કહ્યું- પોલીસે કોલકાતા રેપ-મર્ડર કેસ જેવું વલણ બતાવ્યું
એક સ્થાનિક વ્યક્તિએ દાવો કર્યો કે 4 ઓક્ટોબરે છોકરી ગુમ થયા બાદ પરિવારે મહિસ્મારી પોલીસ સ્ટેશનમાં FIR નોંધાવી હતી. જોકે પોલીસે ફરિયાદ પર તાત્કાલિક પગલાં લીધાં નહોતાં, પોલીસનું વલણ કોલકાતા પોલીસના વલણ જેવું જ હતું જ્યારે આરજી કાર હોસ્પિટલમાં તાલીમાર્થી ડોક્ટરની બળાત્કાર-હત્યા બાદ લાશ મળી આવી હતી. લોકોએ કહ્યું હતું કે જ્યાં સુધી અમારી દીકરી પર બળાત્કાર અને હત્યાના તમામ આરોપીઓને સજા નહીં મળે ત્યાં સુધી અમે અમારું આંદોલન ચાલુ રાખીશું. પગલાં લેવામાં વિલંબ કરનારા તેમના અધિકારીઓ સામે પણ પગલાં લેવા જોઈએ. જો પોલીસે તાત્કાલિક કાર્યવાહી કરી હોત તો બાળકીને બચાવી શકાઈ હોત. પોલીસે કહ્યું- FIR નોંધાયા બાદ તરત જ કાર્યવાહી કરી, એક આરોપીની ધરપકડ
બીજી તરફ, પોલીસે જણાવ્યું હતું કે ફરિયાદ મળતાં જ તેમણે કાર્યવાહી કરી હતી. પોલીસના જણાવ્યા અનુસાર, FIR શુક્રવારે રાત્રે 9 વાગ્યે નોંધવામાં આવી હતી. આ પછી પોલીસ એક્શનમાં આવી ગઈ હતી અને પ્રાથમિક તપાસ બાદ આજે સવારે એક આરોપીની ધરપકડ કરી હતી. ભાજપે કહ્યું- આ કોલકાતા રેપ-મર્ડર જેવો મામલો છે, પોલીસે FIR દાખલ નથી કરી
ભાજપે આ ઘટના પર રાજ્યની ટીએમસી સરકારની ટીકા કરી છે. કેન્દ્રીય મંત્રી અને પશ્ચિમ બંગાળના બીજેપી અધ્યક્ષ સુકાંત મજુમદારે કહ્યું, 'કૃપાખાલીમાં ટ્યૂશનથી પરત ફરી રહેલી ચોથા ધોરણની છોકરી પર બળાત્કાર કરીને તેની હત્યા કરવામાં આવી. ગ્રામજનોએ નદીના પટમાંથી નાની બાળકીનો મૃતદેહ બહાર કાઢ્યો હતો. બંગાળનાં મુખ્યમંત્રી મમતા બેનર્જી મહિલાઓની સુરક્ષા કરવામાં સક્ષમ નથી. બંગાળની છોકરીઓ નવરાત્રિ દરમિયાન પણ સુરક્ષિત નથી. હું મમતા બેનર્જીને પૂછવા માગું છું કે તમારા કુશાસનમાં હજુ કેટલી બંગાળી છોકરીઓને આ દુર્દશાનો સામનો કરવો પડશે. બીજેપી ધારાસભ્ય અગ્નિમિત્રા પોલે કહ્યું, 'ગઈકાલે ટ્યૂશનથી પરત ફરી રહેલી 9 વર્ષની બાળકીનો મૃતદેહ આજે કેનાલમાં મળ્યો હતો. મમતા બેનર્જીની પોલીસે FIR નોંધી નથી. જેમણે બાળકીના શરીરને જોયું છે તેમના જણાવ્યા મુજબ, તેના શરીર પર અભયા (કોલકાતા ટ્રેઇની ડોક્ટર રેપ-મર્ડર)ના શરીર પર સમાન ઇજાઓ હતી. આ સ્થિતિમાં મૃતદેહને સાચવવો જોઈએ. પોસ્ટમોર્ટમ કેન્દ્ર સરકાર હેઠળની હોસ્પિટલમાં થવું જોઈએ. મેં છોકરીના પિતા સાથે વાત કરી અને તેઓ સંમત થયા કે લાશને સુરક્ષિત રાખવી જોઈએ. મુખ્યમંત્રીએ જવાબદારી લેવી જોઈએ, કારણ કે તે આરોપીઓને બચાવી રહી છે. અમે આરોપીઓને ફાંસીની સજા અને કેસની સીબીઆઈ તપાસની માગ કરીશું.

આ પ્રકારના તમામ સમાચાર માટેે App ડાઉનલોડ કરો.