બાંગ્લાદેશ હિંસામાં ગાયક રાહુલ આનંદનું ઘર સળગ્યું:140 વર્ષ જૂના ઘરમાં સ્થિત 3000 સંગીતનાં સાધનો પણ રાખ થઈ ગયા, ગાયક તેમના પરિવાર સાથે ભાગ્યો
બાંગ્લાદેશમાં ચાલી રહેલી હિંસા વચ્ચે શેખ હસીનાએ વડાપ્રધાન પદેથી રાજીનામું આપી દીધું છે અને પોતાનો જીવ બચાવવા દેશ છોડી દીધો છે. હિંસામાં અનેક લોકો માર્યા ગયા છે. દરમિયાન, સમાચાર છે કે કેટલાક બાંગ્લાદેશી તોફાનીઓએ ગાયક રાહુલ આનંદના 140 વર્ષ જૂના ઘરમાં ઘૂસીને પહેલાં બધું તોડી નાખ્યું અને પછી ઘરને આગ લગાવી દીધી. પોતાનો જીવ બચાવવા માટે સિંગરે પરિવાર સાથે ગુપ્ત જગ્યાએ આશ્રય લીધો છે. ડેઈલી સ્ટારના તાજેતરના સમાચાર અનુસાર, આગ લાગતા પહેલાં રાહુલ આનંદ ઘરમાંથી ભાગી ગયો હતો અને હવે તે સુરક્ષિત છે. હાલમાં હિંસામાં સામેલ એક ટોળું તેમના ઘરમાં ઘૂસી ગયું હતું. તેઓએ પહેલાં ગાયકના ઘરમાં તોડફોડ કરી અને પછી કિંમતી સામાનની લૂંટ કરી. ગાયક રાહુલ આનંદના 3000 સંગીતનાં સાધનો પણ બળીને રાખ થઈ ગયાં હતાં. ફ્રાન્સના રાષ્ટ્રપતિ 2023માં સ્વદેશ આવ્યા હતા
તમને જણાવી દઈએ કે ગાયક રાહુલ આનંદ જે ઘરમાં રહેતા હતા તે 140 વર્ષ જૂનું હતું. આ ઘર ઢાકા, ધનમંડીમાં આવેલું છે, જેને ફ્રાન્સના રાષ્ટ્રપતિ ઈમેન્યુઅલ મેક્રોન પણ વર્ષ 2023માં જોવા આવ્યા હતા. સિંગર લાંબા સમયથી આ ઘરમાં પોતાના પરિવાર સાથે ભાડા પર રહેતો હતો. રાહુલ આનંદ ગાયક હોવા ઉપરાંત સાંસ્કૃતિક કાર્યકર્તા પણ છે. તે મ્યુઝિકલ બેન્ડ જોલર ગાનનો મુખ્ય ગાયક છે. આ બેન્ડના એક સભ્યએ ડેઈલી સ્ટારને આપેલા ઈન્ટરવ્યુમાં જણાવ્યું છે કે ભીડ તેમના ઘરના મુખ્ય દ્વારથી પ્રવેશી હતી. જ્યારે સિંગર પર હુમલો કરવામાં આવ્યો ત્યારે તે ખૂબ જ ડરી ગયો હતો. પહેલાં ટોળાએ તેમના ઘરની તોડફોડ કરી અને પછી ફર્નિચર અને દરેક કિંમતી ચીજવસ્તુની લૂંટ કરી. ઘરમાં 3 હજાર સંગીતનાં સાધનો હતા, જેને તેમણે આગ લગાવી દીધી હતી. ભીડ જોઈને સિંગરે પોતાનો જીવ બચાવવા પરિવાર સાથે તરત જ ઘર છોડી દીધું અને પછી એક ગુપ્ત જગ્યાએ આશરો લીધો. થોડા સમય પહેલાં આ બેકાબૂ ભીડ બાંગ્લાદેશના પૂર્વ વડાપ્રધાન શેખ હસીનાના ઘરે પહોંચી હતી. પોતાનો જીવ બચાવવા શેખ હસીનાએ વડાપ્રધાન પદેથી રાજીનામું આપી દેશ છોડી દીધો હતો. બાંગ્લાદેશમાં હિંસાના ઘણા વીડિયો સોશિયલ મીડિયા પર સામે આવ્યા છે, જેમાં એક ટોળું શેખ હસીનાના ઘરમાંથી કિંમતી સામાન લૂંટતું જોવા મળ્યું હતું. બાંગ્લાદેશી હિંસામાં લઘુમતીઓને પણ સતત નિશાન બનાવવામાં આવી રહ્યા છે.
આ પ્રકારના તમામ સમાચાર માટેે
App ડાઉનલોડ કરો.