સુરતમાં રાજકીય રક્ષાબંધન પણ ઉમળકાભેર ઉજવાયું, કેન્દ્રીય મંત્રી દર્શના જરદોશે પ્રદેશ પ્રમુખ સી.આર.પાટીલને રાખડી બાંધી

- ગૃહમંત્રી હર્ષ સંઘવીને નગરસેવકોએ રાખડી બાંધીસુરત,તા.11 ઓગષ્ટ 2022,ગુરૂવારસુરતમાં આજે સુરતીઓના ઘરે ઘરે રક્ષાબંધનના તહેવાર સાથે રાજકીય રક્ષાબંધનની ઉજવણી પણ ઉમળકાભેર કરવામાં આવી હતી. સુરતમાં  નાના રાજકીય કાર્યકરો અને નેતાઓ સાથે સાથે મોટા નેતાઓએ પણ રાજકીય રક્ષાબંધનની ઉજવણી કરી હતી. રાજકારણમાં એક બીજાના હરીફ કહેવાતા દર્શના જરદોશે પ્રદેશ પ્રમુખ સી.આર.પાટીલને રાખડી બાંધી રક્ષાબંધનની ઉજવણી કરી હતી. સુરતના અનેક ઘરોમાં રક્ષાબંધનના તહેવારની ઉજવણી થઈ રહી છે તેની સાથે સાથે અનેક રાજકીય નેતાઓની ઓફિસ કે ઘર પર રક્ષાબંધનના કાર્યક્રમનું આયોજન કરવામાં આવ્યું હતું. પ્રદેશ પ્રમુખ સી.આર.પાટીલને અનેક બહેનોએ રાખડી બાંધી હતી તેઓને પાટીલે રાષ્ટ્રધ્વજની ભેટ આપવામાં આવી હતી. કેન્દ્રીય મંત્રી અને સુરતના સાંસદ દર્શના જરદોશે ભાજપ પ્રદેશ પ્રમુખ સી.આર.પાટીલને રાખડી બાંધી હતી. તેઓએ કહ્યું હતું કે રાજકીય જીવનમા આવ્યા ત્યારથી તેઓ પાટીલને ભાઈ માને છે અને રાખડી બાંધે છે. આ ઉપરાંત ગુજરાત રાજ્યના ગૃહ મંત્રી હર્ષ સંધવીના કાર્યાલય પર મહિલા નગર સેવકો રાખડી બાંધવા ગયા હતા. તેઓએ હર્ષ સંઘવીને રાખડી બાંધીને તેમના આયુષ્યની પ્રાર્થના કરવા સાથે રાજકારણમાં પ્રગતિ કરે તેવી શુભેચ્છા વ્યક્ત કરી હતી. આ મોટા રાજકીય નેતાઓ ઉપરાંત અનેક નાના રાજકીય નેતાઓ અને કાર્યકરોએ તેમના રાજકારણી બહેનો પાસે રાખડી બંધાવી હતી. 

આ પ્રકારના તમામ સમાચાર માટેે App ડાઉનલોડ કરો.