બેડી માર્કેટિંગ યાર્ડ પાસે હિટ એન્ડ રન: અજાણ્યાં વાહનની હડફેટે પગપાળા જતાં સફાઈ કામદારનું મોત
રાજકોટની ભાગોળે આવેલ બેડી માર્કેટિંગ યાર્ડ પાસે હિટ એન્ડ રનનો બનાવ સામે આવ્યો હતો. પુરપાટ ઝડપે આવતાં અજાણ્યાં વાહનના ચાલકે પગપાળા જતાં મારવાડી કોલેજના સફાઈ કામદારને હડફેટે લઈ નાસી છૂટ્યો હતો. યુવાનને ઇજાગ્રસ્ત હાલતમાં સારવારમાં ખસેડાયા હતાં. પરંતુ ટૂંકી સારવારમાં તેમનું મોત નિપજતાં પરિવારમાં અરેરાટી વ્યાપી ગઈ હતી.
પ્રાપ્ત વિગત મુજબ, બેડી ગામમાં રહેતાં સુરેશભાઈ નથુભાઈ ચાવડા (ઉ.વ.35) મારવાડી કોલેજમાં સફાઈ કામદાર તરીકે નોકરી કરે છે. ગઈકાલે સાંજના સમયે તે કોલેજમાંથી એક કલાકની રજા લઈ પોતાના ઘરે કામ અર્થે આવતાં હતાં ત્યારે તેઓ મોરબી રોડ પર બેડી માર્કેટિંગ પાસે ચાલીને જતાં હતાં ત્યારે પાછળથી પૂરપાટ ઝડપે આવેલા અજાણ્યાં વાહનના ચાલકે હડફેટે લેતાં તેઓ રોડ પર દૂર પટકાયા હતાં. જ્યારે અકસ્માત સર્જી અજાણ્યો વાહન ચાલક નાસી છૂટ્યો હતો.
બાદમાં રોડ પર ઇજાગ્રસ્ત હાલતમાં પડેલ યુવકને સારવારમાં સિવિલ હોસ્પિટલમાં ખસેડવામાં આવ્યા હતાં. પરંતુ સારવાર કારગત ન નિવડતાં તેમનું મોત નીપજ્યું હતું. બનાવ અંગે સિવિલ ચોકીના સ્ટાફે કુવાડવા રોડ પોલીસને જાણ કરતાં સ્ટાફ દોડી આવ્યો હતો અને જરૂરી કાર્યવાહી કરી મૃતદેહને પીએમમાં ખસેડી અકસ્માત સર્જી નાસી છૂટનાર અજાણ્યાં વાહન ચાલક સામે ગુનો નોંધવા તજવીજ હાથ ધરી હતી.
વધુમાં મૃતક બે ભાઈ- એક બહેનમાં મોટા હતાં અને તેમના છૂટાછેડા થઈ ગયેલ હતાં. બનાવથી પરિવારમાં કાળો કલ્પાંત છવાયો હતો.
9879405838
આ પ્રકારના તમામ સમાચાર માટેે
App ડાઉનલોડ કરો.