7 વર્ષમાં ભારત વિશ્વની ત્રીજી સૌથી મોટી અર્થવ્યવસ્થા બનશે

આગામી 7 વર્ષમાં ભારત વિશ્વની ત્રીજી સૌથી મોટી અર્થવ્યવસ્થા બની શકે છે. સ્ટેટ બેંક ઓફ ઈન્ડિયા એ પોતાના એક રિસર્ચ પેપરમાં આ દાવો કર્યો છે.
ભારત અત્યારે વિશ્વની પાંચમી સૌથી મોટી અર્થવ્યવસ્થા છે. ભારતે બ્રિટનને હરાવીને પાંચમું સ્થાન મેળવ્યું છે. એસબીઆઈના રિસર્ચ પેપર મુજબ, ભારત 2014થી મોટા માળખાકીય પરિવર્તનમાંથી પસાર થયું છે અને હવે આ તબક્કે છે. ડિસેમ્બર 2021ની શરૂઆતમાં ભારતે બ્રિટનને પાછળ છોડીને વિશ્વની પાંચમી સૌથી મોટી અર્થવ્યવસ્થા બની હતી.
દેશના ખૂણે ખૂણે લોકોને બેંકિંગ સુવિધા પૂરી પાડવા સરકાર પ્રયત્નશીલ છે. આ હેઠળ, જાહેર ક્ષેત્રની બેંકો નાણાકીય સમાવેશ અભિયાન હેઠળ વિવિધ રાજ્યોના ગ્રામીણ વિસ્તારોમાં ડિસેમ્બર 2022 સુધીમાં લગભગ 300 શાખાઓ ખોલશે, જ્યાં બેંકિંગ સેવા હજુ સુધી પહોંચી નથી. આ શાખાઓ એવા ગામોમાં ખોલવામાં આવશે, જ્યાં વસ્તી 3,000 થી વધુ છે. સૂત્રો પાસેથી મળેલી માહિતીના આધારે, એવું કહેવામાં આવ્યું હતું કે જે ગામો અત્યાર સુધી બેંકિંગ સેવાથી અળગા રહ્યા છે ત્યાં નવી શાખાઓ ખોલવામાં આવશે. રાજસ્થાનમાં સૌથી વધુ 95 શાખાઓ અને મધ્યપ્રદેશમાં 54 શાખાઓ ખોલવામાં આવશે. ગુજરાતમાં જાહેર ક્ષેત્રની બેંકોની 38, મહારાષ્ટ્રમાં 33, ઝારખંડમાં 32 અને યુપીમાં 31 શાખાઓ ખોલવામાં આવશે. બેંક ઓફ બરોડા આ વિસ્તારોમાં 76 શાખાઓ અને સ્ટેટ બેંક ઓફ ઈન્ડિયા 60 શાખાઓ ખોલશે. બીજી તરફ, સરકાર આઇડીબીઆઈ બેંકમાં તેનો હિસ્સો વેચવાની યોજના ધરાવે છે. આ માટે સપ્ટેમ્બરના અંત સુધી બિડ મંગાવી શકાય છે. સૂત્રોના જણાવ્યા અનુસાર આ અંગે આરબીઆઈ સાથે વાતચીત અંતિમ તબક્કામાં છે.
સ્ટેટ બેંક ઓફ ઈન્ડિયાના ઈકોનોમિક રિસર્ચ ડિપાર્ટમેન્ટના રિપોર્ટમાં જણાવવામાં આવ્યું છે કે વૈશ્વિક સ્તરે ભારતની ગ્રોસ ડોમેસ્ટિક પ્રોડક્ટ એટલે કે જીડીપીનો હિસ્સો હાલમાં 3.5 ટકા છે. વર્ષ 2014માં તે 2.6 ટકા હતો. 2027 સુધીમાં તે 4 ટકા થઈ શકે છે. હાલમાં વૈશ્વિક જીડીપીમાં જર્મનીનો હિસ્સો 4 ટકા છે.
2014થી ભારતે અપનાવેલ માર્ગ દર્શાવે છે કે દેશે અર્થવ્યવસ્થાના મોરચે પ્રગતિ કરી છે. આ કારણે એવી શક્યતા છે કે વર્ષ 2029માં ભારતને ત્રીજી સૌથી મોટી અર્થવ્યવસ્થાનો ટેગ મળી જશે. 2014માં ભારત વિશ્વના અર્થતંત્રમાં 10મા ક્રમે હતું. ત્યારથી, ભારત આઠ વર્ષમાં પાંચ સ્થાન ચઢ્યું છે.
ચાલુ વર્ષે ભારતના અર્થતંત્રની આગળ વધવાની ગતિ સૌથી વધુ રહેવાનો અંદાજ
રિપોર્ટ અનુસાર, ભારતે 2027માં જર્મનીથી આગળ નીકળી જશે અને વર્તમાન વૃદ્ધિ દરે 2029 સુધીમાં જાપાનને પાછળ છોડી દેવાની સંભાવના છે. આ અઠવાડિયે જાહેર કરાયેલા પ્રથમ ક્વાર્ટરના જીડીપી ડેટા અનુસાર, ભારતીય અર્થતંત્ર જૂન 2022 ના ત્રિમાસિક ગાળામાં 13.5 ટકાના દરે વૃદ્ધિ પામ્યું હતું. રિપોર્ટ અનુસાર, ચાલુ નાણાકીય વર્ષમાં ભારતીય અર્થવ્યવસ્થા સૌથી ઝડપી ગતિએ આગળ વધે તેવી શક્યતા છે.
રસપ્રદ વાત એ છે કે, નાણાકીય વર્ષ 2023 માટે ભારતનો જીડીપી વૃદ્ધિ દર હાલમાં 6.7 ટકાથી 7.7 ટકા રહેવાનો અંદાજ છે. રિપોર્ટમાં કહેવામાં આવ્યું છે કે વિશ્વની અનિશ્ચિતતાઓ વચ્ચે અમે માનીએ છીએ કે 6 ટકાથી 6.5 ટકા વૃદ્ધિ ભારતીય અર્થતંત્ર માટે ’ સામાન્ય’ છે. રિપોર્ટમાં કહેવામાં આવ્યું છે કે આગામી દિવસોમાં ભારતને અર્થવ્યવસ્થાના મોરચે લાભ મળવાની સંભાવના છે. કારણ કે ચીન નવા રોકાણની બાબતમાં ધીમી ગતિએ રહ્યું છે.
ભારત અને બ્રિટનની અર્થવ્યવસ્થાને ડોલરમાં જોઈએ તો આઈએમએફના આંકડા મુજબ માર્ચ ક્વાર્ટરમાં ભારતની અર્થવ્યવસ્થા 854.7 બિલિયન ડોલર હતી. તે જ સમયે, યુકેનું અર્થતંત્ર816 બિલિયન ડોલર હતું. આંકડા દર્શાવે છે કે ભલે વિશ્વભરની અર્થવ્યવસ્થાઓ મંદી અને મોંઘવારીની અસરથી પરેશાન છે, પરંતુ ભારતીય અર્થવ્યવસ્થા તમામ પડકારો વચ્ચે પણ ઝડપી ગતિએ આગળ વધી રહી છે.

આ પ્રકારના તમામ સમાચાર માટેે App ડાઉનલોડ કરો.