રક્ષા મંત્રી-સેના પ્રમુખે આસામમાં જવાનો સાથે દિવાળી મનાવી:સૈનિકોએ LOC-અટારી બોર્ડર પર મીઠાઈઓ વહેંચી, ફટાકડા ફોડ્યા; એર ચીફ માર્શલ જમ્મુ-કાશ્મીર પહોંચ્યા

​​​​​​કેન્દ્રીય રક્ષા મંત્રી રાજનાથ સિંહ અને આર્મી ચીફ જનરલ ઉપેન્દ્ર દ્વિવેદી બુધવારે સાંજે આસામના તેજપુર પહોંચ્યા હતા. અહીં તેમણે દિવાળીની ઉજવણી કરી અને મેઘના સ્ટેડિયમમાં સેનાના જવાનો સાથે ડિનર કર્યુ હતું. LOC અને અટારી બોર્ડર પર, પુરૂષ-મહિલા સૈનિકોએ મીઠાઈઓ વહેંચી, મીણબત્તીઓ પ્રગટાવી અને ફટાકડા ફોડ્યા હતા. LOC પર દિવાળી પર જવાનોએ જોરશોરથી ડાન્સ પણ કર્યો હતો. આ દરમિયાન ભારતીય વાયુસેનાના વડા એર ચીફ માર્શલ એપી સિંહ જમ્મુ-કાશ્મીર પહોંચ્યા હતા. તેઓ જવાનોને મળ્યા અને તેમને દિવાળીની શુભેચ્છા પાઠવી અને તેમની સાથે નાસ્તો કર્યો હતો. આ સિવાય સીડીએસ જનરલ અનિલ ચૌહાણ પોર્ટ બ્લેયર, આંદામાન અને નિકોબારમાં તહેનાત જવાનો સાથે દિવાળીની ઉજવણી કરી રહ્યા છે. નૌકાદળના વડા એડમિરલ દિનેશ ત્રિપાઠી ગુજરાતના પોરબંદરમાં નૌકાદળના જવાનો સાથે તહેવારની ઉજવણી કરી રહ્યા છે. પીએમ મોદી દર વર્ષે સેના સાથે દિવાળીની ઉજવણી કરતા હતા. આ વખતે તેઓ દિવાળી પર ગુજરાતના પ્રવાસે છે. આવી સ્થિતિમાં ત્રણેય સેના પ્રમુખ અને સીડીએસ અલગ-અલગ જગ્યાએ પહોંચ્યા અને જવાનો સાથે દિવાળી મનાવી. જવાનોની દિવાળીની ઉજવણીની તસવીરો... રાજનાથે તેજપુરમાં કહ્યું- તવાંગ જવું હતું પરંતુ ભગવાને તેમને અહીં મોકલ્યા રાજનાથ સિંહે પોતાના સંબોધનમાં કહ્યું કે હું મારી જાતને ભાગ્યશાળી માનું છું કે મને દિવાળીના પર્વ પર તમારી (સૈનિકો) વચ્ચે આવવાની તક મળી. મારે આજે અરુણાચલના તવાંગમાં જવાનું હતું. સૈનિકો સાથે ભોજન પણ કરવાનું હતું, પણ કદાચ ભગવાનને આ મંજૂર ન હતું. તેઓ ઇચ્છતા હતા કે હું તેજપુરમાં બહાદુર સૈનિકો સાથે ડિનરમાં હાજરી આપું. તેમણે કહ્યું કે કોઈપણ તહેવારની ખુશી ત્યારે વધી જાય છે જ્યારે તે પરિવાર સાથે ઉજવવામાં આવે. જેટલો મોટો પરિવાર, તેટલી મોટી ખુશી. તેથી હું મારા મોટા પરિવાર, મારા સશસ્ત્ર દળોના પરિવાર સાથે દિવાળી ઉજવવાનો પ્રયાસ કરું છું. તેથી જ હું આ વર્ષે તેજપુરમાં તમારી સાથે દિવાળીની ઉજવણી કરી રહ્યો છું. LAC પર જમીની સ્થિતિને ઉકેલવા માટે સર્વસંમતિ સધાઈ
રાજનાથ સિંહે કહ્યું કે તમે જાણો છો કે LAC પર સરહદ સંબંધિત એક મોટી ઘટના બની છે. એલએસી પરના કેટલાક વિસ્તારોને લઈને ભારત અને ચીન વચ્ચેના સંઘર્ષને ઉકેલવા માટે લાંબા સમયથી રાજદ્વારી અને સૈન્ય સ્તરે વાતચીત ચાલી રહી હતી. તેમણે કહ્યું કે અમારા પ્રયાસો બાદ અમે LAC પર સ્થિતિને ઉકેલવા માટે સર્વસંમતિ પર પહોંચ્યા અને અમે તેમાં સફળ રહ્યા. આ ખરેખર એક મોટી ઘટના છે. હું ભારપૂર્વક દાવો કરી શકું છું કે તમારી હિંમત અને શિસ્તના કારણે અમે આ સફળતા મેળવી છે. રક્ષા મંત્રીએ કહ્યું કે હું કહેવા માંગુ છું કે ચીન સાથે પરસ્પર વાતચીત શક્ય બની છે કારણ કે તમારી (સેનાની) બહાદુરી દરેકે અનુભવી છે. અમે સર્વસંમતિ દ્વારા શાંતિ પુનઃસ્થાપિત કરવાનું ચાલુ રાખવા માંગીએ છીએ. અમે અમારા મિત્રોને બદલી શકીએ છીએ, પરંતુ અમારા પડોશીઓ નહીં
રાજનાથ સિંહે કહ્યું કે પૂર્વ પીએમ અટલ બિહારી વાજપેયી કહેતા હતા કે આપણે ધ્યાનમાં રાખવું જોઈએ કે આપણે આપણા મિત્રો બદલી શકીએ છીએ, પરંતુ પાડોશીઓ નહીં. અમે અમારા પડોશીઓ સાથે સારા સંબંધો રાખવા માંગીએ છીએ. આ ભારતની સ્પષ્ટ નીતિ છે. તેમણે કહ્યું કે કેટલીકવાર એવી સ્થિતિ સર્જાય છે કે આપણે આપણી સરહદની સુરક્ષા માટે લડવું પડે છે. આપણા સશસ્ત્ર દળોના હિતોને ધ્યાનમાં રાખીને, સરકારે શાંતિ પુનઃસ્થાપિત કરવા માટે તમામ શક્ય પ્રયાસો કરવાનો પ્રયાસ કર્યો છે. તસવીરોમાં જુઓ પીએમ મોદીની છેલ્લી દિવાળીની ઉજવણી... વર્ષ 2023: PM મોદીએ સૈનિકો સાથે 10મી દિવાળી, કહ્યું- જ્યાં ભારતીય સેના છે, તે જગ્યા મંદિરથી ઓછી નથી વડાપ્રધાન નરેન્દ્ર મોદીએ વર્ષ 2023માં સતત 10મા વર્ષે જવાનો સાથે દિવાળીની ઉજવણી કરી હતી. તે હિમાચલના લેપચા પહોંચ્યા હતા. લાહૌલ-સ્પીતિ જિલ્લામાં સ્થિત લેપચા ચેકપોસ્ટ ચીનની સરહદથી લગભગ 2 કિલોમીટરની ઉંચાઈ પર આવેલું છે. ઈન્ડો-તિબેટીયન બોર્ડર પોલીસ (ITBP) અને આર્મીના જવાનો આ પોસ્ટમાં ફ્રન્ટલાઈન પર તહેનાત છે. લેપચા પહોંચ્યા બાદ પીએમ મોદીએ X પોસ્ટમાં લખ્યું હતું - હું હિમાચલ પ્રદેશના લેપચામાં બહાદુર જવાનો સાથે દિવાળી મનાવવા આવ્યો છું. અહીં તેમણે કહ્યું કે જ્યાં ભારતીય સેના તહેનાત છે તે જગ્યા કોઈ મંદિરથી ઓછી નથી. લેપચા ચેકપોસ્ટથી નીચેની તરફ એક ચીની ગામ છે. અહીં ચીનના સૈનિકો તહેનાત છે. હિમાચલ પ્રદેશ ચીન સાથે 260 કિલોમીટર લાંબી સરહદ ધરાવે છે. તેમાંથી 140 કિમી કિન્નૌરમાં અને 80 કિમી લાહૌલ-સ્પીતિ જિલ્લામાં છે. અહીં ચીનની સરહદ પર ભારતની 20 ચોકીઓ છે. સૈનિકો સાથે દિવાળી મનાવતા મોદીની તસવીર...

આ પ્રકારના તમામ સમાચાર માટેે App ડાઉનલોડ કરો.