અંકલેશ્વરમાં કારને આંતર્યા બાદ રૃા.૯ લાખ ભરેલી બેગની ઉઠાંતરી

અંકલેશ્વર તા.૯ અંકલેશ્વર ખાતે આજે સમી સાંજે એક કારચાલક સાથે અકસ્માત કેમ કર્યો તેમ જણાવી બે બાઈક સવારો પૈકી એકે રૃા.૯ લાખ ભરેલી બેગની ઉઠાંતરી કરી હતી.આજે સમી સાંજે કારચાલક રાજેશભાઈ ગોઠીને આંતરી તેને વાતોમાં ભેરવી કારની સીટ પર પડેલ રૃા.૯ લાખ ભરેલી બેગની ઉઠાંતરી કરી બે ઈસમો ફરાર થઇ ગયા હતા. રાજેશભાઇ ડીસીબી બેન્કમાંથી રૃા.૯ લાખ ઉપાડી બ્રીઝા કાર  લઈને સિલ્વર પ્લાઝા ખાતે આંગડિયા પેઢીમાં પૈસા આપવા ગયો હતો પરંતુ આંગડિયા પેઢી બંધ હોવાથી તે પૈસા લઇ રાજપીપલા ચોકડી થઇ જીતાલી જકાતનાકા પાસે કાર સ્પાની સામે પહોંચ્યો હતો.આ વખતે બાઈક ઉપર આવેલ બે ઈસમોએ કાર ઉભી રખાવી હતી અને એક બાઇક સવારે વાતોમાં ભેરવ્યો હતો અને કેમ અકસ્માત કર્યો તેમ જણાવ્યુ હતું દરમિયાન બીજો બાઈક સવાર કારમાં મૂકેલી રૃા.૯ લાખ ભરેલ બેગ ઉપાડી ફરાર થઇ ગયો હતો. બનાવ અંગે રાજેશભાઇએ પોલીસ કંટ્રોલ રૃમમાં જાણ કરી હતી જેના પગલે પોલીસ કાફલો ઘટનાસ્થળે દોડી ગયો હતો અને તપાસ હાથ ધરી હતી. પોલીસે નાકાબંધી કરી તેમજ સીસીટીવીના આધારે બાઈક સવારોને ઝડપી પાડવાની કવાયત હાથ ધરી છે.

આ પ્રકારના તમામ સમાચાર માટેે App ડાઉનલોડ કરો.