ક્રૂડ ઓઈલના નિકાસકારોને સરકારે આપી રાહત, વિન્ડફોલ ટેક્સમાં 2800 રૂપિયા પ્રતિ ટનનો કર્યો ઘટાડો

આંતરરાષ્ટ્રીય બજારમાં ક્રૂડ ઓઈલના ભાવમાં ઘટાડા વચ્ચે સરકારે ક્રૂડ ઓઈલની નિકાસ પરનો વિન્ડફોલ ટેક્સ (ડ્યુટી) 13,300 રૂપિયાથી ઘટાડીને 10,500 રૂપિયા પ્રતિ ટન કર્યો છે. આ સિવાય ડીઝલ પર લાગુ નિકાસ ડ્યૂટી ઘટાડીને 5 રૂપિયા પ્રતિ લીટર કરવામાં આવી છે. જણાવી દઈએ કે, પહેલા તે 7 રૂપિયા પ્રતિ લીટરથી વધારીને 13.50 રૂપિયા પ્રતિ લીટર કરવામાં આવ્યો હતો. 1 સપ્ટેમ્બરના રોજ એટીએફ એટલે કે એરપ્લેન ફ્યુઅલ પર નિકાસ ડ્યૂટી 7 રૂપિયા પ્રતિ લિટરથી વધારીને 9 રૂપિયા પ્રતિ લિટર કરવામાં આવી હતી. તે હાલ પૂરતું જાળવી રાખવામાં આવ્યું છે. સરકાર દ્વારા જારી કરાયેલા નવા દરો 17 સપ્ટેમ્બરની મધરાતથી અમલમાં આવ્યા છે.

1 જુલાઈથી લાગુ કરવામાં આવ્યો હતો વિન્ડફોલ ટેક્સ

નોંધનીય છે કે, સરકાર દર 15 દિવસે વિન્ડફોલ ટેક્સની સમીક્ષા કરે છે. 1 જુલાઈના રોજ, સરકારે પેટ્રોલ અને ATF પર પ્રતિ લિટર રૂ. 6 જ્યારે ડીઝલ પર રૂ. 13 પ્રતિ લિટર વિન્ડફોલ ટેક્સ (ડ્યુટી) વસૂલવાનો નિર્ણય કર્યો હતો. ત્યારે સરકાર દ્વારા એવું કહેવામાં આવ્યું હતું કે દર પખવાડિયે તેની સમીક્ષા કરવામાં આવશે.

20 જુલાઈના રોજ નાબૂદ કરવામાં આવી હતી પેટ્રોલ પરની નિકાસ ડ્યુટી

20 જુલાઈના રોજ સરકારે પેટ્રોલની નિકાસ પર પ્રતિ લિટર 6 રૂપિયાની નિકાસ જકાત નાબૂદ કરી હતી. બીજી તરફ, ડીઝલ અને એટીએફ પરની નિકાસ ડ્યૂટી અનુક્રમે રૂ. 2 ઘટીને રૂ. 11 અને રૂ. 4 પ્રતિ લિટર કરવામાં આવી હતી. આ સમયગાળા દરમિયાન, સ્થાનિક રીતે ઉત્પાદિત ક્રૂડ ઓઇલ પરનો ટેક્સ પણ 23,250 રૂપિયા પ્રતિ ટનથી ઘટાડીને 17,000 રૂપિયા પ્રતિ ટન કરવામાં આવ્યો હતો.

ડીઝલની નિકાસ પરની ડ્યુટી 2 ઓગસ્ટે પ્રતિ લિટર 5 રૂપિયા ઘટાડાઈ

2 ઓગસ્ટે કેન્દ્ર સરકારે ડીઝલની નિકાસ પરનો વિન્ડફોલ ટેક્સ 11 રૂપિયાથી ઘટાડીને 5 રૂપિયા પ્રતિ લિટર કર્યો હતો. બીજી તરફ, ATF પર તેને નાબૂદ કરવાનો નિર્ણય લેવામાં આવ્યો હતો. તેવી જ રીતે પેટ્રોલની નિકાસ પરની ડ્યુટી શૂન્ય રાખવાનો નિર્ણય લેવાયો હતો. તે જ દિવસે દેશમાં ઉત્પાદિત ક્રૂડ ઓઈલ પર વિન્ડફોલ ટેક્સ 17,000 રૂપિયા પ્રતિ ટનથી વધારીને 17,750 રૂપિયા પ્રતિ ટન કરવામાં આવ્યો હતો.

આ પ્રકારના તમામ સમાચાર માટેે App ડાઉનલોડ કરો.