‘તમે સત્તાવાર રીતે નામ બદલી નાખો’- સ્પીકર જગદીપ ધનખડ:‘તમે લોકોએ આ નવું નાટક શરૂ કર્યું છે, મારું મોઢું ના ખોલાવો’, અમિતાભનું નામ ઉમેરાતાં જયા બચ્ચન ભડક્યાં

અભિનેત્રી અને રાજનેતા જયા બચ્ચન સંસદમાં પોતાનાં નિવેદનોને કારણે સતત ચર્ચામાં રહે છે. તાજેતરમાં સંસદમાં રાજ્યસભાના ઉપાધ્યક્ષ હરિવંશ નારાયણ સિંહે તેમને જયા અમિતાભ બચ્ચન તરીકે બોલાવ્યાં હતાં, જેનાથી અભિનેત્રી ગુસ્સે થઈ ગઈ હતી. હવે જયા બચ્ચને અમિતાભ બચ્ચનનું નામ ફરીથી સંસદમાં ઉમેરવા પર નારાજગી વ્યક્ત કરી છે. સોમવારે રાજ્યસભામાં સ્પીકર જગદીપ ધનખડે ફરીથી જયા બચ્ચનને ‘શ્રીમતી જયા અમિતાભ બચ્ચન’ તરીકે સંબોધિત કર્યાં હતાં. આના પર પીઢ અભિનેત્રી ગુસ્સે થઈ ગઈ અને તેમને પૂછ્યું, ‘સર, શું તમે અમિતાભનો અર્થ જાણો છો?’ તેના પર અધ્યક્ષ જગદીપ ધનખડે વળતો જવાબ આપતાં કહ્યું કે, તો નામ બદલી નાખો, તો હું તમને પ્રોસેસ સમજાવીશ. આ અંગે અભિનેત્રીએ કહ્યું, ‘મને મારાં લગ્ન અને મારા પતિની સફળતા પર ગર્વ છે.’ જયાના જવાબ પર, અધ્યક્ષે ફરીથી કહ્યું, માનનીય સભ્યો, ચૂંટણી પ્રમાણપત્રમાં જે નામ હોય છે અને જે અહીં સબમિટ કરવામાં આવે છે તેના માટે બદલવાની પ્રક્રિયા છે. મેં પોતે 1989માં આ ફેરફારનો લાભ લીધો હતો. પરિવર્તનની પ્રક્રિયા દરેક સભ્ય માટે છે. આના પર જયા બચ્ચને તેમને અટકાવ્યાં અને કહ્યું, ‘ના સર, મને મારા નામ, મારા પતિ અને તેમની ઉપલબ્ધિઓ પર ગર્વ છે. આ આભાનું મહત્ત્વ છે, જે ભૂંસી શકાતું નથી. હું બહુ ખુશ છું.’ જ્યારે જયા બચ્ચને અટકાવ્યા તો અધ્યક્ષ તેમને શાંત પાડતા રહ્યા, પરંતુ તેઓ અટક્યા નહીં અને આગળ કહ્યું, ‘તમે લોકોએ એક નવું નાટક શરૂ કર્યું છે. પહેલાં આવું નહોતું થતું, મારું મોં ના ખોલાવો.’ આગળના અધ્યક્ષ જગદીપ ધનખડ સભાને સંબોધતા હતા, હું તમને કહેવા માગું છું, થોડા વર્ષ પહેલાં હું ફ્રાન્સ ગયો હતો, ત્યાંના નોર્મન્ડીમાં હું એક હોટેલમાં ગયો હતો. ત્યાંની સીડી પરની લોબીમાં વિશ્વના ગ્લોબલ આઇકન્સની તસવીરો લટકાવવામાં આવી હતી. ત્યાં રહેલી તસવીરોમાં અમિતાભ બચ્ચનનો ફોટો પણ હતો. આ 2004ની વાત છે. તો મેડમ, આખા દેશને તેમના પર ગર્વ છે.’ જ્યારે અધ્યક્ષે મનોહર લાલ ખટ્ટરનું નામ આગળ લીધું ત્યારે પણ જયા બચ્ચને તેમને અટકાવ્યાં અને કહ્યું, ‘સાહેબ, તેમના નામની આગળ તેમની પત્નીનું નામ ઉમેરો.’ જયાના આ શબ્દો સાંભળીને અધ્યક્ષ હસી પડ્યા. તેના પર અભિનેત્રીએ આગળ કહ્યું કે, ‘હું તેની વિરુદ્ધ નથી, પરંતુ તે ખોટું છે.’ આ પહેલા પણ જયા બચ્ચનને અમિતાભનું નામ સામેલ કરવા પર ગુસ્સો આવ્યો હતો.
થોડા દિવસ અગાઉ રાજ્યસભાના ઉપાધ્યક્ષ હરિવંશ નારાયણ સિંહે ગૃહમાં જયા બચ્ચનને 'શ્રીમતી જયા અમિતાભ બચ્ચન જી' કહીને સંબોધ્યાં હતાં. આના પર જયા ગૃહમાં ડેપ્યુટી સ્પીકર પર ગુસ્સે થઈ ગયાં. તેમણે કહ્યું- ‘સર, જયા બચ્ચન જ કહ્યું હોત તો પણ પૂરતું હતું.’ જેના જવાબમાં રાજયસભાના ઉપાધ્યક્ષે કહ્યું કે, 'મારી પાસે રહેલા ડોક્યુમેન્ટ્સમાં જયા અમિતાભ બચ્ચન લખેલું છે, માટે મેં તમને તે નામથી સંબોધિત કર્યાં.' જયાનું નિવેદન સામે આવ્યા બાદ તેનો વીડિયો સોશિયલ મીડિયા પર વાઇરલ થયો હતો. ત્યારથી, ટ્રોલર્સ તેમને સતત ટ્રોલ કરી રહ્યા છે. જયા બચ્ચન છેલ્લે ફિલ્મ 'રોકી ઔર રાની કી પ્રેમ કહાની'માં જોવા મળ્યાં હતાં, જેમાં રણવીર સિંહ અને આલિયા ભટ્ટ મુખ્ય ભૂમિકામાં હતાં. અભિનેત્રી હોવા ઉપરાંત જયા બચ્ચન સમાજવાદી પાર્ટીના સાંસદ છે.

આ પ્રકારના તમામ સમાચાર માટેે App ડાઉનલોડ કરો.