બેકાબૂ ટ્રકે ઠોકરે લેતા સાઇકલસવાર વૃદ્ધનું ઘટનાસ્થળે જ મોત નીપજ્યું

મોરબી રોડ પર બે અકસ્માતમાં બે પરિવારે મોભી ગુમાવ્યા

ગોડાઉનમાં કામ ​​​​​​​કરતા વૃદ્ધ પર રિવર્સમાં આવતી ટ્રકના વ્હિલ ફરી વળ્યા

શહેરમાં મોરબી રોડ પર બે સ્થળે અકસ્માતમાં પરિવારના મોભીનાં મોત નીપજતા તેના પરિવારમાં શોક છવાયો છે. બનાવને પગલે બી-ડિવિઝન પોલીસે બે ટ્રકચાલકની અટકાયત કરી તેની ધરપકડ કરી વધુ કાર્યવાહી કરી હતી.

પોલીસ સૂત્રોના જણાવ્યા મુજબ મોરબી રોડ પર જકાતનાકા પાસે ઉત્સવ સોસાયટીમાં રહેતા કેશુભાઇ ખોડાભાઇ ભેસાણિયા (ઉ.63) સાઇકલ લઇને જતા હતા ત્યારે મોરબી રોડ પર ઓવરબ્રિજ પાસે બેકાબૂ ટ્રકચાલકે ઠોકરે લેતા તેનું ઘટનાસ્થળે જ મોત નીપજ્યું હતું. બનાવને પગલે બી-ડિવિઝન પોલીસ મથકના જમાદાર હિતેશભાઇ કોઠીવાલ સહિતના સ્ટાફે મૃતદેહને પોસ્ટમોર્ટમ માટે સિવિલ હોસ્પિટલ ખસેડી તપાસ કરતા મૃતક વૃદ્ધ મોરબી રોડ પર પેટ્રોલ પંપમાં નોકરી કરતા હોય ઘરેથી સાઇકલ લઇને નોકરીએ જતા હતાને બનાવ બન્યો હોવાનું પરિવારે જણાવતા પોલીસે મૃતક વૃદ્ધના પુત્ર અશોકભાઇ કેશુભાઇ ભેસાણિયાની ફરિયાદ પરથી ટ્રકચાલક સામે ગુનો નોંધી આરોપીની અટકાયત કરી ધરપકડ કરવાની કાર્યવાહી કરી હતી.

જ્યારે બીજા બનાવમાં મોરબી રોડ પર રાજેશ ઓઇલ મિલમાં કામ કરતા અને મિલના ક્વાર્ટરમાં રહેતા અને મૂળ તામિલનાડુના મોરગન પરમાનંદભાઇ (ઉ.63) મિલ નજીક ગોડાઉન બહાર કામ કરતા હતા ત્યારે ગોડાઉનમાં માલ ઉતારવા આવેલી ટ્રક રિવર્સ લેતી વેળાએ વ્હિલ ફળી વળતા તેનું ઘટનાસ્થળે જ મોત નીપજતા બી-ડિવિઝન પોલીસ મથકના પીએસઆઇ એમ.આઇ. શેખ સહિતે પહોંચી કાર્યવાહી કરી હતી. પોલીસની તપાસમાં મૃતક વૃદ્ધ ઘણા સમયથી રાજકોટમાં મિલમાં નોકરી કરતા અને ત્યાં જ રહેતા હતા અને તેને સંતાનમાં ત્રણ પુત્ર અને એક પુત્રી હોવાનું પરિવારે જણાવ્યું હતું. પોલીસની વધુ તપાસમાં ગોડાઉનમાં મગફળીની ફોતરી ભરી આવેલી ટ્રક રિવર્સમાં લેતા હતા ત્યારે પાછળ કામ કરતા વૃદ્ધ પર વ્હિલ ફળી વળ્યા હોવાનું બહાર આવતા પોલીસે ટ્રકચાલકની અટકાયત કરી તેની ધરપકડની કાર્યવાહી કરી હતી.

આ પ્રકારના તમામ સમાચાર માટેે App ડાઉનલોડ કરો.