વાયનાડમાં ભૂસ્ખલનથી 130નાં મોત, 220લાપતા:બચાવકાર્ય ચાલુ; કેરળના 8 જિલ્લામાં ભારે વરસાદનું એલર્ટ, રાહુલ-પ્રિયંકાની મુલાકાત સ્થગિત

કેરળના વાયનાડમાં ભારે વરસાદને કારણે સોમવારે મોડી રાત્રે 4 અલગ-અલગ જગ્યાએ ભૂસ્ખલન થયું હતું. સવારે 2 થી 6 વાગ્યાની વચ્ચે થયેલા ભૂસ્ખલનમાં ચાર ગામો ધોવાઈ ગયા હતા. મુંડક્કાઈ, ચુરામાલા, અટ્ટમાલા અને નૂલપ્પુઝામાં મકાનો, પુલ, રસ્તાઓ અને વાહનો પણ ધોવાઈ ગયા હતા. અત્યાર સુધીમાં 130 લોકોના મોત થયા છે. 116 હોસ્પિટલમાં છે, જ્યારે 220થી વધુ લોકો ગુમ છે. બચાવકાર્ય માટે આર્મી, એરફોર્સ, SDRF અને NDRFની ટીમો સ્થળ પર હાજર છે. સતત વરસાદને કારણે કોંગ્રેસ નેતા રાહુલ ગાંધી અને પ્રિયંકા ગાંધીએ તેમનો વાયનાડ પ્રવાસ રદ કર્યો છે. તેઓ અહીં પીડિતોને મળવાના હતા. કન્નુરથી સેનાના 225 જવાનોને વાયનાડ મોકલવામાં આવ્યા છે. બચાવ માટે એરફોર્સના બે હેલિકોપ્ટર પણ મોકલવામાં આવ્યા હતા, પરંતુ વરસાદના કારણે તેમને કોઝિકોડ પરત ફરવું પડ્યું હતું. અહીં, કેરળ સરકારે આ દુર્ઘટના બાદ રાજ્યમાં બે દિવસના રાજ્ય શોકની જાહેરાત કરી છે. નકશા પરથી ઘટનાસ્થળને સમજો... 5 વર્ષ પહેલા આ જ વિસ્તારમાં ભૂસ્ખલનને કારણે 17 લોકોનાં મોત થયા હતા
વાયનાડનાં 4 ગામોમાં ભૂસ્ખલન થયું છે - મુંડક્કાઈ, ચુરામાલા, અટ્ટમાલા અને નૂલપુઝા. પાંચ વર્ષ પહેલાં 2019માં આ જ ગામોમાં ભૂસ્ખલન થયું હતું, જેમાં 17 લોકોના મોત થયા હતા. 5 લોકો આજદિન સુધી મળ્યા નથી. 52 મકાનો ધરાશાયી થયાં હતાં. મુંડક્કાઈ ગામમાં સૌથી વધુ નુકસાન, 250 લોકો અહીં ફસાયા
ભૂસ્ખલનને કારણે વાયનાડનું મુંડક્કાઈ ગામ સૌથી વધુ પ્રભાવિત થયું છે. રેસ્ક્યુ ટીમ હજુ સુધી અહીં પહોંચી શકી નથી. NDRFની એક ટીમ પગપાળા અહીં પહોંચવાનો પ્રયાસ કરી રહી છે. મુંડક્કાઈમાં લગભગ 250 લોકો ફસાયા હોવાના અહેવાલ છે. અહીં અનેક મકાનો ધોવાઈ ગયા છે. અહીં 65 પરિવારો રહેતા હતા. નજીકના ટી એસ્ટેટના 35 કર્મચારીઓ પણ ગુમ છે. ચુરલમાલા ગામમાંથી બે વિદેશી નાગરિકોને બચાવી લેવાયા
જિલ્લા પંચાયતના પ્રમુખ સમશાદ મરાઈકરે જણાવ્યું હતું કે મુંડક્કાઈ સુધી સડક માર્ગે પહોંચી શકાતું નથી. મોબાઈલ નેટવર્ક પણ ડાઉન છે. ચુરલમાલા ગામમાં પણ નુકસાન વધુ છે. અહીં બચાવ કાર્ય ચાલી રહ્યું છે. અહીં અનેક મકાનો ધોવાઈ ગયા છે. બે વિદેશી નાગરિકો સહિત અનેક લોકોને બચાવી લેવાયા છે. તેઓ હોમસ્ટેમાં રોકાયા હતા. અહીં રેસ્ક્યુ ટીમ દરેક ઘરની તપાસ કરી રહી છે. આજે પણ વાયનાડમાં ભારે વરસાદની શક્યતા
વાયનાડ ઉપરાંત હવામાન વિભાગે આજે કોઝિકોડ, મલપ્પુરમ અને કાસરગોડમાં પણ વરસાદ માટે રેડ એલર્ટ જાહેર કર્યું છે. એટલે કે આજે પણ અહીં ભારે વરસાદની સંભાવના છે. વાયનાડ દુર્ઘટનાના બચાવકાર્યમાં મુશ્કેલી આવી શકે છે. વાયનાડમાં ભૂસ્ખલનની તસવીરો... વાયનાડ અકસ્માત અપડેટ.. કેરળ સરકારે કોઝિકોડમાં ગ્રેનાઈટની ખાણો બંધ કરી
કેરળના આરોગ્ય મંત્રી વીણા જ્યોર્જે કહ્યું કે વૈથીરી, કાલાપટ્ટા, મેપ્પડી અને માનંતવડી હોસ્પિટલો એલર્ટ પર છે. અહીં ભારે વરસાદને કારણે કોઝિકોડ જિલ્લાનાં તમામ પ્રવાસન સ્થળો પર પ્રવાસીઓને જવા પર પ્રતિબંધ લગાવી દેવામાં આવ્યો છે. આ સિવાય તમામ ગ્રેનાઈટ ક્વોરીને અસ્થાયી ધોરણે બંધ રાખવા માટે કહેવામાં આવ્યું છે.વડાપ્રધાન નરેન્દ્ર મોદીએ વાયનાડમાં ભૂસ્ખલનમાં માર્યા ગયેલા લોકોના મોત પર શોક વ્યક્ત કર્યો છે. તેમણે કેરળ સરકારને કેન્દ્ર તરફથી શક્ય તમામ મદદની ખાતરી આપી. મૃત્યુ પામેલા લોકોનાં પરિવારજનોને 2-2 લાખ રૂપિયાનું વળતર આપવાની પણ જાહેરાત કરી છે. ઘાયલોને 50 હજાર રૂપિયા આપવામાં આવશે. કુલ્લુમાં વાદળ ફાટ્યું, સફરજનના બગીચા નષ્ટ; અંજની નાળામાં પાણી વધવાથી લેહ રોડ બંધ હિમાચલના કુલ્લુમાં સોમવાર-મંગળવારે મોડી રાત્રે વાદળ ફાટ્યું. જેના કારણે મણિકર્ણ ઘાટીના તોષ નાળામાં ભારે વરસાદ થયો હતો. તોષ નાળા પાસે સફરજનનાં વૃક્ષો પણ નાશ પામ્યાં હતાં. કુલ્લુમાં વાદળ ફાટ્યા બાદ રસ્તા તૂટી ગયા હતા. પાલચન નજીક અંજની મહાદેવ નાળાનાં પાણીના સ્તરમાં વધારો થયો છે. પાણી રોડ તરફ વહી રહ્યું છે. જેના કારણે અટલ ટનલ અને લેહ રોડ તરફ જતા રસ્તા પર વાહનવ્યવહાર ખોરવાઈ ગયો છે. ભવિષ્યમાં હવામાન કેવું રહેશે...
જમ્મુ અને કાશ્મીર, લદ્દાખ, હિમાચલ પ્રદેશ, ઉત્તરાખંડ, હરિયાણા, ચંદીગઢ, પશ્ચિમ ઉત્તર પ્રદેશ, પશ્ચિમ રાજસ્થાન, પૂર્વ મધ્ય પ્રદેશ, ઓડિશા, મણિપુર, નાગાલેન્ડ, મિઝોરમ અને ત્રિપુરામાં ભારે વરસાદ (12 સેમીથી વધુ)ની ચેતવણી છે. જુલાઈ 31..

હવામાન વિભાગે પંજાબ, પૂર્વ ઉત્તર પ્રદેશ, પૂર્વ રાજસ્થાન, પશ્ચિમ મધ્ય પ્રદેશ, છત્તીસગઢ, ગંગા પશ્ચિમ બંગાળ, ઝારખંડ, કોંકણ-ગોવા, મધ્ય મહારાષ્ટ્ર, ગુજરાત અને કેરળમાં ભારે વરસાદ (7 સેમી સુધી)ની આગાહી કરી છે.

આ પ્રકારના તમામ સમાચાર માટેે App ડાઉનલોડ કરો.