વકફ સુધારા બિલ આજે લોકસભામાં રજૂ થશે:ટીડીપી અને જેડીયુ બિલ પર સરકારની સાથે; કોંગ્રેસ સહિત અનેક વિપક્ષી પાર્ટીઓએ વ્હિપ જારી કર્યો

વકફ સુધારા બિલ આજે લોકસભામાં રજૂ કરવામાં આવશે. આ બિલ બપોરે 12 વાગ્યે પ્રશ્નકાળ પછી ગૃહમાં રજૂ કરવામાં આવશે. સ્પીકર ઓમ બિરલાએ આ અંગે ચર્ચા કરવા માટે 8 કલાકનો સમય ફાળવ્યો છે. આમાંથી 4 કલાક 40 મિનિટનો સમય NDAને આપવામાં આવ્યો છે, બાકીનો સમય વિપક્ષને આપવામાં આવ્યો છે. ચંદ્રબાબુ નાયડુની તેલુગુ દેશમ પાર્ટી (ટીડીપી) અને નીતીશ કુમારની જનતા દળ યુનાઇટેડ (જેડીયુ)એ બિલને ટેકો આપવાની જાહેરાત કરી છે. બંને પક્ષોએ તેમના તમામ સાંસદોને ગૃહમાં હાજર રહેવા માટે વ્હીપ જારી કર્યો છે. બીજી તરફ, વિપક્ષ બિલનો વિરોધ કરી રહ્યો છે. તમિલનાડુના એઆઈએડીએમકે, નવીન પટનાયકના બીજુ જનતા દળ અને કે ચંદ્રશેખર રાવની ભારત રાષ્ટ્ર સમિતિ જેવા તટસ્થ પક્ષો પણ આ મામલે વિપક્ષ સાથે છે. ગઈકાલે, ઈન્ડિયા બ્લોકના પક્ષોએ સંસદ ભવનમાં એક બેઠક યોજી હતી અને બિલ પર તેમની વ્યૂહરચના અંગે ચર્ચા કરી હતી. આ ઉપરાંત, વિપક્ષે ચર્ચાનો સમય વધારીને 12 કલાક કરવાની માંગ કરી છે. આ અંગે સંસદીય કાર્ય મંત્રી કિરેન રિજિજુએ કહ્યું કે ચર્ચાનો સમય વધારી શકાય છે. દેશ એ પણ જાણવા માંગે છે કે કયા પક્ષનું વલણ શું છે. સરકારે JDU-TDPના સૂચનો સ્વીકાર્યા બિલ પર બંને પક્ષોએ 3 સૂચનો આપ્યા હતા. સરકારે આ સ્વીકારી લીધા છે. ફેબ્રુઆરીમાં કેબિનેટે બિલને મંજૂરી આપી હતી કેબિનેટે 19 ફેબ્રુઆરીના રોજ વકફ સુધારા બિલને મંજૂરી આપી હતી. બિલ પર સંયુક્ત સંસદીય સમિતિ (JPC)ના અહેવાલના આધારે વકફ બિલનો નવો ડ્રાફ્ટ તૈયાર કરવામાં આવ્યો છે. બજેટ સત્રના પહેલા તબક્કામાં 13 ફેબ્રુઆરીએ સંસદમાં બિલ પર JPC રિપોર્ટ રજૂ કરવામાં આવ્યો હતો. સમિતિએ 30 જાન્યુઆરીએ સ્પીકર ઓમ બિરલાને 655 પાનાનો રિપોર્ટ સોંપ્યો હતો. આ દરમિયાન JPC પ્રમુખ જગદંબિકા પાલ, નિશિકાંત દુબે અને અન્ય બીજેપી સાંસદો હાજર હતા. જોકે, કોઈ વિપક્ષી સાંસદ જોવા મળ્યા ન હતા. વિપક્ષી સાંસદોએ રિપોર્ટનો વિરોધ કર્યો સમિતિના વિપક્ષી સાંસદોએ આ અહેવાલ સામે વાંધો ઉઠાવ્યો હતો. રિપોર્ટના પક્ષમાં ૧૬ સભ્યોએ મતદાન કર્યું, જ્યારે 11 સભ્યોએ વિરોધમાં મતદાન કર્યું. બાકીના સભ્યોએ મતદાનમાં ભાગ લીધો ન હતો. AIMIMના વડા અસદુદ્દીન ઓવૈસીએ કહ્યું હતું કે 655 પાનાનો રિપોર્ટ એક રાતમાં વાંચવો અશક્ય છે. હું રિપોર્ટ સાથે અસંમત છું. તે જ સમયે, જેપીસી સભ્ય ડીએમકે સાંસદ એ રાજાએ કહ્યું હતું કે ભાજપના સાંસદ જગદંબિકા પાલે પોતાની ઇચ્છા મુજબ સમિતિની કાર્યવાહી ચલાવી હતી. મને લાગે છે કે રિપોર્ટ પણ અગાઉથી તૈયાર હતો. જો આ બિલ પસાર થશે તો અમે તેની વિરુદ્ધ સુપ્રીમ કોર્ટમાં જઈશું. બિલના વિરોધમાં લોકોએ કાળી પટ્ટી બાંધી અને ઈદની નમાઝ અદા કરી ઘણી જગ્યાએ, મુસ્લિમોએ વક્ફ બિલના વિરોધમાં ઈદની નમાજ અદા કરતી વખતે કાળી પટ્ટી પહેરી હતી. 28 માર્ચે રમઝાનના છેલ્લા શુક્રવારે (જુમાતુલ વિદા) ઓલ ઈન્ડિયા મુસ્લિમ પર્સનલ લો બોર્ડ (AIMPLB)એ દેશભરના મુસ્લિમોને કાળી પટ્ટી પહેરીને નમાઝ અદા કરવા કહ્યું હતું. AIMPLB દ્વારા જારી કરાયેલા અપીલ પત્રમાં લખવામાં આવ્યું હતું કે- દેશના દરેક મુસ્લિમની જવાબદારી છે કે તેઓ વક્ફ સુધારા બિલનો સખત વિરોધ કરે. બધા મુસ્લિમોએ નમાઝ માટે મસ્જિદમાં જતી વખતે કાળી પટ્ટી પહેરીને શાંતિપૂર્ણ અને મૌન વિરોધ નોંધાવવો જોઈએ.

આ પ્રકારના તમામ સમાચાર માટેે App ડાઉનલોડ કરો.