સરકારી યોજનાઓના નામે થતા સાયબર ફ્રોડ અને તેની સામે સુરક્ષાના પગલાઓ

(અજય ચૌહાણ દ્વારા)
આજના ડિજિટલ યુગમાં, ટેકનોલોજીના ઝડપી વિકાસ સાથે સાયબર ક્રાઈમનો ખતરો પણ સતત વધતો જાય છે. દુનિયાભરમાં દરેક વ્યક્તિ ટેકનોલોજીથી સંકળાયેલી છે અને પોતાના રોજિંદા કાર્યોમાં ઇન્ટરનેટ અને ડિજિટલ ઉપકરણોનો ઉપયોગ કરે છે. જોકે, આ સવલતો સાથે સાયબર અપરાધીઓ માટે નવા રસ્તાઓ પણ ખુલી રહ્યા છે. ઓનલાઈન છેતરપિંડીના અનેક પ્રકારો જેવા કે ફાઇનાન્શીયલ ફ્રોડ સોશિયલ મીડિયા ફ્રોડ, ડેટા લીક ઝડપથી વધી રહ્યાં છે. આ સમસ્યાનો અસરકારક રીતે સામનો કરવા માટે, જાહેર જાગૃતિ અને શિક્ષણને પ્રાધાન્ય આપવું અનિવાર્ય બની ગયું છે. પ્રવર્તમાન સાયબર ફ્રોડની વિવિધ મોડ્સ ઓપરેન્ડી (સાયબર ગુન્હા બાબતની કાર્ય પ્રણાલી) મુજબની જુદી જુદી સરકારી યોજનાઓને લક્ષ્યાંકિત કરીને જુદા જુદા લાભ જેમ કે નાણાંકીય સહાય, શિષ્યવૃત્તિ સહાય, સાધનોની સહાય વગેરેની લાલચ આપી અને તેમની ફી પેટે અથવા રજીસ્ટ્રેશન ફી પેટે બેંકની માહિતી મેળવી દિવસે દિવસે સરકારી યોજના અંતર્ગત સાયબર છેતરપિંડીના કેસમાં વધારો જોવા મળી રહ્યો છે. સત્તાવાર સ્ત્રોતથી જ માહિતી મેળવો: સરકારી યોજનાઓ વિશેની માહિતી માટે હંમેશા સરકારની સત્તાવાર વેબસાઇટ અથવા ઓફિસનો સંપર્ક કરો. સોશિયલ મીડિયા અથવા અન્ય અધિકૃત ન હોય તેવા સ્રોતો પરથી મળતી માહિતી પર વિશ્વાસ ન કરો. લિંક્સ પર ક્લિક કરતા પહેલા સાવધાન રહો: જો તમને કોઈ સંદેશો મળે જેમાં સરકારી યોજના વિશેની માહિતી હોય અને તેમાં કોઈ લિંક હોય, તો તે લિંક પર ક્લિક કરતા પહેલા સારી રીતે વિચાર કરો. તે નકલી વેબસાઇટ અથવા દૂષિત સૉફ્ટવેર તરફ દોરી શકે છે. જો કોઈ વ્યક્તિ તમને ધમકાવે અથવા તાકીદે કોઈ કાર્યવાહી કરવા માટે કહે તો સાવધાન રહો. છેતરપિંડી કરનારાઓ ઘણીવાર લોકોને ડરાવીને તેમના પૈસા અથવા માહિતી મેળવવાનો પ્રયાસ કરે છે. જો તમને કોઈ આવું કરે તો તરત જ કોઈ વિશ્વાસપાત્ર વ્યક્તિ અથવા સત્તાવાળાનો સંપર્ક કરો (સાયબર ગુના ને લગત ફરિયાદ માટે 1930 ડાયલ કરવું).
*સરકારી યોજનાઓ વિશે જાગૃત રહો:* સરકારી યોજનાઓ વિશે જાગૃત રહેવાનો પ્રયાસ કરો અને તેમની મુખ્ય શરતો અને પ્રક્રિયાઓ વિશે જાણો. આ તમને છેતરપિંડીને ઓળખવામાં મદદ કરશે. જો આપને લાગે કે તમે કોઈ છેતરપિંડીનો ભોગ બન્યા છો, તો તરત જ પોલીસ (સાયબર ગુના ને લગત ફરિયાદ માટે 1930 ડાયલ કરવું). અથવા સરકારી સંસ્થાનો સંપર્ક કરો.
આ ઉપરાંત સોશિયલ મીડિયા પર અજાણ્યા લોકોના સંદેશાઓ પર વિશ્વાસ ન કરો. કોઈપણ ઓફર જે ખૂબ સારી લાગે તેનાથી સાવધાન રહો. તમારા કમ્પ્યુટર અને મોબાઇલ ફોન પર એન્ટીવાયરસ સોફ્ટવેરનો ઉપયોગ કરો. તમારા બેંક ખાતાની નિયમિત રીતે તપાસ કરો.

આ પ્રકારના તમામ સમાચાર માટેે App ડાઉનલોડ કરો.