અપહરણ-હત્યાના પ્રયાસમાં વિકાસ યાદવની થઈ હતી ધરપકડ:આતંકવાદી પન્નુની હત્યાનું કાવતરું ઘડવા બદલ FIBએ વોન્ટેડ જાહેર કર્યો છે

આતંકવાદી પન્નુની હત્યાનું કાવતરું ઘડવા બદલ FIB દ્વારા વોન્ટેડ જાહેર કરાયેલા વિકાસ યાદવની દસ મહિના પહેલા દિલ્હી પોલીસના સ્પેશિયલ સેલ દ્વારા હત્યાના પ્રયાસ અને અપહરણના આરોપમાં ધરપકડ કરવામાં આવી હતી. ડિસેમ્બર 2023માં નોંધાયેલા કેસમાં વિકાસની સાથે અન્ય એક વ્યક્તિની પણ ધરપકડ કરવામાં આવી હતી. આ કેસમાં પોલીસે માર્ચમાં ચાર્જશીટ દાખલ કરી હતી અને એપ્રિલ 2024માં વિકાસને જામીન મળી ગયા હતા. રોહિણીના રહેવાસી એક વેપારીએ ડિસેમ્બર 2023માં પોલીસમાં ફરિયાદ કરી હતી કે તેના પરિચિતે નવેમ્બર 2023માં એક મહિના અગાઉ વિકાસ યાદવનો તેની સાથે પરિચય કરાવ્યો હતો અને કહ્યું હતું કે તે એક વરિષ્ઠ સરકારી અધિકારી છે. વેપારીનું કામ ઇન્ફર્મેશન ટેક્નોલોજી સાથે સંબંધિત છે, તેથી તેના ઘણા સંપર્કો પશ્ચિમ એશિયામાં છે. વેપારીએ પોલીસને જણાવ્યું કે બંનેએ એકબીજા સાથે નંબર શેર કર્યા હતા. બંને વચ્ચે સારી મિત્રતા બંધાઈ. વેપારીની ફરિયાદ મુજબ, વિકાસ વારંવાર તેના કામ અને મિત્રો વિશે પૂછતો હતો. તેના કહેવા મુજબ વિકાસે તેને એમ પણ કહ્યું હતું કે તે અંડરકવર એજન્ટ તરીકે કામ કરે છે. પરંતુ કામ અને ઓફિસની માહિતી ક્યારેય શેર કરવામાં આવી ન હતી. વેપારીએ પોલીસને આપેલી ફરિયાદ મુજબ, 11 ડિસેમ્બરે વિકાસે તેને ફોન કર્યો અને કોઈ મુદ્દા પર ચર્ચા કરવા લોધી રોડ પર આવવા કહ્યું. જ્યારે તે લોધી રોડ પર પહોંચ્યો ત્યારે વિકાસની સાથે ત્યાં એક અન્ય વ્યક્તિ પણ હતી, જેના પછી તેઓ બળજબરીથી વેપારીનું અપહરણ કરીને તેને ડિફેન્સ કોલોનીના ફ્લેટમાં લઈ ગયા અને ત્યાં વિકાસે તેને કહ્યું કે લોરેન્સ બિશ્નોઈએ તેને ખતમ કરવાનો કોન્ટ્રાક્ટ આપ્યો છે. આ પછી વિકાસના સાગરિતે વેપારીને માથામાં માર મારી સોનાની ચેઈન અને વીંટી લઈ લીધી, પછી વેપારી સાથે એક કાફેમાં જઈને જે કંઈ પણ રોકડ હતી તે લઈને વિકાસ અને તેના સાગરિતોએ વેપારીને રસ્તાના કિનારે છોડી દીધા તે જ સમયે ધમકી આપી કે જો હું કોઈને ફરિયાદ કરીશ તો કંઈ થશે નહીં. આ પછી, વેપારીએ દિલ્હી પોલીસને ફરિયાદ કરી હતી, દિલ્હી પોલીસે આ મામલામાં હત્યાનો પ્રયાસ, અપરાધિક કાવતરું અને અપહરણની કલમો હેઠળ એફઆઈઆર નોંધી હતી અને 18 ડિસેમ્બરે વિકાસ અને તેના ભાગીદારની ધરપકડ કરી હતી. પૂછપરછ દરમિયાન વિકાસના ભાગીદારે જણાવ્યું કે તેનો યુઝ્ડ કારનો બિઝનેસ છે જેમાં તેને નુકસાન થયું હતું જેના કારણે તે વિકાસ સાથે મળીને ષડયંત્રમાં સામેલ થયો હતો. જ્યારે વિકાસે કહ્યું કે તેના પિતા બીએસએફમાં હતા, તેમનું મૃત્યુ 2007માં થયું હતું. વિકાસે માત્ર એટલું જ કહ્યું કે જે દિવસે તે બિઝનેસમેનને મળ્યો હતો, તેણે આના દ્વારા પૈસા કમાવવાનું પ્લાનિંગ કર્યું હતું. દિલ્હી પોલીસે માર્ચ મહિનામાં આ કેસમાં ચાર્જશીટ દાખલ કરી હતી અને વિકાસને એપ્રિલમાં જામીન મળી ગયા હતા. જોકે વિકાસને 22 માર્ચે જ વચગાળાના જામીન મળ્યા હતા, પરંતુ એપ્રિલમાં તેને નિયમિત જામીન મળી ગયા હતા. હરિયાણાનો યુવક અમેરિકામાં મોસ્ટ વોન્ટેડ અમેરિકા સરકારે દાવો કર્યો છે કે હરિયાણાના રેવાડીનો એક યુવક પણ ન્યૂયોર્ક સ્થિત શીખ ફોર જસ્ટિસ (SFJ)ના આતંકવાદી ગુરપતવંત સિંહ પન્નુની હત્યાના કાવતરામાં સામેલ છે. અમેરિકન તપાસ એજન્સી ફેડરલ બ્યુરો ઓફ ઇન્વેસ્ટિગેશન (FBI) એ યુવક વિકાસ યાદવનું મોસ્ટ વોન્ટેડ પોસ્ટર જાહેર કર્યું છે. આમાં વિકાસના 3 ફોટા છે. આમાંના એક ફોટોમાં તે આર્મી યુનિફોર્મમાં પણ છે. વિકાસ યાદવ (39) રેવાડી જિલ્લાના પ્રણપુરા ગામનો રહેવાસી છે. અમેરિકી સરકારનો દાવો છે કે વિકાસ ભારતીય ગુપ્તચર એજન્સી રિસર્ચ એન્ડ એનાલિસિસ વિંગ (RAW)માં કામ કરે છે. RAWએ જ પન્નુની હત્યાનું કાવતરું ઘડ્યું હતું. વિકાસ પર હત્યા અને મની લોન્ડરિંગ માટે કિલરને હાયર કરવાનો આરોપ છે. ભારતે અમેરિકાના આરોપોનો જવાબ આપ્યો હતો કે અમે તપાસ માટે તપાસ સમિતિની રચના કરી છે. જો કે, ભારતે આ ષડયંત્રમાં કોઈપણ સંડોવણીનો ઈન્કાર કર્યો છે. અમેરિકાએ ભારતના સહયોગ પર સંતોષ વ્યક્ત કર્યો. FBIનું 'મોસ્ટ વોન્ટેડ' પોસ્ટર શું દાવો કરે છે?
એફબીઆઈ દ્વારા જાહેર કરાયેલા પોસ્ટરમાં કહેવામાં આવ્યું છે કે વિકાસ યાદવ ભારતીય મૂળના અમેરિકન વકીલ અને રાજકીય કાર્યકરની હત્યાનું કાવતરું ઘડવા બદલ અમેરિકામાં વોન્ટેડ છે. વિકાસ એક ભારતીય છે અને તેણે ષડયંત્રને અંજામ આપવા માટે તેના ભાગીદાર અને અન્ય ભારતીય નાગરિક સાથેની વાતચીતમાં 'અમાનત' ઉપનામનો ઉપયોગ કર્યો. આરોપો અનુસાર, વિકાસે ષડયંત્રને આગળ વધારવા માટે ભારતીય નાગરિકને પીડિત (પન્નુ)ના રહેણાંકનું સરનામું, ફોન નંબર અને અન્ય ઓળખની માહિતી આપી હતી. યાદવ અને તેના સહયોગીએ હત્યા માટે એડવાન્સ તરીકે ન્યૂયોર્કમાં 15,000 ડોલર રોકડ પહોંચાડવા માટે સહયોગીની વ્યવસ્થા કરી હતી. 10 ઓક્ટોબર, 2024ના રોજ, દક્ષિણ ન્યૂયોર્ક ડિસ્ટ્રિક્ટ કોર્ટ દ્વારા વિકાસ વિરુદ્ધ ધરપકડ વોરંટ જાહેર કરવામાં આવ્યું હતું. આ પછી વિકાસ પર હત્યા, નિષ્ફળ પ્રયાસ અને મની લોન્ડરિંગ માટે ભાડે રાખવાનો આરોપ મૂકવામાં આવ્યો હતો. દાવો- વિકાસે નિખિલ ગુપ્તાને રાખ્યો હતો
ન્યૂઝ એજન્સી રોયટર્સના જણાવ્યા અનુસાર, વિકાસ પર પન્નુની હત્યા માટે નિખિલ ગુપ્તાને નોકરી પર રાખવાનો આરોપ છે. ગુપ્તાની ગયા વર્ષે ચેક રિપબ્લિકમાં ધરપકડ કરવામાં આવી હતી. આ પછી તેને અમેરિકા પ્રત્યાર્પણ કરવામાં આવ્યો. FBI ડિરેક્ટરે કહ્યું- અમેરિકન નાગરિકની હત્યાનો પ્રયાસ કરાયો
FBIના ડિરેક્ટર ક્રિસ્ટોફર રેએ કહ્યું કે આરોપીએ કથિત રીતે એક વ્યક્તિ સાથે મળીને કાવતરું ઘડ્યું અને અમેરિકન નાગરિકની હત્યા કરવાનો પ્રયાસ કર્યો. યુએસ એટર્ની જનરલ મેરિક બી. ગારલેન્ડે કહ્યું - ન્યાય વિભાગ અમેરિકનોને નિશાન બનાવવા અને તેમને જોખમમાં મૂકવાના પ્રયાસોને સહન કરશે નહીં. કોણ છે ગુરપતવંત પન્નુ, કોની હત્યાના પ્રયાસ સાથે જોડાયેલો છે કેસ... પન્નુને 2020માં આતંકવાદી જાહેર કરવામાં આવ્યો હતો
2019માં, ભારત સરકારે પન્નુના સંગઠન SFJ પર ગેરકાયદેસર પ્રવૃત્તિઓ નિવારણ અધિનિયમ એટલે કે UAPA હેઠળ આતંકવાદી પ્રવૃત્તિઓ હાથ ધરવાના આરોપસર પ્રતિબંધ મૂક્યો હતો. ગૃહ મંત્રાલયે તેના નોટિફિકેશનમાં કહ્યું હતું કે શીખો માટે જનમતની આડમાં SFJ પંજાબમાં અલગતાવાદ અને ઉગ્રવાદી વિચારધારાને સમર્થન આપી રહી છે. વર્ષ 2020માં પન્નુ પર અલગાવવાદને પ્રોત્સાહન આપવા અને પંજાબી શીખ યુવાનોને હથિયાર ઉઠાવવા માટે પ્રોત્સાહિત કરવાનો આરોપ લાગ્યો હતો. આ પછી, 1 જુલાઈ, 2020ના રોજ, કેન્દ્ર સરકારે પન્નુને UAPA હેઠળ આતંકવાદી જાહેર કર્યો. 2020માં સરકારે SFJ સંબંધિત 40થી વધુ વેબ પેજ અને યુટ્યૂબ ચેનલો પર પ્રતિબંધ મૂક્યો. આતંકવાદી પન્નુ સાથે જોડાયેલા આ સમાચાર પણ વાંચો... આતંકી માટે ભારત સાથે દુશ્મની કેમ કરી રહ્યું છે કેનેડા:ટ્રુડોના પિતા પણ ઈન્દિરા ગાંધી સાથે ટકરાયા હતા; 44 વર્ષથી વિલન બન્યું ખાલિસ્તાન 1980ના દાયકાનો કિસ્સો છે. ખાલિસ્તાની તલવિંદર સિંહ પરમારનું નામ પંજાબમાં બે પોલીસ અધિકારીઓની હત્યામાં સામે આવ્યું છે, જે કેનેડા ભાગી ચૂક્યો હતો. એ સમયે કેનેડાના વર્તમાન વડાપ્રધાન જસ્ટિન ટ્રુડોના પિતા પિયરે ટ્રુડો હતા. ઈન્દિરા ગાંધીએ પિયરે ટ્રુડોને કહ્યું હતું કે તે તલવિંદરને ભારતને સોંપી દે. ટ્રુડોએ સ્પષ્ટ ઈન્કાર કરી દીઘો. આના પર ઈન્દિરાએ નારાજગી વ્યક્ત કરી હતી. 3 વર્ષ પછી જૂન 1985માં કેનેડાના મોન્ટ્રિયલથી એર ઈન્ડિયાના કનિષ્ક વિમાને ઉડાન ભરી. તેને લંડન થઈને મુંબઇ જવાનું હતું. રસ્તામાં વિમાનમાં વિસ્ફોટ થયો. 270 કેનેડિયન નાગરિકો સહિત કુલ 329 લોકોના મોત થયા. આ હુમલો ખાલિસ્તાનીઓએ કર્યો હતો અને એનો માસ્ટરમાઇન્ડ તલવિંદર સિંહ પરમાર હતો. એ જ તલવિંદર, જેને કેનેડાએ ભારતને સોંપવાની ના પાડી દીધી હતી. (સંપૂર્ણ સમાચાર વાંચો)

આ પ્રકારના તમામ સમાચાર માટેે App ડાઉનલોડ કરો.