3 રાજ્યોની 5 સ્કૂલને બોમ્બથી ઉડાવી દેવાની ધમકી:તેમાં 3 CRPFની સ્કૂલ, મેઇલ દ્વારા ધમકી આપવામાં આવી; હજુ સુધી કંઈપણ શંકાસ્પદ મળ્યું નથી

સેન્ટ્રલ રિઝર્વ પોલીસ ફોર્સ (CRPF) ની ​​​​​​દિલ્હીની 2 સ્કૂલ અને હૈદરાબાદની 1 સ્કૂલને બોમ્બથી ઉડાવી દેવાની ધમકી મળી છે. ન્યૂઝ એજન્સી ANI અનુસાર, આ ધમકી ત્રણેય સ્કૂલોના મેનેજમેન્ટને ઈમેલ દ્વારા આપવામાં આવી હતી. આ સિવાય તમિલનાડુના કોઈમ્બતુરની ચિન્નાવેદમપટ્ટી અને સરવણમપટ્ટીની બે ખાનગી સ્કૂલોને પણ બોમ્બની ધમકી મળી છે. બોમ્બ સ્કવોડની ટીમ મંગળવારે સવારે આ તમામ સ્કૂલોમાં પહોંચી હતી. સ્કૂલોને ખાલી કરાવવામાં આવી રહી છે અને તપાસ કરવામાં આવી રહી છે. જો કે હજુ સુધી કોઈ શંકાસ્પદ વસ્તુ મળી નથી. આ પહેલા 20 ઓક્ટોબરે દિલ્હીના રોહિણીમાં CRPF સ્કૂલ પાસે બ્લાસ્ટ થયો હતો. જો કે આ હુમલામાં કોઈને ઈજા થઈ નથી. માત્ર દુકાનો અને સ્કૂલની દિવાલને નુકસાન થયું હતું. દેશભરમાં બ્લાસ્ટ અને બોમ્બની ધમકીઓના મામલા વિગતવાર વાંચો... ઑક્ટોબર 20: CRPF સ્કૂલમાં બ્લાસ્ટ, ખાલિસ્તાની સંગઠને જવાબદારી લીધી દિલ્હીના પ્રશાંત વિહાર વિસ્તારમાં આવેલી CRPF સ્કૂલમાં 20 ઓક્ટોબરે સવારે લગભગ 7:30 વાગ્યે બ્લાસ્ટ થયો હતો. ખાલિસ્તાની સંગઠને ટેલિગ્રામ દ્વારા આની જવાબદારી લીધી હતી. દિલ્હી પોલીસે જણાવ્યું કે સ્કુલની દિવાલ પાસે પોલીથીન બેગમાં વિસ્ફોટકો રાખવામાં આવ્યા હતા. 15થી 21 ઓક્ટોબરઃ 120થી વધુ ફ્લાઈટને બોમ્બથી ઉડાવી દેવાની ધમકી, 200 કરોડથી વધુનું નુકસાન 21 ઓક્ટોબરની મોડી રાત્રે 30 વિમાનોને બોમ્બની ધમકી મળી હતી. તેમાં ઈન્ડિગો, વિસ્તારા અને એર ઈન્ડિયા (AI)ની સ્થાનિક અને આંતરરાષ્ટ્રીય ફ્લાઈટ્સનો સમાવેશ થાય છે. છેલ્લા 8 દિવસમાં 120થી વધુ વિમાનોને બોમ્બની ધમકી મળી છે. 1 મે : 100 સ્કૂલોને બોમ્બની ધમકી મળી હતી, બધી ખોટી 1 મેના રોજ દિલ્હી-એનસીઆરની લગભગ 100 સ્કૂલોમાં બોમ્બ મૂકવાની ધમકી આપવામાં આવી હતી. થોડી જ વારમાં દિલ્હી પોલીસ, બોમ્બ ડિસ્પોઝલ સ્કવોડ, ફાયર ફાઈટરની ગાડીઓ અને એમ્બ્યુલન્સ તમામ સ્કુલોમાં પહોંચી ગઈ હતી. સ્કુલો ખાલી કરાવ્યા બાદ પોલીસે બોમ્બની શોધખોળ હાથ ધરી હતી, પરંતુ કંઈપણ શંકાસ્પદ મળ્યું ન હતું. 2023: 4 શાળાઓને ધમકીઓ, બધી નકલી ગયા વર્ષે દિલ્હીની ચાર સ્કુલોને બોમ્બની ધમકી મળી હતી. 16 મે 2023ના રોજ, સાકેત, દિલ્હીની એક સ્કુલને બોમ્બની ધમકી સંબંધિત ઈ-મેલ મળ્યો હતો. આ પહેલા 12 મે, 2023ના રોજ દિલ્હીના સાદિક નગરમાં આવેલી ઈન્ડિયન પબ્લિક સ્કૂલને બોમ્બની ધમકી મળી હતી. આ ધમકી ઈ-મેલ કરીને આપવામાં આવી હતી. આ પછી 25 એપ્રિલ 2023ના રોજ દિલ્હી-મથુરા રોડ પર સ્થિત ડીપીએસ સ્કૂલમાં ઈ-મેલ દ્વારા બોમ્બની માહિતી મળી હતી. 12 એપ્રિલ, 2023ના રોજ, દિલ્હીના સાદિક નગરમાં આવેલી ધ ઈન્ડિયન સ્કૂલને પણ ધમકીભર્યો ઈ-મેલ મળ્યો હતો. આ તમામ ધમકીઓ અફવા સાબિત થઈ હતી. ફ્લાઈટમાં બોમ્બની ધમકી સંબંધિત આ સમાચાર પણ વાંચો... ખાલિસ્તાની આતંકવાદી પન્નુએ એર ઈન્ડિયાની ફ્લાઈટને બોમ્બથી ઉડાવી દેવાની ધમકી આપી હતી ફ્લાઈટ પર સતત બોમ્બની ધમકીઓ વચ્ચે સોમવારે ખાલિસ્તાની આતંકવાદી ગુરપતવંત સિંહ પન્નુએ એર ઈન્ડિયાની ફ્લાઈટને ઉડાવી દેવાની ધમકી આપી છે. પન્નુએ કહ્યું- આ વર્ષે 1984ના શીખ રમખાણોની 40મી વર્ષગાંઠ છે. રમખાણોમાં 13 હજારથી વધુ શીખો માર્યા ગયા હતા. જેમાં મહિલાઓ અને બાળકો પણ હતા.

આ પ્રકારના તમામ સમાચાર માટેે App ડાઉનલોડ કરો.