માનવ બોમ્બ બનીને હુમલો કરી શકે છે આતંકવાદીઓ:15 ઓગસ્ટને લઇને ગુપ્તચર એજન્સીઓનું એલર્ટ, ભીડવાળી જગ્યાઓ અને આઇકોનિક સ્થળો ટાર્ગેટ પર

દિલ્હીના લાલ કિલ્લા પર 78માં સ્વતંત્રતા દિવસની તૈયારીઓ અંતિમ તબક્કામાં છે. જેમ જેમ સ્વતંત્રતા દિવસ નજીક આવી રહ્યો છે તેમ તેમ દેશભરમાં સુરક્ષા વ્યવસ્થા સઘન બનાવવામાં આવી રહી છે. જ્યારે દેશભરમાં સ્વતંત્રતા દિવસની ઉજવણીની તૈયારીઓ જોરશોરથી ચાલી રહી છે. આ દરમિયાન સૂત્રો પાસેથી સમાચાર આવી રહ્યા છે કે આતંકવાદીઓ દેશમાં આતંક ફેલાવવાની યોજના બનાવી રહ્યા છે. સૂત્રો પાસેથી મળેલી માહિતી મુજબ 15મી ઓગસ્ટના દિવસે આતંકવાદીઓ માનવ બોમ્બના રૂપમાં હુમલો કરી શકે છે. આ ખતરાને જોતા ગુપ્તચર એજન્સીઓએ એલર્ટ જાહેર કર્યું છે. કહેવામાં આવી રહ્યું છે કે આતંકવાદીઓ VVIPને નિશાન બનાવી શકે છે. જમ્મુ-કાશ્મીરમાં થયેલા તાજેતરના હુમલા બાદ વધુ સાવધ રહેવાની સલાહ આપવામાં આવી છે. શું છે આતંકવાદીઓનો પ્લાન?
પાકિસ્તાની ગુપ્તચર એજન્સી ISI લશ્કર-એ-તૈયબા, TRF અને જૈશ-એ-મોહમ્મદ જેવા આતંકવાદી સંગઠનોને દરેક રીતે મદદ કરી રહી છે અને આ સંગઠનોને હુમલા કરવા માટે ઉશ્કેરે છે. કઠુઆ, ડોડા, ઉધમપુર, પુંછ અને રાજૌરીમાં થયેલા તાજેતરના હુમલાઓને ધ્યાનમાં રાખીને એલર્ટ રહેવાની સલાહ આપવામાં આવી છે. એવા ઈનપુટ મળ્યા છે કે સશસ્ત્ર આતંકવાદીઓ હજુ પણ ભારતમાં હાજર છે અને તેમની યોજના મુજબ વીઆઈપી લોકોને નિશાન બનાવી શકાય છે. આ સ્થળોને કરી શકાય છે ટાર્ગેટ
ભીડવાળી જગ્યાઓ અને આઇકોનિક સ્થળોને નિશાન બનાવી શકાય છે. દિલ્હી હંમેશા જૈશ-એ-મોહમ્મદ અને લશ્કર માટે મુખ્ય નિશાના પર રહ્યું છે. પાકિસ્તાન ડ્રોન દ્વારા પુંછ અને જમ્મુમાં સતત હથિયાર મોકલી રહ્યું છે. આતંકવાદી અંડરવર્લ્ડના ક્રાઈમ સિન્ડિકેટનો ઉપયોગ પૈસા અને હથિયારોના પરિવહન માટે કરવામાં આવી રહ્યો છે. સ્વતંત્રતા દિવસના અવસર પર ઘણા VVIP અને વડાપ્રધાન લાંબા સમય સુધી ખુલ્લામાં બેસી રહે છે. દિલ્હીમાં ખાસ કરીને સાવચેત રહેવાની સલાહ
આવી સ્થિતિમાં ભારતને નફરત કરનારા લોકો મુશ્કેલી સર્જી શકે છે. તેમાં પાકિસ્તાની આતંકવાદી સંગઠનો, વૈશ્વિક જેહાદી જૂથો, સ્થાનિક આતંકવાદી સંગઠનો, શીખ આતંકવાદી જૂથો, ઉત્તર પૂર્વના આતંકવાદી સંગઠનોનો સમાવેશ થાય છે. કેટલાક લોકો એવા પણ હોઈ શકે છે જે સરકારના નિર્ણયોથી નારાજ છે. દિલ્હી એરપોર્ટ અને દિલ્હીની સરહદો પર વિશેષ તકેદારી રાખવા માટે કહેવામાં આવ્યું છે. સ્વતંત્રતા દિવસને લઈને દિલ્હી પોલીસની એડવાઈઝરી
આજે ફુલ ડ્રેસ રિહર્સલ અને સ્વતંત્રતા દિવસના દિવસે લાલ કિલ્લાની આસપાસ ટ્રાફિક પ્રભાવિત થશે. દિલ્હી પોલીસની ટ્રાફિક એડવાઈઝરી અનુસાર, દિલ્હી ગેટથી ચટ્ટા રેલ સુધી, નેતાજી સુભાષ માર્ગ, જીપીઓથી ચટ્ટા રેલ સુધી, લોથિયન રોડ , એચસી સેન માર્ગથી યમુના બજાર ચોક સુધી, ફાઉન્ટેન ચોકથી લાલ કિલ્લા સુધી, ચાંદની ચોક રોડ, રિંગ રોડથી નેતાજી સુભાષ માર્ગ સુધી, એસ્પ્લેનેડ રોડ અને લીંક રોડ નેતાજી સુભાષ માર્ગ, IP ફ્લાયઓવર સુધીના આઉટર રીંગ રોડ પર રોડ ટ્રાફિક ખોરવાશે.

આ પ્રકારના તમામ સમાચાર માટેે App ડાઉનલોડ કરો.