જમ્મુ- કાશ્મીરના કુપવાડામાં આતંકવાદી હુમલો, 1 જવાન શહીદ:મેજર સહિત 4 જવાન ઘાયલ; એક આતંકવાદી ઠાર, પાકિસ્તાની કમાન્ડો હોવાની આશંકા

જમ્મુ-કાશ્મીરના કુપવાડામાં શનિવારે (27 જુલાઈ) સવારે સુરક્ષાદળો અને આતંકવાદીઓ વચ્ચેની અથડામણમાં એક જવાન શહીદ થયો છે. હુમલામાં એક મેજર સહિત ચાર જવાન ઘાયલ થયા છે. આ એન્કાઉન્ટર માછિલ સેક્ટર પાસેના જંગલ વિસ્તારમાં થયું હતું. ઘાયલ થયેલા તમામ જવાનોને સારવાર માટે હોસ્પિટલમાં દાખલ કરવામાં આવ્યા છે. એન્કાઉન્ટરમાં એક પાકિસ્તાની આતંકવાદી માર્યા ગયાના સમાચાર છે. તે પાકિસ્તાની બોર્ડર એક્શન ટીમનો SSG કમાન્ડો હોવાની આશંકા છે. મીડિયા રિપોર્ટ્સ અનુસાર, સૈનિકો કમકારી વિસ્તારમાં સર્ચ ઓપરેશન ચલાવી રહ્યા હતા ત્યારે આતંકીઓએ ફાયરિંગ કર્યુ હતું. સુરક્ષા દળોને કમકારી વિસ્તારમાં પાકિસ્તાની આતંકવાદીઓ છુપાયા હોવાની બાતમી મળી હતી, ત્યારબાદ સેનાએ આ સર્ચ ઓપરેશન શરૂ કર્યું હતું. હુમલા બાદ આતંકવાદીઓ જંગલમાં ભાગી ગયા હોવાની આશંકા છે. વધારાના સૈનિકો મોકલીને શોધખોળ કરવામાં આવી રહી છે. જમ્મુ-કાશ્મીરના કુપવાડાના કોવુત વિસ્તારમાં બુધવારે થયેલા આતંકવાદી હુમલામાં ઘાયલ નોન-કમિશન્ડ ઓફિસર દિલાવર સિંહનું હોસ્પિટલમાં સારવાર દરમિયાન મૃત્યુ થયું હતું. સેનાએ એન્કાઉન્ટરમાં એક આતંકીને પણ ઠાર કર્યો હતો. મંગળવારે પૂંછમાં એન્કાઉન્ટર થયું હતું, જેમાં લાન્સ નાઈક સુભાષ કુમાર શહીદ થયા હતા. જુલાઈ 2024માં અત્યાર સુધીમાં જમ્મુ-કાશ્મીરમાં 9 મોટા આતંકી હુમલા થઈ ચૂક્યા છે. જેમાં કુલ 13 જવાનો શહીદ થયા છે, જ્યારે સુરક્ષા જવાનોએ 12 આતંકીઓને ઠાર કર્યા હતા. જુલાઈમાં જમ્મુ-કાશ્મીરમાં 9 મોટા હુમલા થયા જુલાઈ 27: કુપવાડાના કમકારી વિસ્તારમાં શનિવારે (27 જુલાઈ) સવારે સર્ચ ઓપરેશન દરમિયાન સુરક્ષા દળો અને આતંકવાદીઓ વચ્ચે અથડામણ થઈ. જેમાં સેનાના ત્રણ જવાન ઘાયલ થયા હતા. 23 જુલાઈ: પૂંછમાં એન્કાઉન્ટરમાં એક જવાન શહીદ થયો
જમ્મુ અને કાશ્મીરના પૂંછમાં એલઓસી નજીક બટ્ટાલ સેક્ટરમાં મંગળવારે (23 જુલાઈ) સવારે લગભગ 3 વાગ્યે સેના અને આતંકવાદીઓ વચ્ચે ગોળીબાર થયો હતો. જેમાં લાન્સ નાઈક સુભાષ કુમાર ઘાયલ થયા હતા. તેને હોસ્પિટલમાં દાખલ કરવામાં આવ્યા હતા. પરંતુ સારવાર દરમિયાન તેમનું મોત નિપજ્યું હતું. 22 જુલાઈ: શૌર્ય ચક્ર વિજેતાના ઘર પર આતંકવાદી હુમલો, એક આતંકવાદી માર્યો ગયો
જમ્મુના રાજૌરીના ઘોંઘામાં શૌર્ય ચક્ર વિજેતાના ઘર પર આતંકવાદીઓએ હુમલો કર્યો હતો. આ ઘટના સવારે 3.10 કલાકે બની હતી. હુમલાના સમાચાર મળતાની સાથે જ 63 આરઆર આર્મી કેમ્પની ટુકડીએ જવાબી કાર્યવાહી કરી અને એક આતંકીને ઠાર કર્યો હતો. 18 જુલાઈ: કુપવાડામાં સેનાએ 2 આતંકવાદીઓને ઠાર કર્યા.
કુપવાડાના કેરન વિસ્તારમાં સેનાએ એન્કાઉન્ટરમાં 2 આતંકીઓને ઠાર કર્યા છે. સેનાને અહીં કેટલાક આતંકવાદીઓ છુપાયા હોવાની માહિતી મળી હતી, ત્યારબાદ સર્ચ ઓપરેશન હાથ ધરવામાં આવ્યું હતું. આ દરમિયાન આતંકીઓ અને સેના વચ્ચે અથડામણ શરૂ થઈ ગઈ. 16 જુલાઈ: આતંકવાદીઓ સાથેની અથડામણમાં કેપ્ટન અને પોલીસકર્મી સહિત 5 શહીદ ડોડાના ડેસા વિસ્તારમાં આતંકવાદીઓ સાથેની અથડામણમાં સેનાના કેપ્ટન અને એક પોલીસકર્મી સહિત પાંચ જવાન શહીદ થયા હતા. 15 જુલાઈના રોજ, ડોડાના ડેસા ફોરેસ્ટ બેલ્ટના કલાં ભાટામાં રાત્રે 10:45 વાગ્યે અને પંચાન ભાટા વિસ્તારમાં સવારે 2 વાગ્યે ફરીથી ગોળીબાર થયો હતો. જુલાઈ 14: લાઈન ઓફ કન્ટ્રોલ નજીક ઘૂસણખોરી દરમિયાન 3 આતંકવાદીઓ માર્યા ગયા
જમ્મુ-કાશ્મીરના કુપવાડામાં લાઈન ઓફ કન્ટ્રોલ (LoC) નજીક ઘૂસણખોરી દરમિયાન સુરક્ષા દળોએ ત્રણ આતંકવાદીઓને ઠાર માર્યા હતા. તેમની પાસેથી પિસ્તોલ અને દારૂગોળો મળી આવ્યો હતો. ત્રણેયની ઓળખ જાહેર કરવામાં આવી નથી. 8 જુલાઈ: કઠુઆમાં આતંકવાદી હુમલામાં 5 જવાન શહીદ
8 જુલાઈના રોજ કઠુઆમાં થયેલા આતંકી હુમલામાં એક જુનિયર કમિશન્ડ ઓફિસર (JCO) સહિત 5 જવાનો શહીદ થયા હતા. આતંકવાદીઓએ પહાડ પરથી ઓચિંતો હુમલો કર્યો અને પહેલા આર્મીની ટ્રક પર ગ્રેનેડ ફેંક્યો અને પછી સ્નાઈપર ગનથી ગોળીબાર કર્યો. સેનાએ પણ વળતો ગોળીબાર કર્યો, પરંતુ આતંકીઓ જંગલમાં ભાગી ગયા હતા. જુલાઈ 7: રાજૌરીમાં સુરક્ષા ચોકી પર ફાયરિંગ, આતંકવાદીઓ ફરાર
રાજૌરી જિલ્લાના માંજાકોટ વિસ્તારમાં આતંકીઓએ આર્મી કેમ્પ પર હુમલો કર્યો હતો. આમાં એક જવાન ઘાયલ થયો છે. જવાનોએ જવાબી કાર્યવાહી કર્યા બાદ આતંકીઓ ગાઢ જંગલમાંથી ભાગી ગયા હતા. સેના અને પોલીસે સર્ચ ઓપરેશન શરૂ કરી દીધું છે. 7 જુલાઈ: કુલગામમાં 6 આતંકવાદીઓ માર્યા ગયા, એન્કાઉન્ટરમાં 2 જવાનો શહીદ થયા
કુલગામના મુદ્રાગામ અને ચિન્નીઘમ ફ્રિસાલમાં થયેલા એન્કાઉન્ટરમાં 6 આતંકવાદીઓ માર્યા ગયા હતા. એન્કાઉન્ટરમાં બે જવાન પણ શહીદ થયા હતા. મુદ્રાગામમાં એક-બે આતંકવાદીઓ અને ચિન્નીગામ ફ્રિસલમાં વધુ એક આતંકવાદી છુપાયા હોવાની શક્યતા હતી. જમ્મુ-કાશ્મીર ડીજીપીએ કહ્યું કે આ હુમલામાં સ્થાનિક આતંકવાદીઓ પણ સામેલ હતા. જમ્મુમાં જૈશ અને લશ્કરનું 20 વર્ષ જૂનું નેટવર્ક સક્રિય
જમ્મુ ક્ષેત્રમાં, પાકિસ્તાન તરફી આતંકવાદી સંગઠનો જૈશ-એ-મોહમ્મદ અને લશ્કર-એ-તૈયબાનું સ્થાનિક નેટવર્ક, જેને 20 વર્ષ પહેલાં સેના દ્વારા સખત રીતે નિષ્ક્રિય કરવામાં આવ્યું હતું, તે ફરીથી સંપૂર્ણ તાકાત સાથે સક્રિય થયું છે. પહેલા આ લોકો આતંકવાદીઓનો સામાન લઈ જતા હતા, હવે તેઓ ગામડાઓમાં જ તેમને હથિયારો, દારૂગોળો અને ખાવા-પીવાની વસ્તુઓ પૂરી પાડી રહ્યા છે. હાલમાં અટકાયત કરાયેલા 25 શકમંદોએ પૂછપરછ દરમિયાન કડીઓ આપી છે. આ નેટવર્ક જમ્મુ, રાજૌરી, પૂંચ, રિયાસી, ઉધમપુર, કઠુઆ, ડોડા, કિશ્તવાડ, જમ્મુ અને રામબનના 10 માંથી નવ જિલ્લાઓમાં સ્થાપિત કરવામાં આવ્યું છે. જમ્મુ-કાશ્મીરના પૂર્વ ડીજીપી એસપી વૈદ્યના જણાવ્યા અનુસાર, કલમ 370 હટાવ્યા બાદ પાકિસ્તાન આર્મી અને આઈએસઆઈએ જમ્મુને નિશાન બનાવવાનું શરૂ કર્યું હતું. તેણે બે વર્ષમાં આ નેટવર્ક સક્રિય કર્યું. તેમની મદદથી આતંકવાદીઓએ 2020માં પૂંચ અને રાજૌરીમાં સેના પર મોટા હુમલા કર્યા હતા. ત્યારબાદ ઉધમપુર, રિયાસી, ડોડા અને કઠુઆને નિશાન બનાવવામાં આવ્યું હતું. 2020માં જમ્મુમાંથી સેનાને હટાવીને લદ્દાખ મોકલવામાં આવી, આ આતંકવાદીઓ માટે તક બની
2020 સુધી, જમ્મુ ક્ષેત્રમાં ઘણા બધા સુરક્ષા દળો તૈનાત હતા. જો કે, ગલવાન ઘટના પછી, ચીનના આક્રમણનો જવાબ આપવા માટે અહીંની સેનાને હટાવીને લદ્દાખ મોકલવામાં આવી હતી. આતંકવાદીઓએ ભારતના આ પગલાને તક તરીકે ઉઠાવી લીધો અને કાશ્મીરથી જમ્મુમાં પોતાનો અડ્ડો ખસેડ્યો. તેમનું જૂનું લોકલ નેટવર્ક પહેલેથી જ હતું, જેને એક્ટિવેટ કરવાનું હતું. એવું જ થયું છે. જમ્મુમાં આતંકવાદી ઘટનાઓ સાંપ્રદાયિક રંગ પણ લઈ શકે છે. કાશ્મીરની સરખામણીમાં અહીં વસ્તીની ગીચતા ઓછી છે અને રોડ કનેક્ટિવિટી મર્યાદિત છે. મોટો વિસ્તાર પહાડી છે તેથી અહીં આતંકવાદીઓને મારવામાં સમય લાગી રહ્યો છે. જમ્મુમાં ઘૂસેલા આતંકવાદીઓમાં પાકિસ્તાનના ભૂતપૂર્વ અને વર્તમાન સૈનિકો પણ સામેલ છે
સૈન્ય સૂત્રોએ જણાવ્યું કે રિયાસી હુમલા બાદ માર્યા ગયેલા આતંકવાદીઓ પાસેથી મળેલા હથિયારો અને સેટેલાઇટ ફોન એ વાતનો પુરાવો છે કે નવા આતંકવાદીઓમાં પાકિસ્તાન આર્મીના ભૂતપૂર્વ કે વર્તમાન સૈનિકો પણ સામેલ છે. તેમની હુમલાની પદ્ધતિ પાક આર્મીના પેરા ટ્રુપર ડિવિઝન જેવી છે. સેટેલાઇટ ફોન પણ સંપૂર્ણપણે એન્ડ-ટુ-એન્ડ અન્ક્રિપ્ટેડ છે.

આ પ્રકારના તમામ સમાચાર માટેે App ડાઉનલોડ કરો.