હરિયાણા-પંજાબ સરકારને પરાલી સળગાવવા મામલે સુપ્રીમની ચેતવણી:સુપ્રીમે કહ્યું- કડક આદેશ આપવા મજબુર ન કરો, ખોટી માહિતી આપવા બદલ પંજાબ સરકારની ઝાટકણી કાઢી

દિલ્હીમાં વધી રહેલા વાયુ પ્રદૂષણ મામલે બુધવારે સુપ્રીમ કોર્ટમાં સુનાવણી હાથ ધરવામાં આવી હતી. પંજાબ અને હરિયાણાના મુખ્ય સચિવો કોર્ટમાં હાજર રહ્યા હતા. સુપ્રીમ કોર્ટે ખોટી માહિતી આપવા બદલ પંજાબ સરકારની ઝાટકણી કાઢી. સુપ્રીમ કોર્ટ પણ હરિયાણા સરકારની કાર્યવાહીથી સંતુષ્ટ નથી. કોર્ટે કહ્યું કે અમને કડક આદેશ આપવા મજબુર ન કરો. જસ્ટિસ અભય એસ ઓકા, જસ્ટિસ એ અમાનુલ્લાહ અને જસ્ટિસ એજી મસીહની ખંડપીઠે પંજાબ અને હરિયાણા સરકારના ખેતરોમાં પરાલી સળગાવા અંગેના રોકવાના પ્રયાસોને માત્ર દેખાડો ગણાવ્યા હતા. કોર્ટે કહ્યું કે જો આ સરકારો ખરેખર કાયદો લાગુ કરવામાં રસ ધરાવતી હોય તો ઓછામાં ઓછો એક કેસ ચલાવવો જોઈએ. સુપ્રીમ કોર્ટે તો ત્યાં સુધી કહ્યું કે હવે કેન્દ્ર, પંજાબ અને હરિયાણા સરકારોને યાદ અપાવવાનો સમય આવી ગયો છે કે પ્રદૂષણ મુક્ત વાતાવરણમાં જીવવું એ નાગરિકોનો મૂળભૂત અધિકાર છે. પ્રદૂષણમાં જીવવું એ કલમ 21 હેઠળના મૂળભૂત અધિકારોનું ઘોર ઉલ્લંઘન છે. કેન્દ્ર સરકારે બે અઠવાડિયાનો સમય આપ્યો છે
સુપ્રીમ કોર્ટે કેન્દ્ર સરકારને વાયુ પ્રદૂષણ અંગે પર્યાવરણ સુરક્ષા અધિનિયમ (EPA) હેઠળ નિયમો બનાવવા અને જવાબદાર અધિકારીઓની નિમણૂક કરવા માટે બે અઠવાડિયાનો સમય આપ્યો છે. દિલ્હી-NCRમાં સતત વધી રહેલા પ્રદૂષણને કારણે સુપ્રીમ કોર્ટે કમિશન ફોર એર ક્વોલિટી મેનેજમેન્ટ (CAQM)ને ફટકાર લગાવી છે. કોર્ટે કહ્યું- આયોગે પ્રદૂષણને રોકવા માટે કડક નિયમો લાગુ કરવા માટે કોઈ મિકેનિઝમ તૈયાર નથી કર્યું. પ્રદુષણ રોકવામાં નિષ્ફળ ગયેલા અધિકારીઓ સામે કેમ કોઈ કાર્યવાહી કરવામાં આવી નહીં, તેના બદલે તેમને માત્ર નોટિસ ફટકારવામાં આવી હતી અને જવાબો માંગવામાં આવ્યા હતા. જેના પર કેન્દ્ર સરકારે સુપ્રીમ કોર્ટને આશ્વાસન આપ્યું છે કે 10 દિવસમાં CAQM એક્ટ હેઠળ પરાલી સળગાવનારાઓ સામે કાર્યવાહી કરવામાં આવશે. આ કેસની આગામી સુનાવણી 4 નવેમ્બરે થશે. સુપ્રીમ કોર્ટે હરિયાણા સરકારને બે મહત્વની વાત કહી... 1. તમારા આંકડા દર મિનિટે બદલાતા રહે છે
હરિયાણાના મુખ્ય સચિવે સુપ્રીમ કોર્ટને જણાવ્યું કે રાજ્યમાં પરાલી સળગાવવાની 400 ઘટનાઓ બની છે અને રાજ્યમાં 32 FIR નોંધાઈ છે. સુપ્રીમ કોર્ટે મુખ્ય સચિવને કહ્યું કે તેમના આંકડા દર મિનિટે બદલાઈ રહ્યા છે. સરકાર પસંદ કરી રહી છે. અમુક લોકો પાસેથી જ દંડ લેવામાં આવી રહ્યો છે અને બહુ ઓછા લોકો સામે એફઆઈઆર નોંધાઈ રહી છે. સુપ્રીમ કોર્ટે કહ્યું કે તે કેટલાક લોકો વિરુદ્ધ FIR દાખલ કરવા અને કેટલાક પર નજીવો દંડ લગાવવાને લઈને ચિંતિત છે. 2. તમે ખેડૂતોને શું આપ્યું?
સુપ્રિમ કોર્ટે હરિયાણાના મુખ્ય સચિવને પૂછ્યું - પરાલી વિશે શું થઈ રહ્યું છે અને ખેડૂતોને કંઈ આપવામાં આવ્યું છે? તેના પર મુખ્ય સચિવે કહ્યું કે, પરાલીના નિકાલ માટે લગભગ 1 લાખ મશીનો આપવામાં આવ્યા છે, જેના કારણે પરાલી સળગાવવાની ઘટનાઓમાં ઘટાડો થયો છે. સુપ્રીમ કોર્ટે પંજાબ સરકારને 4 મહત્વની વાત કહી... 1. નજીવો દંડ વસૂલ્યો, 600 લોકોને બચાવ્યા
સુપ્રીમ કોર્ટે પંજાબના મુખ્ય સચિવને કહ્યું કે રાજ્યમાં 1,080 એફઆઈઆર નોંધવામાં આવી હતી, પરંતુ તમે માત્ર 473 લોકો પાસેથી નજીવો દંડ વસૂલ્યો છે. તમે 600 કે તેથી વધુ લોકોને બચાવી રહ્યા છો. સુપ્રિમ કોર્ટે કહ્યું કે આનાથી સ્પષ્ટ થાય છે કે તમે પરાલી સળગાવનારાઓને સંકેત આપી રહ્યા છો કે તેમની વિરુદ્ધ કંઈ કરવામાં આવશે નહીં. છેલ્લા ત્રણ વર્ષથી આવું થઈ રહ્યું છે. 2. એડવોકેટ જનરલે જણાવવું જોઈએ કે કોના નિર્દેશ પર ખોટું નિવેદન આપવામાં આવ્યું
સુપ્રીમ કોર્ટે પંજાબના એડવોકેટ જનરલ અને મુખ્ય સચિવને પણ ફટકાર લગાવી હતી. કોર્ટે કહ્યું કે એડવોકેટ જનરલ જણાવે કે તેમણે કેન્દ્ર પાસેથી મશીનો અને ફંડ માંગવા અંગે કયા અધિકારીની સૂચના પર ખોટું નિવેદન આપ્યું હતું. મુખ્ય સચિવે જણાવવું જોઈએ કે કયા અધિકારીએ એડવોકેટ જનરલને આવું કરવા કહ્યું હતું. અમે તેને નોટિસ પાઠવીશું. સુપ્રીમ કોર્ટે પંજાબ સરકાર વતી હાજર રહેલા વરિષ્ઠ વકીલ અભિષેક મનુ સિંઘવી પર પણ નારાજગી વ્યક્ત કરી હતી. કોર્ટે કહ્યું કે રાજ્ય સરકાર ગંભીર દેખાતી નથી. પહેલા એડવોકેટ જનરલે કહ્યું કે કોઈની વિરુદ્ધ કોઈ કેસ નોંધવામાં આવ્યો નથી. હવે તમે કહી રહ્યા છો કે આ વર્ષે 5 કેસ નોંધાયા છે. સુપ્રિમ કોર્ટે કોઈ કેસ ન નોંધાયો હોવા બાબતે પંજાબ સરકારનું અગાઉનું સોગંદનામું પણ દર્શાવ્યું હતું. 3. શું 9 હજાર લોકોએ માત્ર 9 ઘટનાઓ જ શોધી? સુપ્રીમ કોર્ટે વધુમાં પૂછ્યું કે એફિડેવિટમાં ગ્રામ્ય સ્તરે મોનિટરિંગ કમિટીનો ઉલ્લેખ કરવામાં આવ્યો હતો. સરકારે ક્યારે આદેશ કર્યો? કમિટી ક્યારે બની? તેના નોડલ અધિકારી કોણ છે? આ અંગે એડવોકેટ સિંઘવીએ કહ્યું કે 9 હજાર લોકોની કમિટીઓ બનાવવામાં આવી છે. અમે સંપૂર્ણ વિગતો સાથે એફિડેવિટ ફાઇલ કરીશું. તેના પર સુપ્રીમ કોર્ટે કહ્યું કે 9 હજાર લોકોને માત્ર 9 ઘટનાઓ મળી? 4. તમે ISROના રિપોર્ટને પણ ખોટો કહ્યો, 400 લોકોને મુક્ત કર્યા
સુપ્રીમ કોર્ટે પંજાબ સરકારને ઠપકો આપતા કહ્યું કે તે ઈસરોના સેટેલાઇટ રિપોર્ટને પણ નકારે છે. કમિશન ફોર એર ક્વોલિટી મેનેજમેન્ટ (CAQM)ના વકીલે કહ્યું કે અમૃતસરમાં 400 ઘટનાઓ બની છે. કોર્ટે પૂછ્યું કે હાલમાં કેટલી ઘટનાઓ બની છે. આ અંગે એડવોકેટ સિંઘવીએ જણાવ્યું હતું કે 1510 ઘટનાઓ બની હતી અને 1,080 કેસ નોંધાયા હતા. તેના પર સુપ્રીમ કોર્ટે કહ્યું કે આમાં પણ તમે 400 લોકોને છોડી દીધા. તેના પર સિંઘવીએ કેટલાક રિપોર્ટ ખોટા હોવાની વાત કરી હતી. વાંચો હરિયાણા અને પંજાબમાં વાયુ પ્રદૂષણની સ્થિતિ... પાણીપત ગેસ ચેમ્બર બન્યુ, 17 જિલ્લામાં AQI 300ને પાર
હરિયાણાના જીટી રોડ પર આવતા 6 જિલ્લામાં પ્રદૂષણ ખતરનાક સ્તરે પહોંચી ગયું છે. પાણીપત ગેસ ચેમ્બર બની ગયું છે. અહીં એર ક્વોલિટી ઈન્ડેક્સ (AQI) 500 પર પહોંચી ગયો છે. તેમજ 17 જિલ્લાઓમાં AQI 300થી ઉપર છે, જે ખતરનાક કેટેગરીમાં આવે છે. મંગળવારે કુરુક્ષેત્રનો AQI 400થી ઉપર નોંધાયો હતો. લોકોને શ્વાસ લેવામાં તકલીફ થવી અને સવાર-સાંજ આંખોમાં બળતરા થઈ રહી છે. પંજાબના 2 જિલ્લામાં AQI 200ને પાર કરે છે
પંજાબના 2 શહેરોમાં AQI 200ને પાર કરી ગયો છે. તેમાંથી મંડી ગોવિંદગઢનો AQI 230 અને અમૃતસરનો AQI 203 પર પહોંચી ગયો છે. આ સિવાય લુધિયાણાનો AQI 191 છે. બાકીના જિલ્લાઓનો AQI હાલ 200થી ઓછો છે. વાઈસ ચાન્સેલર બિશ્નોઈએ કહ્યું- 400 AQIમાં ઓક્સિજનની કમી રહે છે
ગુરુ જાંભેશ્વર યુનિવર્સિટી (GJU)ના વાઇસ ચાન્સેલર પર્યાવરણ નિષ્ણાત પ્રો. નરસીરામ બિશ્નોઈ કહે છે કે વાયુ પ્રદૂષણને કારણે વરિષ્ઠ નાગરિકોને સૌથી વધુ સમસ્યાઓનો સામનો કરવો પડે છે. જ્યારે AQI સ્તર 400ની આસપાસ પહોંચે છે ત્યારે ઓક્સિજનની કમી અનુભવાય છે. ધીમે ધીમે ઈન્ફેક્શન અને શ્વાસનળીની બિમારી (શ્વસન નળીઓમાં બળતરા) વધે છે. આંખોમાં બળતરા થાય છે. પ્રદૂષણ માટે એકલુ પરાલી જવાબદાર નથી, પરંતુ તેના ઘણા કારણો છે. પરાલીને ખતરનાક માનવામાં આવે છે કારણ કે તેને બાળવાથી વાતાવરણમાં ઝેરી ગેસ ફેલાય છે. હરિયાણા અને પંજાબ સરકારોએ પરાલી સળગાવતા રોકવા માટે શું પગલાં લીધાં? હરિયાણા સરકારના 3 મોટા દાવા 1. 150 ખેડૂતો સામે FIR, 29ની ધરપકડ
હરિયાણા સરકારનો દાવો છે કે અત્યાર સુધીમાં રાજ્યમાં લગભગ 150 ખેડૂતો વિરુદ્ધ FIR નોંધવામાં આવી છે. જેમાં 29 લોકોની ધરપકડ કરવામાં આવી છે અને 380ને રેડ લિસ્ટ કરવામાં આવ્યા છે. છેલ્લા 24 કલાકની વાત કરીએ તો કુરુક્ષેત્રમાં 46, જીંદમાં 10, સિરસામાં 3, ફતેહાબાદમાં 2 ખેડૂતો વિરુદ્ધ FIR નોંધવામાં આવી છે. સિરસામાં 3 મહિલા ખેડૂતો સામે કેસ નોંધવામાં આવ્યો છે. તપાસમાં બહાર આવ્યું છે કે જમીન મહિલા ખેડૂતો દ્વારા લીઝ પર આપવામાં આવી હતી. હવે પોલીસ ભાડુઆત ખેડૂતોને બોલાવશે. તેમજ, પલવલમાં એક મહિલા ખેડૂત વિરૂદ્ધ પરાલી સળગાવવાનો કેસ નોંધવામાં આવ્યો હતો. કરનાલમાં 5, સોનીપત અને કૈથલમાં 2-2 ખેડૂતોની ધરપકડ કરવામાં આવી છે. જો કે થોડા સમય બાદ તેમને જામીન મળી ગયા હતા. અત્યાર સુધીમાં પરાલી સળગાવનાર ખેડૂતો પાસેથી 8.35 લાખ રૂપિયાનો દંડ વસૂલવામાં આવ્યો છે. 2. કૃષિ વિભાગના 24 અધિકારીઓ અને કર્મચારીઓને સસ્પેન્ડ
કૃષિ વિભાગે 24 અધિકારીઓ અને કર્મચારીઓને સસ્પેન્ડ કર્યા હતા. આ અધિકારીઓમાં એગ્રીકલ્ચર ડેવલપમેન્ટ ઓફિસર (ADO)થી લઈને એગ્રીકલ્ચર સુપરવાઈઝર તેમજ કર્મચારીઓનો સમાવેશ થાય છે. કૃષિ વિભાગના નિયામક રાજ નારાયણ કૌશિક વતી 9 જિલ્લાના અધિકારીઓ સામે કાર્યવાહી કરવામાં આવી છે. જેમાં પાણીપત, જીંદ, હિસાર, કૈથલ, કરનાલ, અંબાલા, ફતેહાબાદ, કુરુક્ષેત્ર અને સોનીપતના અધિકારીઓ અને કર્મચારીઓનો સમાવેશ થાય છે. પરાલી સળગાવવાના વધી રહેલા કિસ્સાઓ પર કાર્યવાહી ન કરવા બદલ અધિકારીઓ અને કર્મચારીઓ સામે કાર્યવાહી કરવામાં આવી છે. 3. ત્રણ વર્ષમાં અડધા જેટલા કેસ ઘટ્યા
રાજ્યમાં 3 વર્ષમાં કેસ અડધા જેટલા ઘટી ગયા છે. 2021માં, રાજ્યમાં 15 સપ્ટેમ્બરથી અત્યાર સુધીમાં 1,508 પરાલી સળગાવવાના કેસ નોંધાયા છે. તે પછી, 2022માં 893 અને 2023માં 714 કેસ નોંધાયા હતા. પરંતુ હવે 2024માં આ આંકડો 665 પર અટકી ગયો છે. આ આંકડો ઘટાડવા માટે સરકાર દ્વારા સતત દરોડા પાડવામાં આવી રહ્યા છે. પંજાબ સરકારે કહ્યું- 10.55 લાખનો દંડ, 394ની રેવન્યુ રેકોર્ડમાં રેડ એન્ટ્રી
પંજાબ પોલીસના સ્પેશિયલ ડીજીપી (કાયદો અને વ્યવસ્થા) અર્પિત શુક્લાનું કહેવું છે કે અત્યાર સુધીમાં પોલીસે પરાલી સળગાવવાના કેસમાં 874 કેસ નોંધ્યા છે. 10.55 લાખનો દંડ ફટકારવામાં આવ્યો છે. 394 ખેડૂતોના રેવન્યુ રેકોર્ડમાં રેડ એન્ટ્રી કરવામાં આવી છે. લોકો સામે માત્ર કાર્યવાહી જ નથી કરવામાં આવી રહી, પરંતુ તેમને જાગૃત પણ કરવામાં આવી રહ્યા છે, જેથી પર્યાવરણને પ્રદૂષિત થવાથી બચાવી શકાય.

આ પ્રકારના તમામ સમાચાર માટેે App ડાઉનલોડ કરો.