ઓમાનની મસ્જિદમાં ગોળીબાર, 4નાં મોત:શિયા મુસ્લિમોનો ધાર્મિક કાર્યક્રમ ચાલી રહ્યો હતો, ઘાયલોમાં પાકિસ્તાની નાગરિકો પણ સામેલ

ઓમાનમાં એક મસ્જિદ પાસે ફાયરિંગમાં 4 લોકોના મોત થયા છે. ત્યાં ઘણા લોકો ઘાયલ થયા છે. મંગળવારે સવારે ઓમાનની રાજધાની મસ્કતમાં વાડી અલ-કબીર મસ્જિદ પાસે ગોળીબાર થયો હતો. અલ જઝીરા અનુસાર, મસ્જિદમાં શિયાઓ સંબંધિત ધાર્મિક કાર્યક્રમ ચાલી રહ્યો હતો. ઓમાનની પોલીસે કહ્યું છે કે, આ વિસ્તારમાં સુરક્ષા વધારવા માટે તમામ જરૂરી પગલાં લેવામાં આવ્યા છે. હાલ આ હુમલો કોણે કર્યો તેની માહિતી સામે આવી નથી. હુમલા સાથે જોડાયેલા ઘણા વીડિયો સોશિયલ મીડિયા પર વાઇરલ થઈ રહ્યા છે. વીડિયો અનુસાર ફાયરિંગ શરૂ થતાં જ મસ્જિદમાં અંધાધૂંધી મચી ગઈ હતી. લોકોએ નજીકની ઇમામ અલી મસ્જિદમાં આશરો લીધો હતો. PAK રાજદૂત ઘાયલ પાકિસ્તાનીઓને મળ્યા
અલ જઝીરાના જણાવ્યા અનુસાર હુમલામાં કેટલાક પાકિસ્તાની નાગરિકો પણ ઘાયલ થયા છે. પાકિસ્તાનના રાજદૂત પણ હોસ્પિટલ પહોંચ્યા અને તેમને મળ્યા. મસ્કતમાં યુએસ એમ્બેસીએ તેના નાગરિકોને સતર્ક રહેવાની સલાહ આપી છે. ઓમાનને મધ્ય પૂર્વનો મધ્યસ્થ કહેવામાં આવે છે. તે ઘણીવાર દેશો વચ્ચે સંધિઓ કરવા અને તણાવની પરિસ્થિતિઓમાં સંતુલન જાળવવાનું કામ કરે છે. ઓમાનમાં ગુનાખોરીનો દર ઘણો ઓછો છે. સામાન્ય રીતે આવા હુમલા અહીં થતા નથી. શિયા મુસ્લિમો મસ્જિદમાં 'આશુરા' મનાવી રહ્યા હતા
ઓમાનમાં શિયા મુસ્લિમો મંગળવારે 'આશુરા'ની ઉજવણી કરી રહ્યા હતા. આ દિવસે શિયાઓ 7મી સદીમાં પ્રોફેટ મુહમ્મદના પૌત્ર ઇમામ હુસૈનની લડાઇમાં શહાદતને યાદ કરે છે. ઘણા શિયા મુસ્લિમો આ દિવસે ઇરાકમાં ઇમામ હુસૈનની દરગાહની મુલાકાત લે છે. તેઓ ઉપવાસ પણ રાખે છે. ઓમાનની 86% વસ્તી મુસ્લિમ છે. તેમાંથી 45% સુન્ની મુસ્લિમો અને 45% ઈબાદી મુસ્લિમો છે. દેશમાં શિયાઓની વસ્તી 5% છે.

આ પ્રકારના તમામ સમાચાર માટેે App ડાઉનલોડ કરો.