સમજૌતા એક્સપ્રેસના કોચ પાકિસ્તાનના કબજામાં છે:પાક. રેલવે અધિકારીએ કહ્યું- ભારત તેનું એન્જિન મોકલીને લઈ જાય, કલમ 370 હટાવ્યા બાદ છેલ્લા 5 વર્ષથી ટ્રેન બંધ છે

ભારત-પાકિસ્તાનના ભાગલાના દર્દને ઓછું કરવા માટે શરૂ કરાયેલી મોહબ્બતની ટ્રેન સમજૌતા એક્સપ્રેસ છેલ્લા 5 વર્ષથી બંધ છે. આ ભારતીય ટ્રેન છેલ્લા પાંચ વર્ષથી પાકિસ્તાનના વાઘા રેલવે સ્ટેશન પર પરત ફરવાની રાહ જોઈ રહી છે. ટ્રેન કેન્સલ કરવાનું કારણ એ હતું કે ભારતે જમ્મુ-કાશ્મીરને વિશેષ દરજ્જો આપતી બંધારણની કલમ 370 રદ્દ કરી દીધી હતી, જે પાકિસ્તાનને ગમ્યું નહોતું. સમજૌતા એક્સપ્રેસ ટ્રેન દર ગુરુવાર અને સોમવારે અટારી (ભારત) અને લાહોર (પાકિસ્તાન) વચ્ચેની 29 કિલોમીટરની મુસાફરી કરતી હતી. અટારી અને વાઘા સ્ટેશન વચ્ચે માત્ર 3.25 કિલોમીટરનું સૌથી ટૂંકું આંતરરાષ્ટ્રીય અંતર કાપનારી આ વિશ્વની એકમાત્ર ટ્રેન છે. જે ટ્રેન 7 ઓગસ્ટ 2019ના રોજ બપોરે 12.30 વાગ્યે 110 ભારતીય અને પાકિસ્તાની મુસાફરો સાથે અટારી પહોંચવાની હતી, તે દિવસે ટ્રેન લગભગ 5 વાગ્યે આવી અને ખાલી રેક (ડબ્બા)ને પાકિસ્તાન પરત મોકલી દેવામાં આવ્યા હતા. તણાવ વચ્ચે પાકિસ્તાન સરકાર તરફથી એક સંદેશ આવ્યો કે ટ્રેનને સ્થગિત કરવાનો નિર્ણય માત્ર એક દિવસ માટે છે. ત્યારબાદ, 8 ઓગસ્ટ 2019ના રોજ, પાકિસ્તાનના રેલવે અધિકારીઓએ અટારી સ્ટેશન માસ્ટરને તે ટ્રેન પરત લઈ જવા માટે ભારતીય રેલવે તંત્રને વાઘા મોકલવા કહ્યું. કારણ કે પાકિસ્તાન રેલવેના બે ડ્રાઈવર અને એક ગાર્ડે સુરક્ષાનું કારણ આપીને ભારતીય વિસ્તારમાં પ્રવેશવાનો ઈન્કાર કરી દીધો હતો. પાકિસ્તાનની સરહદમાં 11 કોચ છે
સમજૌતા એક્સપ્રેસ માટેના કરાર મુજબ, ભારત અને પાકિસ્તાને દર છ મહિને તેમના રેક (ડબ્બા)નો રોટેશનમાં ઉપયોગ કરવો પડશે. પાકિસ્તાની રેકનો ઉપયોગ જાન્યુઆરીથી જૂન અને ભારતીય રેકનો ઉપયોગ જુલાઈથી ડિસેમ્બર દરમિયાન થાય છે. સામાન્ય રીતે રેક તે જ દિવસે અથવા રાત્રિ રોકાણ પછી તેમના દેશમાં પાછા ફરે છે. પરંતુ હવે જ્યારે સમજૌતા એક્સપ્રેસને બંધ કર્યાને લગભગ 5 વર્ષ થઈ ગયા છે, આ ટ્રેનના 11 કોચ હજુ પણ પાકિસ્તાનના વાઘા સ્ટેશન પર રહેલા છે. 4 વખત પત્રો મોકલવામાં આવ્યા હતા, પરંતુ પાકિસ્તાને જવાબ આપ્યો ન હતો
ભારતના વિદેશ મંત્રાલયે પાકિસ્તાન સાથે 4 વખત પત્રવ્યવહાર કર્યો છે, પરંતુ આજે પણ આ કોચ આંતરરાષ્ટ્રીય ભારત-પાકિસ્તાન સરહદથી 500 મીટર દૂર વાઘા રેલવે સ્ટેશન પર પડેલા છે. સમજૌતા એક્સપ્રેસના કોચ પરત કરવા અંગે વાઘા રેલવે સ્ટેશન મેનેજર મોહમ્મદ ઇઝહારે કહ્યું કે અમે ભારતને તેનું એન્જિન મોકલીને કોચ લઈ જવા વિનંતી કરી છે, પરંતુ કોઈ જવાબ મળ્યો નથી. આ તરફ, ભારતીય રેલવે અધિકારીઓનું કહેવું છે કે શિમલા કરાર મુજબ, ભારતીય કોચ પાકિસ્તાની એન્જિન સાથે ગયા હતા, અને તેને પરત કરવાની જવાબદારી તેમની છે. જાણો સમજૌતા એક્સપ્રેસ ક્યારે રદ્દ કરવામાં આવી હતી
આ પહેલીવાર નથી જ્યારે બંને દેશોએ સમજૌતા એક્સપ્રેસને રદ્દ કરવાનો નિર્ણય લીધો હોય. સમજૌતા એક્સપ્રેસને રદ્દ કરવી એ અગાઉ ફેબ્રુઆરી 2019માં કાશ્મીરમાં પુલવામા આતંકવાદી હુમલા માટે પાકિસ્તાનને ભારતની રાજદ્વારી પ્રતિક્રિયાઓમાંની એક હતી. બાબરી મસ્જિદ ધ્વંસ બાદ 13 ડિસેમ્બર 2001ના રોજ સંસદ પર થયેલા હુમલા બાદ ટ્રેન વ્યવહાર બંધ કરી દેવામાં આવ્યો હતો. આ પછી, 27 ડિસેમ્બર 2007ના રોજ પાકિસ્તાનના પૂર્વ વડાપ્રધાન બેનઝીર ભુટ્ટોની હત્યા પછી, આ ટ્રેન ફરી એકવાર બંધ કરવામાં આવી હતી. 2015માં ખેડૂતોના આંદોલન દરમિયાન અને પુલવામા બાદ ટ્રેનને ઘણી વખત રદ્દ કરવામાં આવી હતી. સમજોતા એક્સપ્રેસનો ઈતિહાસ જાણો
શિમલા કરાર હેઠળ 22 જુલાઈ 1976ના રોજ અટારી-લાહોર વચ્ચે સમજૌતા એક્સપ્રેસ ચલાવવામાં આવી હતી. શિમલા કરાર 1972માં ભારતના તત્કાલીન વડાપ્રધાન ઈન્દિરા ગાંધી અને પાકિસ્તાનના ઝુલ્ફીકાર અલી ભુટ્ટો વચ્ચે થયો હતો. શરૂઆતમાં આ ટ્રેન અટારી (ઉત્તરી રેલવે, ફિરોઝપુર ડિવિઝન) થી લાહોર સુધી દોડતી હતી. ભારતીય રેલવે આ ટ્રેનને રવિવારે દિલ્હીથી અટારી અને અટારીથી દિલ્હી વચ્ચે દોડતી હતી, જ્યારે પાકિસ્તાનમાં આ ટ્રેન લાહોરથી અટારી વચ્ચે દોડતી હતી. અટારી સ્ટેશન પર મુસાફરો ટ્રેન બદલતા હતા. 80 ના દાયકાના અંતમાં પંજાબમાં તણાવ વધ્યો ત્યારથી, ભારતીય રેલવેએ તેને અટારીથી ચલાવવાનું બંધ કરી દીધું અને તે જૂની દિલ્હી રેલવે સ્ટેશનથી દોડવાનું શરૂ કર્યું. સમજૌતા એક્સપ્રેસ બ્લાસ્ટ
આ દુર્ઘટના 18 ફેબ્રુઆરી 2007ના રોજ રાત્રે 11.53 કલાકે દિલ્હીથી લગભગ 80 કિલોમીટર દૂર પાણીપતના દિવાના રેલવે સ્ટેશન પાસે બની હતી. વિસ્ફોટોના કારણે ટ્રેનમાં આગ લાગી હતી અને મહિલાઓ અને બાળકો સહિત કુલ 68 લોકોના મોત થયા હતા જ્યારે 12 લોકો ઘાયલ થયા હતા. ઘટનાના લગભગ 3 વર્ષ બાદ NIAએ આ કેસની તપાસ શરૂ કરી હતી. બ્લાસ્ટ બાદ એ જ ટ્રેનના બીજા ડબ્બામાંથી બોમ્બની બે સૂટકેસ મળી આવી હતી. આમાંથી એક ડિફ્યૂઝ થઈ ગયો હતો જ્યારે બીજો નષ્ટ કરવામાં આવ્યો હતો. પ્રારંભિક તપાસમાં જાણવા મળ્યું છે કે આરોપીઓ દેશના વિવિધ મંદિરો પર થયેલા હુમલાઓથી દુઃખી હતા. આ કેસમાં નબ કુમાર સરકાર ઉર્ફે સ્વામી અસીમાનંદ, સુનીલ જોષી ઉર્ફે મનોજ ઉર્ફે ગુરુજી, રામચંદ્ર કલસાંગરા ઉર્ફે રામજી ઉર્ફે વિષ્ણુ પટેલ, સંદીપ ડાંગે ઉર્ફે શિક્ષક, લોકેશ શર્મા ઉર્ફે અજય ઉર્ફે કાલુ, કમલ ચૌહાણ, રમેશ વેંકટ મહાલકર ઉર્ફે પ્રિન્સે અન્ય લોકો સાથે મળીને આ હુમલો કર્યો હતો.

આ પ્રકારના તમામ સમાચાર માટેે App ડાઉનલોડ કરો.