કામે જવાનું કહી ઘરેથી નીકળ્યા બાદ 17 વર્ષની સગીરા લાપતા

સોરઠીયાવાડી સર્કલ વિસ્તારમાંથી 17 વર્ષની સગીરાને તેમની નજીક જ રહી મંડપ સર્વિસનું કામ કરતો શખ્સ લલચાવી ફોસલાવી ભગાડી જતા ભક્તિનગર પોલીસ મથકમાં ફરિયાદ નોંધાઈ હતી.
બનાવ અંગે સોરઠીયાવાડી વિસ્તારમાં રહેતા રિક્ષાચાલકે નોંધાવેલ ફરિયાદમાં આરોપી તરીકે ઈન્દ્રજીત ઉર્ફે દેવો વિક્રમસિંહ પટેલ તેમનું નામ આપી જણાવ્યું હતું કે તેઓ રિક્ષા ડ્રાઈવીંગ કરે છે તેમને સંતાનમાં ત્રણ દીકરીઓ અને એક પુત્ર છે. જેમાં મોટી પુત્રી 17 વર્ષની છે. તેમની સગીર પુત્રી તેમના ઘર પાસે આવેલ કારખાનામાં કામ પર જાય છે. ગઈ તા.23ના તેમની પુત્રી કારખાને ગયા બાદ જમવા માટે ઘરે આવેલ અને તેમના સાસુને કારખાને જવાનુ કહીને ઘરેથી નીકળી ગઈ હતી ત્યારબાદ સાંજના સાત વાગ્યા સુધી પુત્રી ઘરે ન આવતા તેઓ કારખાને ગયેલ પણ ત્યાં તાળુ મારેલ હતુ જેથી તેઓએ કારખાનાના મેનેજરના ઘરે ગયેલ અને તેમની દીકરી વિશે પૂછતા જણાવેલ કે તમારી દિકરી બપોર બાદ કારખાને આવેલ જ નથી. જે બાદ આજુબાજુના વિસ્તારમાં તપાસ કરતા તેમની દીકરી મળી આવેલ ન હતી.
જે બાદ ગઈકાલે તેમની પુત્રી જે કારખાનામાં કામ કરે છે તે કારખાનાની પાછળના ભાગે કોઠારીયા મેઈન રોડ પર આવેલ મોબાઈલની દુકાનના સીસીટીવી તપાસ કરતા તેમની પુત્રી સોરઠીયાવાડી સર્કલ બાજુ જતી જોવામાં આવેલ છે. તેમજ તેમની સામે આવેલ કૈલાશ મંડપ સર્વિસમાં કામ કરતા ઈન્દ્રજીત ઉર્ફે દેવો તેમની પુત્રી સાથે વિડીયોકોલમાં વાત કરતો હોય તેવુ મંડપ સર્વિસના માલિકે જણાવ્યું હતું અને તે બે દિવસ પહેલા જ બધો હિસાબ કરી નિકળી ગયેલ હોવાનું પણ જણાવતા તે તેમની સગીર પુત્રીને લલચાવી ફોસલાવીને ભગાડી ગયાની ફરિયાદ નોંધાવી હતી.બનાવ અંગેની ફરિયાદ પરથી ભક્તિનગર પોલીસે અપહરણની કલમ હેઠળ ગુન્હો નોંધી તપાસ હાથ ધરી હતી.

આ પ્રકારના તમામ સમાચાર માટેે App ડાઉનલોડ કરો.