રાત્રે હોટલેથી જમી પરત ફરી રહેલાં બે મિત્રોને બોલેરોએ ઉડાડયા: નવઘણ કોળીનું મોત

મોરબી રોડ પર આવેલ હોટલેથી જમી પરત ફરી રહેલ બે મિત્રોને અજાણ્યાં બોલેરો ચાલકે હડફેટે લેતાં બાઈકચાલક યુવકનું ઘટનાસ્થળે મોત નીપજ્યું હતું. જ્યારે બાઇક સવાર યુવકને ગંભીર ઇજા પહોંચતા સારવારમાં ખસેડવામાં આવ્યો હતો. બનાવની જાણ થતાં કુવાડવા રોડ પોલીસનો સ્ટાફ દોડી ગયો હતો.
બનાવની વિગત અનુસાર, બેડી વાછકપરમાં રહેતાં નવઘણ ધીરૂભાઇ વાઢુંકીયા (ઉ.વ.18) અને મેહુલ દિનેશભાઇ બાબરીયા (ઉ.વ.20) ગતરોજ સાંજના મોરબી રોડ પર આવેલ મોમાઇ હોટલ પર જમવા માટે ગયાં હતાં.જ્યાંથી બંને બાઇકમાં પરત ફરી રહ્યા હતાં ત્યારે હડાળાના પાટીયા પાસે આવેલ શિવશક્તિ હોટલ નજીક પુરપાટ ઝડપે આવેલા અજાણ્યાં બોલેરો ચાલકે હડફેટે લઈ નાસી છૂટ્યો હતો.અકસ્માતમાં બંને મિત્રોને ગંભીર ઇજા પહોંચી હતી. બનાવ સ્થળે લોકોના ટોળા એકઠાં થઈ ગયા હતાં અને ઇજાગ્રસ્તોને 108 મારફતે સારવારમાં સિવિલ હોસ્પિટલમાં ખસેડવામાં આવ્યા હતાં.
જ્યાં નવઘણ વાઢુંકીયાનું ટૂંકી સારવારમાં મોત નીપજ્યું હતું.બનાવ અંગે જાણ થતાં કુવાડવા રોડ પોલીસનો સ્ટાફ સિવિલ હોસ્પિટલે દોડી ગયો હતો અને જરૂરી કાર્યવાહી કરી અકસ્માત સર્જી નાસી છૂટનાર અજાણ્યાં બોલેરો ચાલકની શોધખોળ આદરી હતી. વધુમાં મૃતક શાકભાજીનો ધંધો કરતો અને ચાર બહેન અને બે ભાઈમાં નાનો હતો.બનાવથી પરિવાર પર આભ તૂટી પડ્યું હતું.

આ પ્રકારના તમામ સમાચાર માટેે App ડાઉનલોડ કરો.