ચૂંટણીના પરિણામો પહેલાં જ PM મોદી એક્શન મોડમાં:આજે એક જ દિવસમાં સાત મીટિંગ કરશે, આગામી 100 દિવસના એજન્ડા પર ફોકસ કરશે

લોકસભા ચૂંટણીમાં મતદાનનો તબક્કો પૂરો થતાંની સાથે જ બહાર આવેલા લગભગ તમામ એક્ઝિટ પોલ મોદી 3.0 સરકારની રચના દર્શાવે છે. જો કે, ચૂંટણીના અંતિમ પરિણામો મતગણતરી થશે ત્યારે 4 જૂનનાં રોજ આવશે. લોકસભા ચૂંટણીના પરિણામ હજુ આવ્યા નથી તેમ છતાં વડાપ્રધાન નરેન્દ્ર મોદી ફુલ એક્શન મોડમાં જોવા મળી રહ્યા છે. કારણ કે પીએમ મોદી એક દિવસમાં સાત મીટિંગો કરી રહ્યા છે. આ મીટિંગ આજે રવિવારે યોજાઈ રહી છે, જેમાં પીએમ મોદી આગામી સરકારના 100 દિવસના એજન્ડા પર ચર્ચા કરશે. આ ઉપરાંત ચક્રવાતની સ્થિતિ, હીટ વેવની સ્થિતિ, પર્યાવરણ દિવસ સહિતના અનેક મુદ્દાઓ પર પણ મીટિંગ યોજાશે. પીએમ મોદીએ હાઈલેવલની મીટિંગ બોલાવી
વડાપ્રધાન નરેન્દ્ર મોદી વિશે કહેવાય છે કે તેઓ ક્યારેય બ્રેક લેતા નથી. દોઢ મહિના સુધી ચાલેલા ચૂંટણી જંગમાં તેઓ સંપૂર્ણપણે સક્રિય દેખાયા હતા. તેમણે દરરોજ વિવિધ રાજ્યોમાં ઘણી ચૂંટણી સભાઓ અને રોડ-શો કર્યા. વ્યસ્ત કાર્યક્રમ હોવા છતાં, તેમણે મહત્ત્વપૂર્ણ બેઠકોમાં હાજરી આપવાનું ચાલુ રાખ્યું. જ્યારે રેમલ ચક્રવાતનું એલર્ટ આવ્યું ત્યારે તેમણે દિલ્હીમાં અધિકારીઓ સાથે ઉચ્ચ સ્તરીય મીટિંગ યોજી હતી. ચૂંટણી પ્રચારનો ઘોંઘાટ બંધ થતાં જ વડાપ્રધાન મોદી કન્યાકુમારીમાં વિવેકાનંદ રોક મેમોરિયલ પહોંચ્યા અને ત્યાં 45 કલાક સુધી ધ્યાન કર્યું. આ દરમિયાન મૌન ઉપવાસ પણ રાખવામાં આવ્યા હતા. તેમણે શનિવારે 45 કલાકનું ધ્યાન પૂરું કર્યું હતું. 100 દિવસના રોડ મેપ પર ચર્ચા
અહીં ચૂંટણીનો ધમધમાટ પૂરો થતાં જ બહાર આવેલા મોટાભાગના એક્ઝિટ પોલમાં ફરી એકવાર મોદી સરકારના સ્પષ્ટ સંકેતો જોવા મળ્યા હતા. જે બાદ વડાપ્રધાન ફરીથી મીટિંગમાં હાજરી આપવાના છે. PM મોદી આજે સાત સભા કરશે. આ દરમિયાન તેઓ દેશના ઘણા ભાગોમાં ચક્રવાત રેમલથી પ્રભાવિત વિસ્તારોની સમીક્ષા કરશે. ઉત્તર-પૂર્વમાં ચક્રવાતની સ્થિતિ અંગે સમીક્ષા બેઠક યોજશે. આ સાથે વડાપ્રધાન હીટવેવની સ્થિતિની પણ સમીક્ષા કરશે. પીએમ મોદીની બેક ટુ બેક મીટિંગ
મળતી માહિતી મુજબ પીએમ મોદી બેક ટુ બેક મીટિંગમાં પર્યાવરણ દિવસની તૈયારીઓ પર પણ ચર્ચા કરશે. આ ઉપરાંત નવી સરકારના 100 દિવસના રોડ મેપ પર પણ ચર્ચા કરવામાં આવશે. નવી સરકારનો 100 દિવસનો એજન્ડા શું હશે તેની પણ ચર્ચા કરવામાં આવશે. વડાપ્રધાન નરેન્દ્ર મોદીએ અધિકારીઓની ઉચ્ચ સ્તરીય મીટિંગ બોલાવી છે. જેમાં આગળની રણનીતિ અંગે ચર્ચા કરવામાં આવશે.

આ પ્રકારના તમામ સમાચાર માટેે App ડાઉનલોડ કરો.