પંજાબમાં ઓવરસ્પીડ બસ ગંદા નાળામાં ખાબકી, 8નાં મોત:24થી વધુ ઘાયલ, સામેથી આવતા વાહનને જોઈને વળાંક લેવા જતાં બેલેન્સ ગુમાવ્યું; 50 લોકો સવાર હતા

પંજાબના ભટિંડા જિલ્લાના તલવંડી સાબોમાં શુક્રવારે એક ખાનગી કંપનીની બસ (PB 11 DB- 6631) કાબૂ બહાર ગઈ અને નાળામાં પડી ગઈ. જેમાં ડ્રાઇવર સહિત 8 લોકોના મોત થયા હતા, જ્યારે 24થી વધુ લોકો ઘાયલ થયા હતા. મૃત્યુ પામેલાઓમાં 2 વર્ષની બાળકી અને તેની માતા પણ સામેલ છે. એક વિકલાંગ વ્યક્તિ, જે હરિયાણાનો રહેવાસી હતો તેનું પણ મૃત્યુ થયું છે. મૃતક ડ્રાઈવરની ઓળખ માનસાના રહેવાસી બલકાર સિંહ તરીકે થઈ છે. ઘાયલોને સિવિલ હોસ્પિટલમાં દાખલ કરવામાં આવ્યા છે. આ અકસ્માત જીવનસિંહ વાલા ગામ પાસે થયો હતો. બસ સરદુલગઢથી ભટિંડા તરફ જઈ રહી હતી. બસમાં લગભગ 50 લોકો સવાર હતા. દુર્ઘટનાની માહિતી મળ્યા બાદ પ્રશાસન અને NDRFની ટીમ ઘટનાસ્થળે પહોંચી અને બચાવ કાર્ય શરૂ કર્યું. ભટિંડાના ડીસી શૌકત અહમદ પારેએ જણાવ્યું કે, બસમાં મુસાફરી કરી રહેલા મુસાફરોએ કહ્યું કે, ડ્રાઈવર બસને વધુ ઝડપે ચલાવી રહ્યો હતો. એટલામાં સામેથી એક મોટી ટ્રોલી આવી. તેનાથી બચવા માટે બસે વળાંક લીધો, જેના કારણે આ અકસ્માત થયો. બસ અકસ્માતની તસવીરો... ગ્રામજનો સીડીઓ લઈને પહોંચ્યા
પોલીસના જણાવ્યા અનુસાર, ન્યૂ ગુરુ કાશી ટ્રાન્સપોર્ટની બસ મુસાફરોને લઈને ભટિંડા તરફ જઈ રહી હતી. બસ અચાનક કાબુ બહાર જઈ જીવનસિંહ વાલા ગામ પાસે નાળામાં પલટી ગઈ હતી. આ પછી બસમાં મુસાફરી કરી રહેલા લોકોમાં ચીસાચીસ મચી ગયો હતો. માહિતી મળતા જ આસપાસના લોકો ઘટનાસ્થળે પહોંચી ગયા હતા. તેમણે આ અંગે પોલીસને પણ જાણ કરી હતી. ભટિંડાના ડીસી શૌકત અહેમદ પારે અને SSP અમ્નીત કૌંડલ પણ ઘટનાસ્થળે પહોંચ્યા હતા. નજીકના ગ્રામજનો સીડીનો ઉપયોગ કરીને સ્થળ પર પહોંચ્યા હતા. લોકોને સીડીઓ દ્વારા બહાર કાઢવામાં આવ્યા હતા. આ પછી તેમને એમ્બ્યુલન્સ દ્વારા તલવંડી સાબો હોસ્પિટલ લઈ જવામાં આવ્યા. અહીં તબીબોએ કેટલાક લોકોને સારવાર બાદ સિવિલ હોસ્પિટલમાં રિફર કર્યા હતા. મૃતકોના મૃતદેહને મોર્ચરીમાં રાખવામાં આવ્યા છે. ડીસીએ કહ્યું- બધાને બહાર કાઢવામાં આવ્યા છે
ડીસી શૌકત અહેમદ પારેએ જણાવ્યું કે, ઘટનાસ્થળે જ મૃત્યુ પામનારાઓમાં એક બાળક, 3 મહિલાઓ અને એક પુરુષનો સમાવેશ થાય છે. હોસ્પિટલમાં મૃત્યુ પામેલાઓમાં બે પુરુષ અને એક મહિલાનો સમાવેશ થાય છે. NDRF ઉપરાંત રોડ સેફ્ટી ફોર્સને પણ ઘટનાસ્થળે મોકલવામાં આવી હતી. NDRF દ્વારા સ્થળને ક્લિયર કરી દેવામાં આવ્યું છે. મને લાગે છે કે દરેકને ત્યાંથી બહાર કાઢવામાં આવ્યા છે. SSP અમ્નીત કૌંડલે જણાવ્યું કે, ઘાયલોએ જણાવ્યું કે બસ સ્પીડમાં હતી. વરસાદ પડી રહ્યો હતો. સામેથી એક ટ્રોલી આવી, જેના કારણે ડ્રાઈવર બસ પર કાબુ ન રાખી શક્યો. ડ્રાઇવરનું મોત થયું હોવાનું પણ જાણવા મળ્યું છે. બેદરકારીના કારણે આ અકસ્માત થયો છે. ધારાસભ્યએ કહ્યું- 5ના ઘટનાસ્થળે જ મોત થયા
દુર્ઘટનાની માહિતી મળતા જ AAP ધારાસભ્ય જગરૂપ સિંહ ગિલ હોસ્પિટલ પહોંચ્યા હતા. તેમણે કહ્યું- 'આ ઘટના ખૂબ જ દુઃખદ છે. 5 લોકોના ઘટનાસ્થળે જ મોત થયા હતા, જ્યારે 3 લોકોના હોસ્પિટલમાં મોત થયા હતા. ઘાયલ થયેલા લોકોની સારી સારવાર માટે CMOને આદેશ આપવામાં આવ્યા છે. ઘાયલો અને મૃતકોને સરકાર દ્વારા આર્થિક સહાય આપવામાં આવશે. આ માટે ડીસી સાથે ચર્ચા કરવામાં આવશે. અમે ભગવાનને પ્રાર્થના કરીએ છીએ કે તમામ ઘાયલો જલ્દી સ્વસ્થ થઈ જાય.

આ પ્રકારના તમામ સમાચાર માટેે App ડાઉનલોડ કરો.