જામનગરમાં ચાલુ બાઈકમાં મહિલાના હાથમાંથી મોબાઇલફોનની ચિલઝડપ

- ડબલ સવારી બાઈકમાં આવેલા ગઠિયાઓની પોલીસ દ્વારા શોધખોળ હાથ ધરાઈજામનગર,તા.26 ઓગષ્ટ 2022,શુક્રવારજામનગરમાં ઇન્દિરા માર્ગ પરથી ડબલ સવારીમાં જઈ રહેલા એક દંપતી પૈકી મહિલાના હાથમાંથી મોબાઇલ ફોન ઝુંટવી લેવાયો હતો, અને ડબલ સવારીમાં આવેલા બે ગઠિયાઓ ભાગી છૂટ્યા હતા. જેની સામે પોલીસ ફરિયાદ નોંધાવાયા પછી પોલીસ તંત્ર બંને ગઠીયાઓને શોધી રહ્યું છે. આ બનાવની વિગત એવી છે કે જામનગરમાં સેતાવાડ વિસ્તારમાં રહેતા જય ભુપેન્દ્રભાઈ ચરાડવા ગઈકાલે પોતાના મોટરસાયકલમાં પત્ની સપનાબેન ને બેસાડીને અંબર ચોકડી થી ગુરૂદ્વારા ચોકડી તરફ ઇન્દિરા માર્ગ પરથી પસાર થઈ રહ્યા હતા, જે દરમિયાન પાછળથી બે અજાણ્યા શખ્સો ડબલ સવારી બાઈકમાં આવ્યા હતા, અને સપના બેનના હાથમાં રહેલો મોબાઇલ ફોન બળજબરીપૂર્વક ઝુંટવીને ભાગી છૂટ્યા હતા. દંપત્તિ દ્વારા બુમા બુમ કરવામાં આવી હતી, પરંતુ બંને ગઠિયાઓ ત્યાંથી ભાગી છુટવામાં સફળ થયા હતા. આથી મામલો સીટી બી. ડિવિઝન પોલીસ મથકમાં લઈ જવાયો હતો, અને મોબાઈલ ઝુંટવી જનાર બંને અજાણ્યા શખ્સો સામે ફરિયાદ નોંધાવતાં સીટી બી. ડિવિઝન પોલીસે સીસીટીવી કેમેરાઓની મદદથી અજાણ્યા શખ્સના વાહનના રજીસ્ટ્રેશન નંબરના આધારે શોધવાનો પ્રયત્ન શરૂ કર્યો છે, અને જુદા જુદા વિસ્તારના સીસીટીવી કેમેરાઓ ચકાસવાનું શરૂ કરાયું છે.

આ પ્રકારના તમામ સમાચાર માટેે App ડાઉનલોડ કરો.