મહારાષ્ટ્ર વિધાનસભા ચૂંટણી-ભાજપ આજે પ્રથમ યાદી જાહેર કરી શકે:50 નામ હશે; મહાવિકાસ અઘાડીમાં 200 બેઠકો પર સર્વસંમતિ બની

મહારાષ્ટ્રમાં વિધાનસભા ચૂંટણીની તારીખો જાહેર કરવામાં આવી છે. ભારતીય જનતા પાર્ટીની કેન્દ્રીય ચૂંટણી સમિતિની બેઠક બુધવારે મળી હતી. જેમાં ઉમેદવારોના નામની ચર્ચા કરવામાં આવી હતી. ઉમેદવારોના નામ ફાઈનલ કરવામાં ભાજપ સૌથી આગળ છે. BJP CECએ દિલ્હીની બેઠકમાં 110 નામ નક્કી કર્યા છે. તેમાંથી શુક્રવારે દિલ્હીથી 50 થી 60 નામોની પ્રથમ યાદી જાહેર થઈ શકે છે. આમાંથી મોટાભાગના સીટીંગ ધારાસભ્યો હશે. જોકે કેટલીક સીટો પર ચહેરા બદલાઈ શકે છે. કેટલાક મંત્રીઓની ટિકિટ પણ કપાઈ શકે છે. સૂત્રોનું કહેવું છે કે ભાજપ તેના સ્ટેન્ડ પર અડગ છે કે તે 150થી ઓછી સીટો પર ચૂંટણી નહીં લડે. આ પછી, બાકીની 138 બેઠકો શિંદે સેના અને અજીત જૂથ વચ્ચે વહેંચવામાં આવશે. ચૂંટણી પંચે મહારાષ્ટ્ર વિધાનસભા ચૂંટણીની તારીખ 15 ઓક્ટોબરે જાહેર કરી હતી. રાજ્યની તમામ 288 બેઠકો પર એક જ તબક્કામાં 20 નવેમ્બરે મતદાન થશે. પરિણામ 23મી નવેમ્બરે જાહેર થશે. મહારાષ્ટ્રમાં મહાગઠબંધન સરકારમાં સામેલ મુખ્ય પક્ષો ભાજપ, શિવસેના શિંદે અને NCP (અજિત) છે. શરદ પવારે કહ્યું- સીટ વહેંચણી અંગે નિર્ણય પાટીલ લેશે
નેશનલિસ્ટ કોંગ્રેસ પાર્ટી (શરદચંદ્ર પવાર)ના વડા શરદ પવારે ગુરુવારે જણાવ્યું હતું કે મહારાષ્ટ્રમાં યોજાનારી વિધાનસભા ચૂંટણી માટે કુલ 288 બેઠકોમાંથી 200 પર મહા વિકાસ અઘાડી (MVA)ના ત્રણ સહયોગીઓ વચ્ચે સર્વસંમતિ સધાઈ ગઈ છે. MVAમાં NCP (SP), કોંગ્રેસ અને શિવસેના (UBT)નો સમાવેશ થાય છે. મહારાષ્ટ્રના સતારામાં પવારે કહ્યું કે હરિયાણાની ચૂંટણીના પરિણામોની મહારાષ્ટ્ર ચૂંટણી પર કોઈ અસર નહીં થાય. હરિયાણામાં કોંગ્રેસને ભાજપથી હારનો સામનો કરવો પડ્યો છે. એક પ્રશ્નના જવાબમાં તેમણે કહ્યું, 'હું સીટ વહેંચણીની ચર્ચામાં સીધો સામેલ નથી.' જયંત પાટીલ (NCP-SP રાજ્ય એકમના વડા) પક્ષનું પ્રતિનિધિત્વ કરી રહ્યા છે. તેમની પાસેથી પ્રાપ્ત માહિતી અનુસાર, કુલ 288 બેઠકોમાંથી 200 બેઠકો પર સમજૂતી થઈ ગઈ છે. જ્યારે પૂછવામાં આવ્યું કે NCP (SP) સતારા જિલ્લામાં કઈ બેઠકોની માગ કરશે, ત્યારે તેમણે કહ્યું કે પાટીલ બેઠકોની વહેંચણી અંગે નિર્ણય લેશે. કોંગ્રેસ CEC 20 ઓક્ટોબરે મળશે
મહારાષ્ટ્ર કોંગ્રેસ 20 ઓક્ટોબરે કેન્દ્રીય ચૂંટણી સમિતિની બેઠક યોજશે, જેમાં રાજ્યના ઉમેદવારોની યાદીને અંતિમ સ્વરૂપ આપવામાં આવશે. બુધવારે દિલ્હીમાં હિમાચલ ભવનમાં મહારાષ્ટ્ર ચૂંટણી સ્ક્રિનિંગ કમિટીની બેઠક બાદ વિધાનસભા ચૂંટણીના પાર્ટી પ્રભારી રમેશ ચેન્નીથલાએ કહ્યું કે અમે 20 ઓક્ટોબરે બીજી બેઠક કરીશું અને બધું નક્કી કરવામાં આવશે.

આ પ્રકારના તમામ સમાચાર માટેે App ડાઉનલોડ કરો.