લોકસભાની ચૂંટણીમાં 15માંથી 11 સેલિબ્રિટી જીત્યા:હેમા માલિની સૌથી વધુ માર્જિનથી જીતી, કંગના, અરુણ ગોવિલની જીત; રાજ બબ્બર, નિરહુઆ, પવન સિંહ હાર્યા

લોકસભા ચૂંટણી 2024ની 542 બેઠકોના પરિણામો જાહેર થઈ ગયા છે. આ વખતે 15 સેલિબ્રિટીએ લોકસભા ચૂંટણી લડી હતી, જેમાંથી 11 સેલિબ્રિટીએ જીત મેળવી છે. વિજેતાઓમાં કંગના રનૌત, હેમા માલિની, શત્રુઘ્ન સિંહા, રવિ કિશન, મનોજ તિવારી જેવા નામો સામેલ છે, જ્યારે ભોજપુરી સ્ટાર્સ પવન સિંહ અને નિરહુઆ ખરાબ રીતે હારી ગયા છે. આ ચૂંટણીમાં સૌથી મોટી જીત હેમા માલિનીને મળી છે, જેમણે 2,93,407 મતોથી જીત મેળવી છે. બીજી તરફ રાજ બબ્બર અને નિરહુઆ જેવા કલાકારોની હાર થઈ હતી. સેલિબ્રિટી ઉમેદવારો અને તેમની જીત અને હારના પરિણામો પર એક નજર નાખો- ડ્રીમ ગર્લ હેમા માલિનીને ઉત્તર પ્રદેશની મથુરા બેઠક પરથી ભાજપની ટિકિટ મળી હતી. તેમની સામે કોંગ્રેસના નેતા મુકેશ ધનગર હતા. હિમાચલ પ્રદેશના મંડીથી ભાજપની ટિકિટ મેળવનાર કંગના રનૌતે કોંગ્રેસના નેતા વિક્રમાદિત્ય સિંહને હરાવ્યા છે. TMC વતી શત્રુઘ્ન સિન્હાએ પશ્ચિમ બંગાળની આસનસોલ બેઠક પરથી ભાજપના નેતા એસએસ અહલુવાલિયાને 59,564 મતોથી હરાવ્યા છે. લોકપ્રિય ટેલિવિઝન શો રામાયણમાં ભગવાન શ્રી રામની ભૂમિકા ભજવીને પ્રખ્યાત થયેલા અભિનેતા અરુણ ગોવિલ ઉત્તર પ્રદેશના મેરઠથી જીત્યા છે. ભાજપની ટિકિટ પર ચૂંટણી લડનાર અરુણ ગોવિલે સપા નેતા સુનીતા વર્માને 10,585 મતોથી હરાવ્યા હતા. નોર્થ-ઈસ્ટ દિલ્હી સીટ પર ભારતીય જનતા પાર્ટી તરફથી ચૂંટણી લડી રહેલા મનોજ તિવારીએ કોંગ્રેસના નેતા કન્હૈયા કુમારને હરાવ્યા છે. મનોજ 138778 મતોની સરસાઈથી જીત્યા. ભોજપુરી સ્ટાર રવિ કિશન ઉત્તર પ્રદેશમાં ભાજપની ગોરખપુર બેઠક પરથી સમાજવાદી પાર્ટીના નેતા કાજલ નિષાદને હરાવીને જીત્યા છે. અભિનેત્રી સાયોની ઘોષ પશ્ચિમ બંગાળના જાદવપુરથી ચૂંટણી લડી હતી. તેમણે ભાજપના નેતા અનિર્બાન ગાંગુલીને 2,58,201 મતોથી હરાવ્યા છે. બંગાળી સિનેમાની અભિનેત્રી શતાબ્દી રોયે ભાજપના નેતા દેવતનુ ભટ્ટાચાર્યને મોટા અંતરથી હરાવ્યા છે. અભિનેત્રીએ પશ્ચિમ બંગાળના બીરભૂમથી તૃણમૂલ કોંગ્રેસની ટિકિટ પર ચૂંટણી લડી હતી. બંગાળી અભિનેત્રી રચના બેનર્જીએ પશ્ચિમ બંગાળની હુગલી સીટ પર જીત મેળવી છે. તેણે તૃણમૂલ કોંગ્રેસ વતી ચૂંટણી લડી હતી. તેમની સામે અભિનેત્રી અને રાજકારણી લોકેટ ચેટર્જી હતા. બંગાળી સિનેમામાં દેવ તરીકે જાણીતા અભિનેતા અધિકારી દીપકે પશ્ચિમ બંગાળની ઘાટાલ બેઠક પણ જીતી છે. તૃણમૂલ કોંગ્રેસ વતી ચૂંટણી લડનાર અભિનેતાનો સામનો ભાજપના નેતા હીરન ચેટર્જી સામે હતો. લોકસભા ચૂંટણીમાં આ સેલેબ્સને હારનો સામનો કરવો પડ્યો-
વરિષ્ઠ અભિનેતા રાજ બબ્બરે હરિયાણાના ગુરુગ્રામથી ચૂંટણી લડી હતી. તેમની સામે ભાજપના નેતા રાવ ઈન્દ્રજીત સિંહ હતા. રાવ ઈન્દ્રજીત સિંહે રાજ બબ્બરને 75079 મતોથી હરાવ્યા છે. ભોજપુરી સ્ટાર પવન સિંહ બિહારની કરકટ સીટ પરથી 99,256 વોટથી ચૂંટણી હારી ગયા છે. તેઓ કરકટથી અપક્ષ ઉમેદવાર તરીકે ચૂંટણી લડ્યા હતા. આ સીટ પર કોમ્યુનિસ્ટ પાર્ટીના નેતા રાજા રામ સિંહ જીત્યા છે. ભારતીય જનતા પાર્ટી તરફથી ચૂંટણી લડનાર દિનેશ લાલ યાદવ નિરહુઆ પણ 1,61,035 મતોથી હારી ગયા છે. તેમની સામે સપા નેતા ધર્મેન્દ્ર યાદવ હતા.

આ પ્રકારના તમામ સમાચાર માટેે App ડાઉનલોડ કરો.