સોનું લેવા નીકળેલા SRP જવાનની પત્નીના રૂ.1.70 લાખની તફડંચી
ટ્રાફિક પોલીસ દ્વારા શરૂ કરાયેલી રિક્ષા નોંધણી ઝુંબેશની જાણે કોઇ અસર જ ન હોય તેમ રિક્ષા ગેંગ શહેરમાં એક પછી એક બનાવોને અંજામ આપી રહી છે. ત્યારે રિક્ષા ગેંગે વધુ બે બનાવને અંજામ આપ્યાની પોલીસમાં ફરિયાદ નોંધાઇ છે.
ઘંટેશ્વર એસઆરપીમાં ફરજ બજાવતા ભૂરાભાઇ કરશનભાઇ ધ્રાંગાના પત્ની મધુબેને નોંધાવેલી ફરિયાદ મુજબ, મધુબેનને સોનાના ચેઇનની ખરીદી કરવી હોય મંગળવારે સવારે સાડા આઠ વાગ્યે ઘંટેશ્વરથી પ્લાસ્ટિકની થેલીમાં રૂ.1.70 લાખની રોકડ પર્સમાં રાખીને નીકળ્યા હતા.
સિટી બસમાં બજરંગવાડી દીકરીને ત્યાં ગયા હતા. ત્યાંથી ત્રિકોણબાગ જવા માટે બજરંગવાડી ચોકમાંથી રૂ.100નું ભાડું નક્કી કરી રિક્ષા કરી હતી. દરમિયાન રિક્ષા થોડે આગળ જતા ચાલકે પોતાને પૂછીને મહિલા, પુરુષ અને એક બાળકને રિક્ષામાં બેસાડ્યા હતા. બાદમાં રિક્ષા હોસ્પિટલ પાસે પહોંચતા ચાલકે ભાડું લીધા વગર મહિલા, પુરુષ અને બાળકને ઉતારી દીધા હતા અને પોતાને ત્રિકોણબાગ ઉતારી હતી.
ચાલકને ભાડું ચૂકવતા તે તુરંત જ ત્યાંથી જતો રહ્યો હતો. બાદમાં પોતાની પાસે રહેલી પ્લાસ્ટિકની થેલી ચેક કરતા તેમાં રાખેલું રોકડ સાથેનું પર્સ જોવા મળ્યું ન હતું. જે પર્સ રિક્ષામાં વચ્ચેથી બેઠેલી મહિલા, પુરુષે જ નજર ચૂકવી ચોરી કરી હોવાનું માલૂમ પડ્યું હતું. બાદમાં બનાવ અંગે રિક્ષાચાલક, મહિલા સહિત ત્રણ સામે પ્રદ્યુમ્નનગર પોલીસમાં ફરિયાદ નોંધાવી છે.
આ પ્રકારના તમામ સમાચાર માટેે
App ડાઉનલોડ કરો.