આજીડેમ ચોકડી પાસે અજાણ્યા વાહન ચાલકે બાઈકને અડફેટે લેતાં કોન્ટ્રાકટરનું મોત

કોઠારિયામાં રહેતો અને ક્નસ્ટ્રક્શનનો વ્યવસાય કરતો યુવક ઘરે જતો હતો ત્યારે માર્ગમાં કાળ આંબી ગયો હતો. આજીડેમ ચોકડી પાસે અજાણ્યા વાહન ચાલકે અડફેટે લેતાં યુવકનું મોત નિપજ્યું હતું.
પ્રાપ્ત વિગત મુજબ કોઠારિયા ગામમાં રહેતા જયેશભાઈ ગોરધનભાઈ રામાણી (ઉ.વ.43) તેઓ ગત તા.2/5/2024ના રોજ રાત્રિના આઠેક વાગ્યાની આસપાસ બાઈક લઈ કામ પરથી પોતાનાં ઘરે પરત જતાં હતાં દરમિયાન આજીડેમ ચોકડી પાસે મુરલીધર વે બ્રિજ ખોખડદળ પાસે પહોચતા અજાણ્યા વાહન ચાલકે અકસ્માત સર્જી બાઈકને અડફેટે લીધું હતું. અકસ્માતને પગલે બાઈક પર સવાર જયેશભાઇ રસ્તા પર ફંગોળાયા હતાં અને પટકાવાને લીધે ઈજાગ્રસ્ત થયા હતાં. બાદ ઈજાગ્રસ્ત હાલતમાં સારવાર અર્થે રાજકોટ સિવિલ હોસ્પિટલમાં ખસેડવામાં આવ્યા હતાં. ત્યાંથી વધુ સારવાર માટે ગોકુલ હોસ્પિટલમાં રિફર કરવામાં આવ્યાં હતાં.
જ્યાં સારવાર કારગત નીવડી ન હતી. તબીબે બ્રેઇન ડેડ જાહેર કર્યા હતા. જેથી જયેશભાઈના પરિવારજનો દ્વારા અંગોનું દાન કરવાનો નિર્ણય કરવામાં આવ્યો હતો. બાદ જયેશભાઈના અંગોનું દાન કરવામાં આવ્યું હતું. તેમનાં દાનથી સાત વ્યકિતઓને નવજીવન મળશે.તેઓને ક્નસ્ટ્રક્શનનો વ્યવસાય હતો. એક દીકરો અને એક દિકરીએ પિતાની છત્રછાયા ગુમાવતા તેઓના પરિવારમાં કલ્પાંત છવાયો છે. બનાવની જાણ આજીડેમ પોલીસને થતાં તુરંત ઘટના સ્થળે દોડી જઈ અજાણ્યા વાહન ચાલકની શોધખોળ શરૂ કરી હતી.

આ પ્રકારના તમામ સમાચાર માટેે App ડાઉનલોડ કરો.