કન્નડ અભિનેતા દર્શન થૂગુદીપાની ફેનના મર્ડર કેસમાં ધરપકડ:પુત્ર વિનીશને મળી અભદ્ર ટિપ્પણી, કહ્યું, ‘હું 15 વર્ષનો છું, મને શ્રાપ આપવાથી કંઈ નહીં બદલાય’

કન્નડ સિનેમાના લોકપ્રિય અભિનેતા દર્શન થૂગુદીપાની 11 જૂને પોતાના જ ફેનની હત્યા કરવા બદલ ધરપકડ કરવામાં આવી છે. જો કે તેની ધરપકડના કારણે તેમના પુત્ર વિનીશ દર્શનને ચાહકોના ગુસ્સાનો સામનો કરવો પડી રહ્યો છે. દર્શને સોશિયલ મીડિયા પોસ્ટ દ્વારા જણાવ્યું છે કે તેને લોકો તરફથી અભદ્ર ટિપ્પણીઓ મળી રહી છે. વિનીશ દર્શને તાજેતરમાં ઇન્સ્ટાગ્રામના સ્ટોરી સેક્શનમાં લખ્યું હતું કે, મારા પિતા વિરુદ્ધ વાંધાજનક ભાષા અને અભદ્ર ટિપ્પણીઓનો ઉપયોગ કરવા બદલ આભાર. તમે લોકોએ એ પણ નોંધ્યું નથી કે હું માત્ર 15 વર્ષનો છું અને મારી પણ લાગણીઓ છે, તેના માટે પણ તમારો આભાર. આ ખરાબ સમયમાં મારા માતા-પિતાને સમર્થનની જરૂર છે, મને શ્રાપ આપવાથી કંઈપણ બદલાશે નહીં. આપ સૌનો આભાર. દર્શન કુમાર અને તેની ગર્લફ્રેન્ડ પવિત્રા ગૌડાની બેંગલુરુમાં મેડિકલ સ્ટોરમાં કામ કરતા યુવક રેણુકાસ્વામીની હત્યાના આરોપમાં ધરપકડ કરવામાં આવી છે. રેણુકાસ્વામીનો મૃતદેહ 8-9 જૂનની વચ્ચેની રાત્રે એક નાળામાંથી મળી આવ્યો હતો. પોલીસે જ્યારે તપાસ શરૂ કરી તો પહેલા એક્ટર દર્શન કુમારની નજીકના અને પછી દર્શનના નામ સામે આવ્યા. રેણુકાસ્વામીની જે જગ્યાએ હત્યા કરવામાં આવી હતી ત્યાં દર્શન કુમાર અને તેની ગર્લફ્રેન્ડ પવિત્રા પણ હાજર હતા. ક્રાઈમ સીન નજીકના સીસીટીવીમાં જોવા મળતાં દર્શન અને પવિત્રાની ધરપકડ કરવામાં આવી છે. બીજી તરફ, એવી વાત સામે આવી છે કે દર્શને તેના ત્રણ સાગરિતોને 15 લાખ રૂપિયાની ઓફર કરી હત્યાનો આરોપ માથે લેવા કહ્યું હતું. જોકે હવે તે પોલીસ કસ્ટડીમાં છે.જાન્યુઆરી 2024માં અભિનેત્રી પવિત્રા ગૌડાએ દર્શન થૂગુદીપાની સાથે કેટલીક તસવીરો શેર કરી હતી અને જણાવ્યું હતું કે તેના અને દર્શનના સંબંધોના 10 વર્ષ પૂર્ણ થયા છે. આ દરમિયાન દર્શનની પત્ની વિજય લક્ષ્મીએ પવિત્રા સામે કાયદેસરની કાર્યવાહી કરવાની વાત કરી હતી. દર્શન થૂગુદીપાના પ્રશંસક રેણુકાસ્વામીના એક્સ્ટ્રા મેરિટલ અફેરના સમાચાર બહાર આવ્યા બાદ તેને દુઃખ થયું હતું. તે પવિત્રાને સતત વાંધાજનક મેસેજ મોકલીને તેને દર્શનથી દૂર રહેવાનું કહેતો હતો. શરૂઆતમાં અભિનેત્રીએ સંદેશાઓની અવગણના કરી, પરંતુ પછીથી રેણુકાસ્વામીએ તેને ધમકીભર્યા સંદેશા મોકલવાનું શરૂ કર્યું. જ્યારે પવિત્રાએ આ અંગે દર્શનને ફરિયાદ કરી તો તેણે તેની ફેન ક્લબના સભ્ય સાથે મળીને રેણુકાસ્વામીની હત્યા કરાવી.

આ પ્રકારના તમામ સમાચાર માટેે App ડાઉનલોડ કરો.