રાજકારણ કરતાં ફિલ્મોમાં કામ કરવું સહેલું છે- કંગના:કહ્યું, ’18 વર્ષ પહેલા પણ મને રાજકારણમાં આવવાની ઓફર મળી હતી, પરંતુ હું ત્યારે તૈયાર નહોતી’

કંગના રનૌતે વર્ષ 2006માં ફિલ્મ 'ગેંગસ્ટર'થી બોલિવૂડમાં એન્ટ્રી કરી હતી. ઈન્ડસ્ટ્રીમાં 18 વર્ષ પૂરાં કર્યાં બાદ કંગનાએ હવે રાજકારણમાં એન્ટ્રી કરી છે. હિમાચલના મંડીથી સાંસદ તરીકે ચૂંટાયેલી કંગના રનૌતે તાજેતરના એક ઈન્ટરવ્યૂમાં ખુલાસો કર્યો હતો કે તેને રાજનીતિમાં જોડાવાની ઓફર તેની ડેબ્યૂ ફિલ્મ 'ગેંગસ્ટર' પછી જ મળી હતી. અભિનેત્રીએ એ પણ જણાવ્યું કે તે કેવી રીતે તેની રાજકીય અને અભિનય કારકિર્દી વચ્ચે સંતુલન જાળવશે. 'ગેંગસ્ટર' રિલીઝ થયા પછી પણ આવી હતી ઓફર
'ધ હિમાચલ પોડકાસ્ટ' સાથે વાત કરતી વખતે, કંગનાએ ખુલાસો કર્યો કે તેના પરિવારના સભ્યોને સ્થાનિક રાજકીય નેતાઓ તરફથી ઘણી વખત રાજકારણમાં જોડાવાની ઓફર મળી છે. અભિનેત્રીએ કહ્યું, 'આ પહેલીવાર નથી જ્યારે મને રાજકારણમાં જોડાવા માટે સંપર્ક કરવામાં આવ્યો હતો. મારી ડેબ્યૂ ફિલ્મ 'ગેંગસ્ટર' પછી તરત જ મને ટિકિટ ઓફર કરવામાં આવી હતી. મારા દાદા પણ ધારાસભ્ય હતા. તેથી મારો પરિવાર પહેલેથી જ રાજકારણમાં ઘણો સક્રિય છે. મારા પિતાને પણ ઓફર મળી. જ્યારે મારી બહેન રંગોલી એસિડ એટેકમાં બચી ગઈ ત્યારે તેને પણ રાજકારણમાં જોડાવાની ઓફર મળી. હું મંડીના લોકોને નિરાશ નહીં કરું
કંગનાએ ઈન્ટરવ્યૂમાં આગળ કહ્યું, '2019માં પણ મારો સંપર્ક કરવામાં આવ્યો હતો. જો હું આ માટે તૈયાર ન હોત તો હું આટલી મુશ્કેલી સહન કરી જ ન હોત. હું તેને માત્ર વિરામ તરીકે જોઈ રહી નથી. આ ખૂબ જ મુશ્કેલ નિર્ણય હતો અને હું તેના માટે તૈયાર છું. મને લાગે છે કે ભગવાને મને આ તક આપી છે. મંડીના લોકોએ મને આ તક એટલા માટે આપી છે કારણ કે તેઓ એવું ઈચ્છે છે જે તેમને કોઈ ભ્રષ્ટાચારીઓથી બચાવે. હું તેમને નિરાશ નહીં થવા દઉં. 'રાજકારણ કરતાં ફિલ્મોમાં કામ કરવું સહેલું છે'
રાજનીતિ અને અભિનય વચ્ચે સંતુલન જાળવવા વિશે વાત કરતાં કંગનાએ કહ્યું, 'હું એવી વ્યક્તિ છું જે તેના પેશનને અનુસરે છે. હું ફિલ્મ ઉદ્યોગમાં અભિનેતા, લેખક, દિગ્દર્શક અને નિર્માતા પણ છું. તેવી જ રીતે, મારી રાજકીય કારકિર્દીમાં મારાથી જે થઈ શકે તે કરીશ. હા, હું માનું છું કે રાજકારણ કરતાં ફિલ્મોમાં કામ કરવું સહેલું છે. અહીં ઘણી મહેનત કરવી પડે છે.' કંગના પહેલા જ સંકેત આપી ચૂકી છે કે તે રાજકારણ માટે ફિલ્મો છોડી શકે છે. જો કે વર્ક ફ્રન્ટ પર તેની આગામી ફિલ્મ 'ઇમરજન્સી' છે. આમાં તે દેશના પૂર્વ વડાપ્રધાન ઈન્દિર ગાંધીના રોલમાં જોવા મળશે. આ ફિલ્મનું દિગ્દર્શન કંગનાએ પોતે કર્યું છે.

આ પ્રકારના તમામ સમાચાર માટેે App ડાઉનલોડ કરો.