હમાસના યુદ્ધ વચ્ચે ઇઝરાયલમાં વધુ એક યુદ્ધનો ડર:હિઝબુલ્લાહ સતત રોકેટ ઝીંકી રહ્યું છે; મોટા હુમલાની શક્યતાને જોતા ઇઝરાયલના લોકો ખાવા-પીવાનું ભેગુ કરી રહ્યા છે

7 ઓક્ટોબર, 2023ના રોજ હમાસના હુમલા પછી ઇઝરાયલ-હમાસ યુદ્ધ શરૂ થયાને 9 મહિના થઈ ગયા છે, તેમ છતાં હુમલાની અસર ઇઝરાયલમાં દેખાઈ રહી છે. ઇઝરાયલમાં તમામ સરકારી કચેરીઓ ખુલ્લી છે પરંતુ કર્મચારીઓની સંખ્યા ઓછી છે કારણ કે ઘણા લોકોને રિઝર્વ લશ્કરી સેવા માટે બોલાવવામાં આવ્યા છે. ઘણી ઇમારતો અને કાર પર પહેલા કરતાં વધુ ઇઝરાયલી ધ્વજ દેખાય છે. તેમજ મેસેજ લખવામાં આવ્યો છે કે 'હમ સાથ હે, હમ જીતેગેં'. ઇઝરાયલની દરેક ગલી અને દિવાલ પર હમાસ દ્વારા પકડાયેલા લોકોના પોસ્ટર દેખાય છે, જેમાં લખ્યું છે - 'અપહરણ'. હુમલા બાદ હમાસે 250 લોકોને બંધક બનાવ્યા હતા, જેમાંથી 100ને મુક્ત કરવામાં આવ્યા હતા, જ્યારે 100 વધુ લોકોના પરિવારજનો તેમના પ્રિયજનોની મુક્તિની રાહ જોઈ રહ્યા છે. ઇઝરાયલના લોકો બંકરોમાં ખાવા-પીવાનું ભેગુ કરી રહ્યા છે
આ દરમિયાન, ઇઝરાયલમાં વધુ એક યુદ્ધની શક્યતા જણાઈ રહી છે. હિઝબુલ્લાહના હુમલા વધ્યા બાદ ઉત્તરી ગાઝાના ઘણા વિસ્તારોને ખાલી કરાવવામાં આવ્યા છે. ત્યાંના લોકોને દક્ષિણ ઇઝરાયલની હોટલોમાં મોકલવામાં આવ્યા છે. હિઝબુલ્લાહ દ્વારા મોટા હુમલાની શક્યતા જોતા, ઇઝરાયલીઓએ તેમના ઘરના બંકરોમાં ખોરાક, પાણી અને અન્ય વસ્તુઓનો સંગ્રહ કરવાનું શરૂ કર્યું છે. ઇઝરાયલના નેશનલ ઈલેક્ટ્રિસિટી ગ્રીડના અધિકારી શૌલ ગોલ્ડસ્ટીને કહ્યું કે જો ઉત્તરમાં યુદ્ધ થાય તો અમે વીજળીનું વચન આપી શકીએ નહીં. તેમના નિવેદનથી ઇઝરાયલમાં જનરેટરના વેચાણમાં વધારો થયો. ગાઝા યુદ્ધ પછી ઇઝરાયલમાં જનરેટરની આયાત વધી છે. તે પહેલાના 5% થી વધીને હવે 25% થયુ છે. મોટાભાગની આયાત અમેરિકા અને બ્રિટનથી થઈ રહી છે. ઇઝરાયલના હુમલામાં હિઝબુલ્લાહ કમાન્ડરના મોતથી તણાવ વધ્યો
ઇઝરાયલે બુધવારે દક્ષિણ લેબેનોનના ટાયરે શહેર પર હુમલો કર્યો હતો. જેમાં હિઝબુલ્લાહનો એક કમાન્ડર મોહમ્મદ નિમાહ નાસિર (હજ અબુ નિમાહ) માર્યો ગયો છે. હિઝબુલ્લાએ પણ કમાન્ડરના મોતની પુષ્ટિ કરી છે. આ પછી, લેબનીઝ પ્રદેશમાંથી ઇઝરાયલના ઉત્તરીય ભાગમાં રોકેટ ઝીંકવામાં આવ્યા હતા. જો કે જાનમાલના નુકશાનના કોઈ સમાચાર નથી. આ હુમલા પછી, ઇઝરાયલના સંરક્ષણ પ્રધાન યોવ ગેલેન્ટે કહ્યું કે IDF હિઝબુલ્લાહ સામે કોઈપણ પગલાં લેવા માટે તૈયાર છે, જો કે પ્રાથમિકતા વાટાઘાટો દ્વારા ઉકેલ શોધવાની છે. અગાઉ અમેરિકાની મુલાકાત દરમિયાન ગેલન્ટે કહ્યું હતું કે અમે લેબનોનને પાષાણ યુગમાં મોકલી શકીએ છીએ. કેટલાક દેશોએ તેમના નાગરિકોને લેબનોનની મુસાફરી સામે ચેતવણી આપી છે. તેમજ, હિઝબુલ્લાના નેતા હસન નસરલ્લાએ ઇઝરાયલના એરપોર્ટ અને સાયપ્રસ પર હુમલાની ધમકી આપી હતી. ગાઝામાં ચામડીના ખતરનાક રોગો ફેલાયા, 1.5 લાખથી વધુ બાળકો અસરગ્રસ્ત થયા
ઇઝરાયલ આર્મી (IDF)ના હુમલામાં અત્યાર સુધીમાં 37,953 લોકોના મોત થયા છે. IDFના આદેશ બાદ ગાઝાના 23 લાખ પેલેસ્ટિનિયનોને દરરોજ અહીંથી ત્યાં ભટકવાની ફરજ પડી રહી છે. ગંદકીને કારણે 1.50 લાખથી વધુ બાળકો ચામડીના ગંભીર રોગોથી પીડાઈ રહ્યા છે. સેન્ટ્રલ ગાઝામાં દેર અલ-બલાહ કેમ્પમાં રહેતા એક પરિવારનું કહેવું છે કે તેઓ રેતી પર સૂઈ જાય છે. બાળકોના શરીર પર સફેદ અને લાલ ફોલ્લીઓ દેખાયા હતા અને તેઓને આખો દિવસ ખંજવાળ આવે છે.

આ પ્રકારના તમામ સમાચાર માટેે App ડાઉનલોડ કરો.