જામનગરના બેડેશ્વર વિસ્તારમાં પિતા પુત્રીના પવિત્ર સંબંધોને શર્મસાર કરતો ઘૃણાસ્પદ કિસ્સો પ્રકાશમાં આવતાં ભારે ચકચાર

- નરાધમ પિતાએ પોતાનીજ સગીર પુત્રીને હવસનો શિકાર બનાવી ગર્ભવતી બનાવી દેતાં ચોમેરથી ફિટકારજામનગર તા 21 જુલાઈ 2022,ગુરૂવાર  જામનગરમાં બેડેશ્વર વિસ્તારમાં પિતા પુત્રીના પવિત્ર સંબંધોને શર્મસાર કરતો એક કિસ્સો પ્રકાશમાં આવતાં ભારે સનસનાટી મચી ગઈ છે. હવસખાર પિતાએ પોતાની જ સગીર વયની પુત્રીને વારંવાર હવસનો શિકાર બનાવી લઈ ગર્ભવતી બનાવી દેતાં પોલીસે પિતા સામે ગુનો નોંધ્યો છે, અને ચોમેરથી ફિટકારની લાગણી વરસી રહી છે. જામનગર શહેરમાં ભારે હાહાકાર જગાવનારા બનાવની વિગત એવી છે કે જામનગરના બેડેશ્વર વિસ્તારમાં રહેતા અને રીક્ષા ચલાવતા અયુબ નામના ૪૫ વર્ષના શખ્સએ પોતાની સગીર પુત્રીને પોતાની હવસનો શિકાર બનાવી લઈ ગર્ભવતી બનાવી દેતાં ભારે અરેરાટી ફેલાઈ છે. આજે બપોરે સમગ્ર મામલો સીટી બી. ડિવિઝન પોલીસ મથકે પહોંચતાં પોલીસે નરાધમ શખ્સ સામે ગુનો નોંધી અટકાયતમાં લીધો છે, અને તેની સામે ચોમેરથી ફિટકારની લાગણી વરસી રહી છે. પાપ છાપરે ચડીને પોકારે તે રીતે માત્ર ૧૪ વર્ષની વયની સગીર પુત્રી, કે જે તેના કુટુંબીજનોને ગઈકાલે મળી હતી, ત્યારે તેણીના પેટનો ભાગ વધેલો જોવા મળ્યો હતો, તેથી પરિવારના અન્ય મહિલા સભ્યોએ સગીરાની પૂછપરછ કરી હતી. સગીરાની માતાનું અવસાન થઈ ગયું હોવાથી તેના પિતા અન્ય એક બહેન અને ભાઈ સાથે રહે છે, જે સગીરા સુનમૂન રહી હતી. જેથી તેણીને હોસ્પિટલમાં લઈ જઈ તેનું પરીક્ષણ કરાવતાં પોતે ગર્ભવતી બની ગઈ હોવાનું ધ્યાનમાં આવ્યું હતું. જેથી પરિવારજનો ચોંકી ઉઠ્યા હતા. આથી સગીરાના અન્ય કુટુંબીજનોએ તેમને ફોસલાવીને જીણવટ ભરી પૂછપરછ કરતાં આખરે તેણીએ સમગ્ર હકીકત વર્ણવી દીધી હતી, અને પોતાના પિતા જ આજથી છ એક માસ પહેલાં હવસનો શિકાર બનાવી લઈ વારંવાર દુષ્કર્મ ગુજાર્યે રાખતા હતા, અને છરીની અણીએ જો આ વાતની કોઈને જાણ કરશે, તો પતાવી નાખશે તેવી ધમકી આપ્યે રાખતો હોવાથી સગીરા મૌન ધારણ કરીને બેઠી હતી. પરંતુ આખરે ભાંડો ફૂટી ગયો હતો. સીટી બી. ડિવિઝન પોલીસ મથકમાં મામલો પહોંચ્યા પછી પોલીસ ઇન્સ્પેક્ટર કે.જે.ભોયેએ સગીરાનું નિવેદન નોંધ્યું હતું, અને તેની ફરિયાદના આધારે આરોપી નરાધમ પિતા સામે દુષ્કર્મ ગુજારવા અંગેની કલમ તેમજ પોકસો સહિતની કલમો હેઠળ ગુનો નોંધ્યો છે, અને તેની અટકાયત કરી લીધી છે. જ્યારે સગીરાને તબીબી ચકાસણી માટે જામનગરની જી.જી. હોસ્પિટલના ગાયનેક વિભાગમાં દાખલ કરવામાં આવી છે, અને હાલ તેણી ગર્ભવતી બનેલી છે. આ બનાવે બેડેશ્વર સહિતના વિસ્તારમાં ભારે સનસનાટી મચાવી દીધી છે.

આ પ્રકારના તમામ સમાચાર માટેે App ડાઉનલોડ કરો.