મહેમદાવાદમાં અગાઉની અદાવતમાં 3 શખ્સોનો યુવક પર જીવલેણ હુમલો
- કુહાડી અને લાકડીથી ગંભીર ઇજા પહોંચાડતા ઇજાગ્રસ્તને હોસ્પિટલમાં ખસેડાયો : 3 શખ્સો સામે ગુનો દાખલનડિયાદ : મહેમદાવાદમાં અગાઉના ઝઘડાનો ખાર રાખી ત્રણ શખ્સોએ યુવક પર કુહાડી અને લાકડીથી હુમલો કરી ગંભીર ઇજા પહોંચાડી હતી. આ બનાવ સંદર્ભે મહેમદાવાદ પોલીસે ત્રણ ઈસમો વિરુદ્ધ ગુનો નોંધી વધુ તપાસ હાથ ધરી છે.પોલીસ સૂત્રોના જણાવ્યા પ્રમાણે મહેમદાવાદ બોડીરોજી વિસ્તારમાં રમણભાઈ દુલાભાઈ વાઘેલા રહે છે. તેઓના કુટુંબની એક મહિલા આ જ વિસ્તારમાં રહેતા વાસીદભાઈ કાભઈભાઈ તળપદાને ત્યાં ઘરકામ માટે જતી હતી. તે વખતે તેઓને ઝઘડો થયો હતો. જેની અદાવત રાખી વાસીદ કિશનને માર મારવાની પેરવી કરતો હતો. તે દરમિયાન કિશન રસ્તેથી પસાર થતો હતો. આ વખતે એક્ટિવા અડી જતા બોલાચાલી થતા વાસીદ તળપદા, દશરથ મંગળભાઈ તળપદા તથા જીતુ ગેમાભાઇ તળપદા લાકડી તથા કુહાડી લઈ આવી કિશન પર જીવલેણ હુમલો કર્યો હતો. વાસીદે કિશનના માથામાં કુહાડી મારી તથા અન્ય બે ઈસમોએ પગમાં લાકડીઓ મારી ગંભીર ઇજાઓ પહોંચાડી હતી. ગંભીર રીતે ઘવાયેલા કિશનને મહેમદાવાદ સરકારી હોસ્પિટલમાં ખસેડાયો હતો. આ સંદર્ભે મહેમદાવાદ પોલીસે વાસીદ તળપદા, દશરથ તળપદા તથા જીતુ તળપદા વિરુદ્ધ ગુનો નોંધી તપાસ હાથ ધરી છે.
આ પ્રકારના તમામ સમાચાર માટેે
App ડાઉનલોડ કરો.