અનંતનાગમાં સુરક્ષાદળો અને આતંકવાદીઓ વચ્ચે એન્કાઉન્ટર:બે સૈનિકો ઘાયલ; એક દિવસ પહેલા 4 આતંકીઓના સ્કેચ જાહેર કરાયા હતા

જમ્મુ-કાશ્મીરના અનંતનાગમાં શનિવારે (10 ઓગસ્ટ) સુરક્ષા દળો અને આતંકવાદીઓ વચ્ચે એન્કાઉન્ટર ચાલી રહ્યું છે. માનવામાં આવી રહ્યું છે કે આતંકીઓ ડોડાથી અનંતનાગ વિસ્તારમાં પ્રવેશ્યા છે. જિલ્લાના કોકરનાગ ટાઉનમાં ઓપરેશન ચાલી રહ્યું છે. પોલીસ અધિકારીઓને આતંકીઓ છુપાયા હોવાની માહિતી મળી હતી. આ પછી પોલીસ અને સુરક્ષા દળોની સંયુક્ત ટીમે સર્ચ ઓપરેશન શરૂ કર્યું. આ દરમિયાન આતંકીઓએ હુમલો કર્યો, જેમાં બે જવાન ઘાયલ થયા. આ વિસ્તારમાં બેથી ત્રણ આતંકીઓ છુપાયા હોવાની આશંકા છે. એન્કાઉન્ટર હજુ ચાલુ છે. આના એક દિવસ પહેલા 9 ઓગસ્ટે પોલીસે ચાર આતંકવાદીઓના સ્કેચ જાહેર કર્યા હતા. પોલીસે આતંકવાદીઓ વિશે માહિતી આપનારને 5 લાખ રૂપિયાના ઈનામની જાહેરાત કરી છે. આ આતંકવાદીઓ કઠુઆમાં સેનાના કાફલા પર થયેલા હુમલામાં સામેલ છે. 17 જુલાઈના રોજ કુપવાડામાં 2 આતંકવાદીઓ ઠાર
17 જુલાઈના રોજ કુપવાડાના કેરન વિસ્તારમાં સેનાએ એન્કાઉન્ટરમાં બે આતંકીઓને ઠાર કર્યા હતા. સેનાને અહીં કેટલાક આતંકવાદીઓ છુપાયા હોવાની માહિતી મળી હતી, ત્યારબાદ સર્ચ ઓપરેશન હાથ ધરવામાં આવ્યું હતું. આ સિવાય ડોડામાં એક જ દિવસે બે જગ્યાએ એન્કાઉન્ટર થયા હતા. જેમાં આતંકીઓના હુમલામાં બે જવાન ઘાયલ થયા હતા. 15મી જુલાઈના રોજ ડોડામાં થયેલા એન્કાઉન્ટરમાં 5 જવાનો શહીદ થયા હતા
ડોડામાં જ 15 જુલાઈએ આતંકવાદીઓ સાથેની અથડામણમાં સેનાના કેપ્ટન અને એક પોલીસકર્મી સહિત 5 જવાનો શહીદ થયા હતા. 16 જુલાઈના રોજ, ડોડાના દેસા ફોરેસ્ટ બેલ્ટના કલાન ભાટામાં રાત્રે 10:45 વાગ્યે અને પંચન ભાટા વિસ્તારમાં સવારે 2 વાગ્યે ફરીથી ગોળીબાર થયો હતો. આ ઘટનાઓ બાદ સર્ચ ઓપરેશન હાથ ધરવા માટે સેનાએ જદ્દન બાટા ગામની સરકારી શાળામાં અસ્થાયી સુરક્ષા છાવણી બનાવી હતી. ડોડા જિલ્લાને 2005માં આતંકવાદ મુક્ત જાહેર કરવામાં આવ્યો હતો. 12 જૂનથી સતત થયેલા હુમલામાં 5 જવાનો શહીદ થયા છે અને 9 સુરક્ષાકર્મીઓ ઘાયલ થયા છે. જ્યારે ત્રણ આતંકવાદીઓ માર્યા ગયા હતા.

આ પ્રકારના તમામ સમાચાર માટેે App ડાઉનલોડ કરો.