મહીનદી પરના તાત્રોલી બ્રિજ પરથી અજાણી યુવતીએ છલાંગ લગાવી

મહીસાગર જીલ્લાના મલેકપુર ખાતેની મહીસાગર નદી પરના તાત્રોલી પુલ પરથી એક યુવતીએ કુદકો લગાવી દેવાની ઘટનાને પગલે સમગ્ર વિસ્તારમાં ચકચાર મચી જવા‌ સાથે પુલ પર લોકટોળાં પણ‌ જામ્યા હતા.મહીસાગર નદીના તાત્રોલી પુલ પર આવ્યા બાદ એક અજાણી યુવતીએ અચાનક નદીમાં કુદકો લગાવી દેતાં આસપાસના લોકોઅને વાહનચાલકો ભેગા થઈ ગયા હતાં. બનાવની જાણ વાયુવેગે સમગ્ર ગામમાં પ્રસરતાં લોકોના ટોળા પુલ પર એકઠા થઈ ગયા હતાં. જેના કારણે પુલ પર ટ્રાફિક જામ થઈ ગયો હતો. દરમિયાન ઘટનાની જાણ થતા લુણાવાડા તાલુકા પોલીસ સ્થળ પર આવી પહોંચી હતી. પોલીસે સ્થાનીક તરવૈયાઓની સાથે લુણાવાડા ફાયરની ટીમની મદદ લઈ નદીમાં કૂદકો લગાવનાર યુવતીની શોધખોળ હાથ ધરી હતી. જોકે મોડી સાંજ સુધી યુવતીનો કોઈ પત્તો લાગ્યો ન હતો. પોલીસને બ્રિજ પાસેથી યુવતીના ચપ્પલ અને ઓઢણી મળી આવ્યા હતાં. પોલીસની પ્રાથમિક તપાસમાં યુવતી મલેકપુર પાસેના મોવડિયા ગામની રહેવાસી હોવાનું જાણવા મળ્યું છે .જેના આધારે પોલીસે તેના પરિવારજનોની પણ શોધખોળ શરૂ કરી છે.

આ પ્રકારના તમામ સમાચાર માટેે App ડાઉનલોડ કરો.