ચંદ્રબાબુ નાયડુ 12 જૂને સીએમ તરીકે શપથ લેશે:ચોથી વખત આંધ્રપ્રદેશના મુખ્યમંત્રી બનશે; મોદી સહિત નવા કેબિનેટના અનેક મંત્રીઓ હાજર રહેશે
તેલુગુ દેશમ પાર્ટી (ટીડીપી)ના અધ્યક્ષ એન ચંદ્રબાબુ નાયડુ 12 જૂને આંધ્રપ્રદેશના મુખ્યમંત્રી તરીકે શપથ લેશે. સમારોહ અમરાવતીમાં થશે. જેમાં નરેન્દ્ર મોદી અને નવા કેન્દ્રીય કેબિનેટના ઘણા મંત્રીઓ સામેલ થશે. સૂત્રોના જણાવ્યા અનુસાર ચંદ્રબાબુ નાયડુ શપથગ્રહણના દિવસે અમરાવતીને રાજ્યની રાજધાની બનાવવાની જાહેરાત કરી શકે છે. 2 જૂને, હૈદરાબાદને તેલંગાણા અને આંધ્રપ્રદેશની સંયુક્ત રાજધાની તરીકે રાખવાનો 10 વર્ષનો કરાર સમાપ્ત થયો. હાલમાં, આંધ્ર દેશનું એકમાત્ર રાજ્ય છે જેની પાસે રાજધાની નથી. ચંદ્રબાબુ નાયડુ ચોથી વખત રાજ્યના મુખ્યમંત્રી બનવા જઈ રહ્યા છે. અગાઉ, તેમણે 1 સપ્ટેમ્બર 1995, 11 ઓક્ટોબર 1999 અને 8 જૂન 2014ના રોજ ત્રણ વખત મુખ્યમંત્રી તરીકે શપથ લીધા હતા. 2019 માં, YSRCP પ્રમુખ જગન મોહન રેડ્ડીએ વિજય નોંધાવીને તેમની પાસેથી સત્તા છીનવી લીધી. આંધ્રમાં NDAને બહુમતી, TDPને 135 બેઠકો મળી
2024ની વિધાનસભા ચૂંટણીમાં એનડીએ આંધ્ર પ્રદેશમાં પ્રચંડ બહુમતી સાથે જીત્યું છે. વિધાનસભાની 175 બેઠકોમાંથી નાયડુની ટીડીપીને 135 બેઠકો, પવન કલ્યાણની જનસેનાને 21 અને ભાજપને 8 બેઠકો મળી છે. ત્રણેય ગઠબંધનમાં છે. જગન મોહન રેડ્ડીની YSRCPને માત્ર 12 બેઠકો મળી હતી. કોંગ્રેસ રાજ્યમાં ખાતું પણ ખોલાવી શકી નથી. આ વખતે જગન મોહન રેડ્ડીની બહેન વાયએસ શર્મિલા રેડ્ડી રાજ્યમાં કોંગ્રેસનું નેતૃત્વ કરી રહી હતી. તે આંધ્ર પ્રદેશમાં કોંગ્રેસના પ્રદેશ અધ્યક્ષ છે. એવું માનવામાં આવે છે કે કોંગ્રેસના પરંપરાગત મતદારો ભાઈ-બહેનના પક્ષો વચ્ચે વહેંચાઈ ગયા છે. કોંગ્રેસને ગુમાવવા માટે કંઈ નહોતું, પરંતુ YSRCPને નુકસાન થયું અને ભાઈ-બહેનની લડાઈમાં TDPને સીધો ફાયદો થયો. જગન મોહને 2019માં એકતરફી જીત નોંધાવી હતી
2019માં આંધ્રમાં, YSRCP પ્રમુખ જગન મોહન રેડ્ડીએ 175માંથી 151 બેઠકો પર એકતરફી જીત મેળવી હતી. ટીડીપી માત્ર 23 સીટો જીતી શકી હતી. જગન મોહન 2019માં પ્રથમ વખત રાજ્યના સીએમ બન્યા હતા. જગન મોહનના પિતા સ્વર્ગસ્થ વાયએસ રાજશેખર રેડ્ડી આંધ્રમાં કોંગ્રેસના મોટા નેતા હતા. તેઓ 2004 અને 2009માં સતત બે ટર્મ માટે રાજ્યના સીએમ હતા. જગન મોહને પણ પોતાની રાજકીય કારકિર્દી કોંગ્રેસમાંથી શરૂ કરી હતી. તેઓ 2009માં કોંગ્રેસમાંથી પ્રથમ વખત સાંસદ તરીકે ચૂંટાયા હતા.
આ પ્રકારના તમામ સમાચાર માટેે
App ડાઉનલોડ કરો.