કેનેડાની ઈન્ટેલિજન્સ એજન્સીએ સીક્રેટ રીતે ભારતની મુલાકાત લીધી હતી:નિજ્જર મર્ડર કેસની તપાસ દરમિયાન બે વખત આવી ગઈ, ત્યારબાદ 4 ભારતીયોની ધરપકડ કરી

​​​​​​ખાલિસ્તાની આતંકવાદી હરદીપ સિંહ નિજ્જરની હત્યા બાદ કેનેડિયન ઈન્ટેલિજન્સ એજન્સી (CSIS)એ આ વર્ષે ફેબ્રુઆરી અને માર્ચમાં બે વખત ગુપ્ત રીતે ભારતની મુલાકાત લીધી હતી. આ માહિતી CSISના ડાયરેક્ટર ડેવિડ વિગ્નોલ્ટે રવિવારે (9 મે)ના રોજ આપી હતી. તેમણે કહ્યું કે તેઓ ભારતીય અધિકારીઓને નિજ્જરની હત્યા સાથે જોડાયેલા કેસની માહિતી આપવા માટે ભારત આવ્યા હતા. 18 જૂન, 2023ની સાંજે સરે શહેરમાં ગુરુદ્વારામાંથી બહાર નીકળતી વખતે નિજ્જરની ગોળી મારીને હત્યા કરવામાં આવી હતી. ગયા વર્ષે 18 સપ્ટેમ્બરે વડાપ્રધાન જસ્ટિન ટ્રુડોએ ભારત સરકાર પર નિજ્જરની હત્યામાં સામેલ હોવાનો આરોપ લગાવ્યો હતો, જેને ભારતે ફગાવી દીધો હતો. CSISની આ મુલાકાતની માહિતી એવા સમયે સામે આવી છે જ્યારે કેનેડાએ ગયા મહિને નિજ્જર હત્યા કેસમાં 4 ભારતીય નાગરિકોની ધરપકડ કરી છે. ગયા મહિને, એડમોન્ટનમાં રહેતા 22 વર્ષીય કરણ બ્રાર, 22 વર્ષીય કમલપ્રીત સિંઘ અને 28 વર્ષીય કરણપ્રીત સિંહની આ કેસમાં ફર્સ્ટ ડિગ્રી મર્ડર અને હત્યાનું કાવતરું ઘડવાના આરોપમાં ધરપકડ કરવામાં આવી હતી. આ પછી ચોથા ભારતીય અમનદીપ સિંહની કેનેડિયન સત્તાવાળાઓએ ધરપકડ કરી હતી. 'ભારતમાં વોન્ટેડ લોકોને કેનેડા આપે છે વિઝા'
આ ધરપકડો બાદ ભારતના વિદેશ મંત્રી એસ. જયશંકરે આરોપ લગાવ્યો હતો કે કેનેડા ભારતમાં વોન્ટેડ લોકોને વિઝા આપે છે. તેમણે કહ્યું હતું કે 'સંગઠિત અપરાધ સાથે સંકળાયેલા પંજાબના લોકોનું કેનેડામાં સ્વાગત કરવામાં આવે છે. રોયલ કેનેડિયન માઉન્ટેડ પોલીસ (RCMP) આ હત્યાની તપાસ કરી રહી છે. કેનેડિયન અધિકારીઓએ પણ સ્વીકાર્યું હતું કે CSIS સાથે સંકળાયેલા કેટલાક લોકો ભારત ગયા હતા, પરંતુ આ વખતે તેઓએ CSISએ ભારતીય અધિકારીઓ સાથે શું વાતચીત કરી હતી તે અંગે માહિતી આપવાનો ઇનકાર કર્યો હતો. કેનેડિયન અધિકારીઓએ કહ્યું- ભારત સાથે માહિતી શેર કરી રહ્યાં છે
કેનેડિયન અધિકારીઓએ જણાવ્યું હતું કે CSIS ભારતીય સત્તાવાળાઓ સાથે હત્યાકાંડ વિશેની માહિતી શેર કરવાનું ચાલુ રાખે છે. તેમણે કહ્યું કે કેનેડાના વડાપ્રધાન જસ્ટિન ટ્રુડોએ પણ ઘણી વખત આ જ વાતનું પુનરાવર્તન કર્યું છે. કેનેડિયન અધિકારીઓએ કહ્યું કે આ મામલાની પ્રાથમિક તપાસ ચાલી રહી છે અને તેમાં સામેલ લોકોની જવાબદારી સુનિશ્ચિત કરવામાં આવી રહી છે. આ બંને દેશોના હિતમાં છે. આરસીએમપી સ્વતંત્ર તપાસ કરી રહી છે. જો કે, હજુ સુધી ભારતીય અધિકારીઓએ CSISની ભારત મુલાકાત અંગે કોઈ માહિતી શેર કરી નથી. ભારતે કેનેડાના 41 ડિપ્લોમેટ્સને હાંકી કાઢ્યા હતા
કેનેડાના આરોપો બાદ ભારતે ત્યાંના લોકો માટે વિઝા સેવાઓ સ્થગિત કરી દીધી હતી. 41 કેનેડિયન ડિપ્લોમેટ્સને પણ હટાવવામાં આવ્યા હતા. જોકે, બાદમાં રાજદ્વારી સ્તરે વાટાઘાટો થઈ હતી અને થોડા મહિનાઓ પછી વિઝા સેવાઓ ફરી શરુ કરવામાં આવી હતી. કેનેડાએ કહ્યું હતું કે તે આ હત્યામાં ભારતની સંડોવણીના પુરાવા આપશે, જે તેણે અત્યાર સુધી આપ્યા નથી. વિદેશ મંત્રી એસ. જયશંકર અલગ-અલગ મંચ પરથી ટ્રુડો સરકાર પર ખાલિસ્તાની આતંકવાદીઓને આશ્રય આપવાનો આરોપ લગાવી ચુક્યા છે. જો કે થોડા દિવસો પહેલા કેનેડાના વિદેશ મંત્રીએ કહ્યું હતું કે ભારત નિજ્જરની હત્યાની તપાસમાં સહયોગ કરી રહ્યું છે. કોણ હતો હરદીપ સિંહ નિજ્જર, જેના પર સમગ્ર હોબાળો થયો?

આ પ્રકારના તમામ સમાચાર માટેે App ડાઉનલોડ કરો.