ગાઝામાં ઇઝરાયલની સેના પર ઘાતકી હુમલો:વિસ્ફોટ કરીને ટેન્કને ઉડાવી, 8 સૈનિકો માર્યા ગયા; હમાસે કહ્યું- અમારા પ્રદેશ પર કબજો કરનારાઓને છોડીશું નહીં

દક્ષિણ ગાઝાના રાફા વિસ્તારમાં શનિવારે ટેન્કમાં થયેલા વિસ્ફોટમાં ઇઝરાયલના 8 સૈનિકો માર્યા ગયા હતા. ઇઝરાયલ ડિફેન્સ ફોર્સ અનુસાર, આ તમામ સૈનિકો નેમર નામના આર્મર્ડ કોમ્બેટ એન્જિનિયરિંગ વ્હીકલ (CEV)ની અંદર હતા. જાન્યુઆરીમાં ગાઝામાં થયેલા વિસ્ફોટમાં ઇઝરાયલના 21 સૈનિકો માર્યા ગયા બાદ આટલી મોટી સંખ્યામાં સૈનિકો માર્યા ગયાની આ પહેલી ઘટના છે. IDFએ જણાવ્યું હતું કે આ ઘટના સ્થાનિક સમય અનુસાર સવારે 5:15 વાગ્યે બની હતી. રાફાના તલ અલ-સુલતાન વિસ્તારના ઉત્તર-પશ્ચિમ ભાગમાં હમાસના આતંકવાદી ઠેકાણાઓને નષ્ટ કરવા નીકળેલી ઇઝરાયલી સેનાની ટુકડી લગભગ 50 આતંકવાદીઓને મારીને પરત ફરી રહી હતી. ત્યારબાદ કાફલાનું એક ટેન્ક બ્લાસ્ટની ઝપેટમાં આવી ગઈ હતી. IDFના પ્રવક્તા ડેનિયલ હગારીએ કહ્યું કે અમને અત્યાર સુધી મળેલી માહિતી અનુસાર આ વિસ્ફોટ વિસ્તારમાં પ્લાન્ટ કરવામાં આવેલા વિસ્ફોટકોના કારણે થયો હતો અથવા સેનાના કાફલા તરફ એન્ટી ટેન્ક મિસાઈલ ઝીંકવામાં આવી હતી. વિસ્ફોટ એટલો ભયાનક હતો કે માર્યા ગયેલા સૈનિકોમાંથી માત્ર એકની ઓળખ થઈ શકી છે. હમાસની મિલિટરી વિંગે કહ્યું- અમે દુશ્મનને નિશાન બનાવ્યા
ઇઝરાયલી સેનાએ હજુ સુધી આ વિસ્ફોટ માટે કોઈને જવાબદાર ઠેરવ્યા નથી. જો કે, હમાસની મિલિટરી વિંગ અલ કાસમ બ્રિગેડે કહ્યું છે કે તેણે તલ અલ-સુલતાન વિસ્તારમાં રહેલા દુશ્મનની ટેન્ક પર ઘાતક હુમલો કર્યો છે. અલ કાસમ બ્રિગેડે કહ્યું કે તેમણે મિલિટરી બુલડોઝરને નિશાન બનાવ્યું, જે આગમાં બીને ખાખ થઈ ગયું છે. જ્યારે બચાવ ટુકડીઓ ત્યાં પહોંચી ત્યારે બખ્તરબંધ ટેન્ક પર મિસાઈલથી હુમલો કરવામાં આવ્યો હતો. બ્રિગેડે કહ્યું કે દુશ્મન જ્યાં પણ હશે તેની સામે અમારા હુમલા ચાલુ રહેશે. આપણા વિસ્તારો પર કબજો કરનારી સેનાને મોત સિવાય કશું જ નહીં મળે. CEVની બહાર સ્ટોર કરાયેલા વિસ્ફોટકોમાં બ્લાસ્ટનો ભય
IDFના પ્રવક્તા ડેનિયલ હગારીએ જણાવ્યું હતું કે કોમ્બેટ એન્જિનિયરિંગ ટેન્કની બહાર સંગ્રહિત વિસ્ફોટકોના કારણે વિસ્ફોટ થયો હોવાની શક્યતાની પણ તપાસ કરવામાં આવી રહી છે. સામાન્ય રીતે, કોમ્બેટ એન્જિનિયરિંગ ટેન્કની બહારની તરફ સ્ટોર કરાયેલા એક્સપ્લોસિવમાં જો વિસ્ફોટ થાય તો પણ અંદર બેઠેલા સૈનિકોને ઈજા થતી નથી. હગારીએ એમ પણ કહ્યું કે તપાસમાં જાણવા મળ્યું છે કે વિસ્ફોટ દરમિયાન કોઈ ફાયરિંગ કરવામાં આવ્યું નહોતું અને વાહન એક જગ્યાએ રોકાયું ન હતું. આ અકસ્માત બાદ ઈઝરાયલના સંરક્ષણ મંત્રાલય અને IDFના નિષ્ણાતોની ટીમ ટેન્કની તપાસ કરશે અને બ્લાસ્ટનું ચોક્કસ કારણ શોધી કાઢશે. આ સમાચાર પણ વાંચો... ઇઝરાયેલે હમાસના કેદમાંથી 4 બંધકોને મુક્ત કર્યા: તેમાં 25 વર્ષીય નોઆનો સમાવેશ થાય છે, જેને હમાસના લડવૈયાઓ બાઇક પર ઉઠાવી ગયા હતા; 274 પેલેસ્ટિનિયન માર્યા ગયા ઇઝરાયલે હમાસની કેદમાંથી 4 બંધકોને મુક્ત કર્યા છે. ઇઝરાયલે 8 જૂને દાવો કર્યો હતો કે તેના દળોએ ગાઝાના નુસિરત શરણાર્થી શિબિરમાં ગોળીબાર વચ્ચે આ ઓપરેશન હાથ ધર્યું હતું. CNNએ ગાઝા ઓથોરિટીને ટાંકીને કહ્યું છે કે ઇઝરાયલીઓને મુક્ત કરાવવાના આ ઓપરેશનમાં ઓછામાં ઓછા 274 પેલેસ્ટાઈનના મોત થયા છે. આ સિવાય 400થી વધુ લોકો ઘાયલ થયા છે.

આ પ્રકારના તમામ સમાચાર માટેે App ડાઉનલોડ કરો.