બહાદુર પાયલટ! પોતાનો જીવ આપી 400નાં જીવ બચાવ્યા:ઓસ્ટ્રેલિયામાં 10 હજાર ફૂટની ઊંચાઈથી હેલિકોપ્ટર પડ્યું, છત સાથે અથડાતા જોરદાર વિસ્ફોટ થયો, વીડિયો વાયરલ

દેશ અને દુનિયામાં દરરોજ પ્લેન અને હેલિકોપ્ટર ક્રેશની ઘટનાઓ બની રહી છે. આજે ફરી એક હેલિકોપ્ટર ક્રેશ થયું છે. આ અકસ્માત ઓસ્ટ્રેલિયામાં થયો હતો અને હેલિકોપ્ટર 10 હજાર ફૂટની ઊંચાઈથી અચાનક હોટલની છત પર પડી ગયું હતું. છત પર પડતાની સાથે જ હેલિકોપ્ટરમાં આગ લાગી હતી, જેમાં પાયલટનું મૃત્યુ થયું હતું, પરંતુ પાયલટે પોતાનો જીવ ગુમાવીને 400 લોકોનો જીવ બચાવ્યો હતો, કારણ કે તેણે હેલિકોપ્ટર ક્રેશ થવાની સંભાવના વિશે એટીસી અધિકારીઓને પહેલેથી જ જાણ કરી દીધી હતી, જેમણે પોલીસને જાણ કરી હતી અને પોલીસ સમયસર અકસ્માત સ્થળે પહોંચી હતી. હેલિકોપ્ટર હોટલની છત સાથે અથડાયું કે તરત જ જોરદાર વિસ્ફોટ થયો અને અવાજ સંભળાતા જ હોટલનું ઈમરજન્સી એલાર્મ વાગવા લાગ્યું. પોલીસ અને હોટલના સુરક્ષાકર્મીઓએ તાકીદે આખી હોટલને ખાલી કરાવી હતી. લગભગ 400 લોકોને બચાવી લેવાયા છે. જ્યારે લોકોએ પોતાની આંખથી હેલિકોપ્ટરને આકાશમાંથી પડતું અને સળગતું જોયું તો તેમનામાં ભયનો માહોલ સર્જાયો હતો. લોકોએ હેલિકોપ્ટર સળગતાનો વીડિયો બનાવ્યો અને તેને સોશિયલ મીડિયા પર અપલોડ કર્યો, જે વાયરલ થઈ રહ્યો છે. પ્રોપેલર તૂટવાને કારણે હેલિકોપ્ટર ક્રેશ થયું
મીડિયા રિપોર્ટ્સ અનુસાર, હેલિકોપ્ટર ઓસ્ટ્રેલિયાના કેર્ન્સ શહેરમાં હિલ્ટનની ડબલ ટ્રી હોટેલની છત પર પડ્યું હતું. ક્વીન્સલેન્ડ પોલીસના જણાવ્યા અનુસાર, હેલિકોપ્ટરમાં આગ લાગવાને કારણે પાયલટનું મોત થયું હતું. હેલિકોપ્ટરમાં સવાર અન્ય એક વ્યક્તિનું પણ મોત થયું હતું. આ અકસ્માતમાં હેલિકોપ્ટરના બે પ્રોપેલર તૂટી ગયા હતા. પવનના દબાણને કારણે પ્રોપેલર્સ તૂટી ગયા હોઈ શકે છે, જેના કારણે હેલિકોપ્ટરે તેનું સંતુલન ગુમાવી દીધું અને હોટલની છત પર પડી ગયું. ઈમરજન્સી ટીમ ઘટનાસ્થળે પહોંચી અને હોટલમાં રોકાયેલા મહેમાનોને બચાવીને અન્ય હોટલોમાં શિફ્ટ કર્યા. હોટલ સ્ટાફ સહિત લગભગ 400 લોકોને બચાવી લેવાયા હતા. અકસ્માતમાં માર્યા ગયેલા બંને લોકોનાં મૃતદેહને પોસ્ટમોર્ટમ માટે મોકલી દેવામાં આવ્યા છે. કેઇર્ન્સ ઓસ્ટ્રેલિયામાં એક પર્યટન સ્થળ છે. દરરોજ હજારો પ્રવાસીઓ આ શહેરની મુલાકાતે આવે છે. તે ઓસ્ટ્રેલિયાના સૌથી વ્યસ્ત શહેરોમાંનું એક છે. આવા શહેરોમાં હેલિકોપ્ટર ક્રેશ થવાની ઘટનાઓ ચિંતાનો વિષય બની ગઈ છે. લોકોએ બોમ્બ વિસ્ફોટ જેવો ધડાકો સાંભળ્યો
ક્વીન્સલેન્ડ એમ્બ્યુલન્સ સર્વિસ (QAS) અનુસાર છત સાથેની અસરને કારણે હેલિકોપ્ટરના બે રોટર બ્લેડ તૂટી ગયા અને એસ્પ્લેનેડ અને હોટલના પૂલમાં પડ્યા. હોટલના પ્રવક્તા કેટલિન ડેનિંગ્સે મીડિયાને જણાવ્યું હતું કે બોમ્બ વિસ્ફોટ જેવો અવાજ આવ્યો હતો અને આગની જ્વાળાઓ જોઈ હતી. કાન ફાડી નાખતો જોરદાર વિસ્ફોટ થયો. હેલિકોપ્ટરની રોટર બ્લેડ જમીન પર પડેલી જોવા મળી હતી. લોકો તેને લેમ્પ પોસ્ટ સમજી ગયા હતા. પછી જ્યારે મેં ઉપર જોયું તો મને બિલ્ડિંગની બારીમાં એક મોટું કાણું દેખાયું. ઓસ્ટ્રેલિયન ટ્રાન્સપોર્ટ સેફ્ટી બ્યુરો અનુસાર, હોટલની આસપાસના રસ્તાઓ કોર્ડન કરી લેવામાં આવ્યા છે અને પોલીસે કટોકટીની સ્થિતિ જાહેર કરી છે.

આ પ્રકારના તમામ સમાચાર માટેે App ડાઉનલોડ કરો.