મૈં વાપસ આઉંગા…:27 વર્ષ પછી ‘બોર્ડર-2’ બનાવવાની સની દેઓલની જાહેરાત, ઓક્ટોબરમાં શૂટિંગ થશે

1997માં રિલીઝ થયેલી સની દેઓલ સ્ટારર ઓલ-ટાઇમ બ્લોકબસ્ટર ફિલ્મ 'બોર્ડર'ની સિક્વલની જાહેરાત કરવામાં આવી છે. સનીએ પોતે આ ફિલ્મની જાહેરાત કરતો વીડિયો સોશિયલ મીડિયા પર શેર કર્યો છે. એક્ટરે જાહેરાત કરતાં લખ્યું છે કે 'એક સૈનિક ફરી આવી રહ્યો છે, તેનું 27 વર્ષ જૂનું વચન પૂરું કરવા... ભારતની સૌથી મોટી વોર ફિલ્મ 'બોર્ડર 2'...' વીડિયોમાં માત્ર સની દેઓલનો અવાજ સંભળાયો હતો. આ જાહેરાતના વીડિયોમાં ફિલ્મ સાથે સંબંધિત કોઈ વિઝ્યુઅલ નથી, બેકગ્રાઉન્ડમાં માત્ર સની દેઓલનો જ અવાજ સંભળાય છે. સની કહે છે, '27 વર્ષ પહેલાં એક સૈનિકે વચન આપ્યું હતું કે તે પાછો આવશે... તે વચન પૂરું કરવા... ભારતની ધરતીને સલામ કહેવા... ફરી આવી રહ્યો છે.' આ સાથે જ ફિલ્મનું ગીત 'સંદેશ આતે હૈ..' પણ સંભળાય છે. 'કેસરી' ફેમ અનુરાગ સિંહ ડિરેક્ટ કરશે
'બોર્ડર-2'નું નિર્માણ જેપી દત્તા દ્વારા કરવામાં આવશે, જેમણે 1997માં 'બોર્ડર'નું નિર્દેશન કર્યું હતું. ભૂષણ કુમાર, કૃષ્ણ કુમાર અને જેપી દત્તાની પુત્રી નિધિ દત્તા પણ આ ફિલ્મના સહ-નિર્માતા હશે. તેનું નિર્દેશન અનુરાગ સિંહ કરશે. અનુરાગે અગાઉ અક્ષય કુમાર અભિનિત 'કેસરી'નું નિર્દેશન કર્યું છે. 'બોર્ડર-2' ક્યારે રિલીઝ થશે એ અંગે હજુ સુધી કોઈ માહિતી આપવામાં આવી નથી. એવી ચર્ચા છે કે એ 2026માં ગણતંત્ર દિવસના અવસર પર રિલીઝ થઈ શકે છે. આયુષ્માન ખુરાના પણ જોવા મળી શકે છે
ચર્ચા છે કે આ ફિલ્મમાં સની દેઓલની સાથે આયુષ્માન ખુરાના પણ લીડ રોલમાં છે. સૂત્રોનું માનીએ તો 'બોર્ડર 2'નું શૂટિંગ ઓક્ટોબરથી શરૂ થવા જઈ રહ્યું છે. ટીમ ઘણા સમયથી ફિલ્મને લગતી તમામ તૈયારીઓ પૂર્ણ કરવામાં વ્યસ્ત હતી. 'બોર્ડર 2' 2015માં બનવાની હતી
થોડા સમય પહેલાં ફિલ્મના લીડ એક્ટર સની દેઓલે રણવીર અલ્હાબાદિયાને આપેલા ઇન્ટરવ્યૂમાં કહ્યું હતું કે 'બોર્ડર 2' પહેલાં 2015માં બનાવાઈ રહી હતી.' તેમણે કહ્યું, 'મેં પોતે સાંભળ્યું હતું કે 'બોર્ડર 2' બની રહી છે. અમે એને 2015માં બનાવવાના હતા, પરંતુ પછી મારી ફિલ્મો ફ્લોપ થવા લાગી અને લોકો એ ફિલ્મ બનાવતા ડરી ગયા. હવે દરેક ફિલ્મ બનાવવા માગે છે.' 'ગદર-2' રિલીઝ થયા બાદ બદલાયું નસીબ
વર્ક ફ્રન્ટ પર સની દેઓલની છેલ્લી ફિલ્મ 'ગદર 2' હતી, જે બોક્સ ઓફિસ પર સુપરહિટ રહી હતી. આ ફિલ્મ રૂ. 691 કરોડના ગ્લોબલ કલેક્શન સાથે 2023ની ચોથી સૌથી વધુ કમાણી કરનારી ફિલ્મ હતી. આ ફિલ્મ રિલીઝ થયા બાદ તેનું કરિયર ફરી ધમધમી રહ્યું છે. ટૂંક સમયમાં સની 'લાહોર 1947', 'બાપ', 'સૂર્યા' અને 'અપને 2' જેવી ફિલ્મોમાં જોવા મળશે. 10 કરોડ રૂપિયામાં બનેલી બોર્ડરે 66 કરોડ રૂપિયાની કમાણી કરી
ફિલ્મ 'બોર્ડર' 1997માં રિલીઝ થઈ હતી. 10 કરોડમાં બનેલી આ ફિલ્મે 66 કરોડનું કલેક્શન કર્યું હતું. શાહરુખ અભિનિત 'દિલ તો પાગલ હૈ' પછી એ એ વર્ષની બીજી સૌથી મોટી ફિલ્મ હતી. આ મલ્ટીસ્ટારર ફિલ્મમાં સની દેઓલ ઉપરાંત જેકી શ્રોફ, સુનીલ શેટ્ટી, અક્ષય ખન્ના, પૂજા ભટ્ટ, રાખી, તબ્બુ સહિતનાં ઘણાં કલાકારો જોવા મળ્યાં હતાં.

આ પ્રકારના તમામ સમાચાર માટેે App ડાઉનલોડ કરો.