બાંગ્લાદેશી સાંસદની હત્યા કેસ, પ્લાસ્ટિકની થેલી- છરી જપ્ત:આરોપીએ કહ્યું- પહેલા ક્લોરોફોર્મ સુંઘાડ્યું, પછી ઓશીકાથી ગૂંગળાવીને મોતને ઘાટ ઉતાર્યા, 15 મિનિટમાં ખેલ ખતમ

ભારતમાં બાંગ્લાદેશી સાંસદ અનવારુલ આઝીમ અનારની હત્યાના કેસમાં, સીઆઈડીએ કોલકાતાના ન્યુ ટાઉન ફ્લેટમાંથી 600 ગ્રામની સેંકડો પ્લાસ્ટિકની થેલીઓ રિકવર કરી છે. ટાઈમ્સ ઓફ ઈન્ડિયાના અહેવાલ મુજબ પોલીસે ટોઈલેટ પેપર, ટિશ્યુ પેપર, ગ્લોવ્સ અને શિલાસ્તી રહેમાનના નામના બોર્ડિંગ પાસ જપ્ત કર્યા છે. શિલાસ્તી એ જ મહિલા છે જે સીસીટીવી ફૂટેજમાં અનવારુલ સાથે ફ્લેટમાં જતી જોવા મળી હતી. સીઆઈડીએ ધરપકડ કરાયેલા આરોપી જિહાદ હવાલદારને ટાંકીને જણાવ્યું હતું કે, અનવારુલ ફ્લેટમાં પ્રવેશ્યાની 15 મિનિટની અંદર સમગ્ર ઘટનાને અંજામ આપવામાં આવ્યો હતો. તેમને બેભાન કરવા માટે ક્લોરોફોર્મનો ઉપયોગ કરવામાં આવ્યો હતો. આ પછી, તેને તકિયાથી ગૂંગળાવીને મોતને ઘાટ ઉતારી દેવામાં આવ્યા હતા. ત્યારબાદ આરોપી જિહાદે કસાઈની છરી અને બ્લેડની મદદથી તેના મૃતદેહના ટુકડા કરી નાખ્યા. રિપોર્ટ અનુસાર CIDએ જણાવ્યું કે આરોપીઓ મૃતદેહના ટુકડાને પ્લાસ્ટિકની થેલીમાં ભરીને સૂટકેસમાં છુપાવીને લઈ જવાના હતા. આ ઉપરાંત ફ્લેટમાંથી બ્લીચિંગ પાવડર પણ મળી આવ્યો છે. 3 આરોપીઓને બાંગ્લાદેશમાં 8 દિવસના રિમાન્ડ પર મોકલ્યા
આરોપી હવાલદારે શુક્રવારે કહ્યું હતું કે 'સાંસદની હત્યા બાદ તેના શરીર પરથી ચામડી કાઢી નાખવામાં આવી હતી, માંસને કાઢી નાંખવામાં આવ્યું હતું અને પછી લાશના ટુકડા કરવામાં આવ્યા હતા. આ ટુકડાઓ કોથળામાં ભરીને શહેરના વિવિધ વિસ્તારોમાં ફેંકવામાં આવ્યા હતા. જો કે હજુ સુધી પોલીસને તેના મૃતદેહના ટુકડા મળ્યા નથી. પોલીસ છેલ્લા 4 દિવસથી કોલકાતાના અલગ-અલગ વિસ્તારોમાં તેમને શોધી રહી હતી. હજુ સુધી એ સ્પષ્ટ નથી થયું કે સાંસદની હત્યામાં કેટલા લોકો સામેલ છે. બીજી તરફ ઢાકામાંથી ધરપકડ કરાયેલા 3 આરોપીઓને 8 દિવસના રિમાન્ડ પર મોકલવામાં આવ્યા છે. અનવારુલ બુધવારે (22 મે) ના રોજ ગુમ થયા હતા. આ પછી પોલીસની એક ટીમ તેના ન્યૂ ટાઉન ફ્લેટ પહોંચી. અહીં શિલાસ્તીનો બોર્ડિંગ પાસ મળ્યા બાદ પોલીસ ત્યાંથી રવાના થઈ ગઈ હતી. આ દરમિયાન, બાંગ્લાદેશ સરકારે જાહેરાત કરી હતી કે સાંસદ અનવારુલની હત્યા કરવામાં આવી છે. ત્યારબાદ બુધવારે જ ફોરેન્સિક ટીમ ફ્લેટ પર પહોંચી હતી. અહીં પગરખાં પાસે અને ડ્રોઈંગ રૂમમાં લોહીના ડાઘ જોવા મળ્યા હતા. આરોપીઓ પ્લાસ્ટિકની થેલીઓ અને સૂટકેસ લઈને જતા દેખાયા હતા
ઢાકામાં 3 આરોપીઓની ધરપકડ બાદ કોલકાતાથી 4 સભ્યોની ટીમ બાંગ્લાદેશ ગઈ હતી, જ્યાં તેમણે આરોપીઓની પૂછપરછ કરી હતી. દરમિયાન ફ્લેટની બહારના સીસીટીવી ફૂટેજ પણ સામે આવ્યા હતા. જેમાં જિહાદ હવાલદાર સહિત બે આરોપીઓ પ્લાસ્ટિકની થેલીઓ અને સૂટકેસ લઈને જતા દેખાયા હતા. અનવારૂલ સારવાર માટે 12 મેના રોજ કોલકાતા આવ્યા હતા. બીજા દિવસે બપોરે 1.41 કલાકે તે ડોક્ટરને મળવાનું કહીને ત્યાંથી નીકળી ગયા હતા. સાંજે તેમણે તેના પરિવારને કહ્યું કે તે દિલ્હી જઈ રહ્યા છે. ત્યારથી તેઓ ગુમ થયા હતા. પોલીસ આ મામલે હની ટ્રેપના એંગલથી પણ તપાસ કરી રહી છે. પોલીસને શંકા છે કે અનવારુલની હત્યામાં એક મહિલા પણ સામેલ છે, જેણે સાંસદને ફસાવીને કોલકાતા બોલાવ્યા હતા. આ પહેલા 23 મેના રોજ પ્રારંભિક તપાસમાં CIDએ જણાવ્યું હતું કે બાંગ્લાદેશી સાંસદની હત્યા તેના અમેરિકન મિત્ર અખ્તરુઝમાને કરી હતી. આ માટે 5 કરોડ રૂપિયાની સોપારી આપવામાં આવી હતી. અખ્તરુઝમાન પાસે કોલકાતામાં પણ ફ્લેટ છે.

આ પ્રકારના તમામ સમાચાર માટેે App ડાઉનલોડ કરો.