ભાસ્કર ખાસ:સગર્ભાવસ્થા દરમિયાન ઘણી ભાષાઓ સાંભળતી-બોલતી માતાઓનાં બાળકો વધુ સ્માર્ટ હોય છે, બાળક છઠ્ઠાથી નવમા મહિનામાં અવાજોને સમજવા લાગે છે

જે મહિલાઓ ગર્ભાવસ્થા દરમિયાન પરસ્પર વાતચીતમાં બે કે તેથી વધુ ભાષાઓનો ઉપયોગ કરે છે તેમનાં બાળકો વધુ સ્માર્ટ હોય છે. આવી માતાઓનાં બાળકો અવાજો પ્રત્યે વધુ સંવેદનશીલ હોય છે અને ભાષામાં પણ અન્ય કરતાં સારા હોય છે. યુનિવર્સિટી ઓફ બાર્સેલોનામાં હાથ ધરાયેલા અભ્યાસમાં જાણવા મળ્યું છે કે જે માતાઓ બે ભાષા બોલે છે તેમનાં બાળકો ગર્ભાશયમાં પણ એક જ ભાષા બોલતી માતાઓનાં બાળકો કરતાં અલગ-અલગ અવાજો પ્રત્યે વધુ સક્રિય હોય છે. તેઓ અવાજના તફાવતને વધુ સારી રીતે સમજવામાં સક્ષમ બને છે. યુનિવર્સિટી ઓફ બાર્સેલોનાના ઇન્સ્ટિટ્યૂટ ઓફ ન્યુરોસાયન્સના સંશોધક ડો. નતાલિયા ગોરીના કેરેટા જણાવે છે કે બાળક ગર્ભાશયમાં જ અવાજની તીવ્રતાને અનુભવે છે. ગર્ભાશયમાં બાળક સ્વરો અને અક્ષરોના અવાજોને પણ સમજવાનું શરૂ કરે છે. યુનિવર્સિટી ઓફ બાર્સેલોનાના પ્રોફેસર ડૉ. કાર્લસ એસ્ક્વેરાનું કહેવું છે કે ગર્ભાશયમાં જ બાળકો જેટલા વધુ શબ્દો સાંભળે છે તેટલા જ સ્પષ્ટ રીતે અવાજના તફાવતને સમજે છે. જો માતા તેના ગર્ભાશયમાં બાળક સાથે શક્ય તેટલી વધુ વાત કરે છે અને વિવિધ ભાષાઓનો ઉપયોગ કરે છે તો તે બાળકના વિકાસ પર પણ સારી અસર કરે છે. સંશોધન દર્શાવે છે કે બાળક ગર્ભાવસ્થાના છઠ્ઠા મહિનાથી નવમા મહિના સુધી બાહ્ય અવાજો પ્રત્યે સૌથી વધુ સંવેદનશીલ હોય છે. પરંતુ તેમના સુધી ઉચ્ચ અને મધ્યમ આવર્તન અવાજો ખૂબ જ ક્ષીણ અને નબળા થઈને પહોંચે છે. અવાજો જે ઓછી આવર્તનના હોય છે તેના પર બાળક વધુ પ્રતિક્રિયા આપે છે. વાસ્તવમાં ઓછી આવર્તનના અવાજો વધુ સ્પષ્ટ રીતે ગર્ભાશયમાં પહોંચે છે. ડૉ. એસ્ક્વેરા કહે છે કે પરિવારમાં બોલાતી ભાષા બાળકના ન્યુરલ કોડિંગને મોડ્યુલેટ કરે છે. લોકો જેટલી વધુ ભાષાઓમાં વાત કરશે તેટલું બાળકનું મગજ વધુ વિકસિત થશે. વિશ્વના 43% લોકો ઓછામાં ઓછા દ્વિભાષી છે. મતલબ દ્વિભાષી હોવું સામાન્ય છે. જન્મ પછી ઘણી ભાષામાં વાત કરવાથી બાળક ઝડપથી ભાષા શીખે છે
સંશોધનમાં એ પણ જાણવા મળ્યું છે કે માત્ર ગર્ભાવસ્થા દરમિયાન જ નહીં પરંતુ જન્મ પછી બાળક સાથે અલગ-અલગ ભાષાઓમાં વાત કરવાથી તે જલદી બોલવાનું શરૂ કરી દે છે. ભાષા અને તેના શબ્દોના અવાજ વચ્ચે ભેદ પાડવાનું શરૂ કરે છે. આ દ્વારા તે એક સાથે ઘણી ભાષાઓ શીખે છે. અગાઉનાં સંશોધનો દર્શાવે છે કે જે બાળકો એક કરતાં વધુ ભાષા બોલે છે તેમનું મગજ ઝડપથી કામ કરે છે.

આ પ્રકારના તમામ સમાચાર માટેે App ડાઉનલોડ કરો.